Колмо тейтерде, локсейде, Виян Чиняздо ды Инязордо.
(Эрзякс велявтозь содавикс А.С. Пушкинэнь ёвксось. Велявтсь Эрюш Вежай. )
Колмо тейтерть вальма ало
Чокшнэ штердильть, мелест пароль:
-«Улевлинь мон инязоравакс,-
Седей панжи эйстэст вейкесь,-
Мон весе ломантнень туртов
Пурнавлинь каванямс стувор!»
-«Улевлинь мон инязоравакс,-
Седеензэ панжсь омбоцесь,-
Мон эрьва ломанень кедьс
Коцт кодавлинь, эрьванть мельс!»
-«Улевлинь ва инязоравакс,-
Састо валнэ правтсь колмоцесь ,-
Ставлинь мирдем туртов паля,
Чачтавлинь тензэ цёра-аля…»
Кенерсь тейтерь вал правтомо,
Кенкшесь кармась чикордомо,
Нупальс чалгась Инязоро,
Эрзянь Масторонь Азоро.
Тейтертнень кортамост перть,
Кенкш удало сон аштнесь,
Меельць валтнэнь маринзе,
Превезэнзэ саинзе.
-«Шумбрачи, мазый тейтерь!
Ульть тень полакс, ульть вечкень.
Чачтак тень цёра-аля,
Теленть икеле, сёксня.
Тынь, сонзэ патят-сазорт,
Пурнынка курмонк-кармонк,
Мазый крандайс ойседе,
Ды мельганок моледе,
Вейкесь карми кодыцякс,
Обмось пиди-паницякс.»
Ушов Инязорось лиссь,
Лият мельга. Стака кись.
Аволь кувать тевесь ютась,
Чиявтома сеске ютавтсть.
Инязорось стувор экшсэль,
Од полазо теск, эземсэль.
Мейле одтнэнь кудатне
Кадызь ськамнест утомнес…
Кежсэ пурги пидий-панись,
Тюрьсэ аварьди коцт кодыйсь,
Селмест ваныть-сявадыть,
Сазорнэст сюдыть-сялдыть…
Од инязоравась сеске,
Пекиясь-стакалгадсь теске.
Се шкастонть торпинге ульсь,
Инязорось ушмос тусь.
Аволдась полантень кедьсэ,
Ласте озась-тейсь кеместэ,
Мерьсь полантень: «Ванст эсь прят,
Вечктян тонь, эйднем канднят».
Зярс Инязорось васололь,
Турьсь торпаксясо, ушмосоль,
Нежедсь-сась чачтамо чись,
Паз макссь цёра-парочи,
Авась вансты пек эйсэнзэ,
Локсеекс ашти велькссэнзэ,
Сёрмадсь сёрма тетянтень,
Кеняркс пачти мирдентень.
Пидий-панись, коцтонь кодыйсь
Те сёрмадонть марить-содыть,
Апарс-мельс сазортнэ прасть,
Маштомс сазорнэст кундасть.
Сёрмань кандыенть кармавсть
Ки лангсо кундамонзо,
Вардонь ломань тердсть-аравтсть
Сёрманть полавтомонзо.
Лият валт эсь прястост муйсть,
Маньчемат сёрмасонть кучсть,
Сёрмадсть истя сынь, келя,
— «Раштасть теть аволь аля!
Аволь цёра, аволь тейтерь,
Аволь ватракш, аволь чеерь,
А эрсиця пачине,
А содавикс ракшине.»
Кодак ловнось Инязоро,
Кулясь теке вастазь торо
Седеензэ лазызе,
Кучозенть – повавлизе!
Кирви кежс прась Инязорось,
Мейле оймась, кирдевсь корось.
Мерьсь: -«Учодо велявтомам!
Сан, ёвтаса мелявтомам…»
Арды мекев сёрмань кандыйсь,
Пачкодсь, сизезь сёрмань пачтийсь.
Пиди-панийть, коцтонь кодыйть,
Сёрманть саламонзо арсить.
Кучозенть тердизь оймсемас,
Ченьксстэ симдизь иредемас,
Чамдозь юдмас мейле путсть
Лия сёрма, косо ульсь
Инязоронь мерема,
Зыян тевс кармавтнема:
— «Чирязт-боярт, нейке, сеск,
Аванть-эйденть ёртынк ведьс!
Салавине домка отьмас
Ёртынк кавнест, тоско ёмаст!»
Тейнемс а мезть. Бояртнэ,
Зыян тевтнес анокстыть,
Азор меленть топавтыть,
Инязордо мелявтозь,
Поланть мелензэ ванозь.
Нупальнезэнзэ совить,
Кучозь мереманть ловныть,
Яволявтызь мелензэ,
Инязоронть кежензэ.
Ловнызь весть, ды ловнызь кавксть,
Лагун потс эйсэст озавтсть.
Аванть вейсэ эйденть марто,
Кавнест ёвкставсть ды пекставсть.
Лагунонть валызь пичойсэ,
Ведь илязо чуде потс,
Кевердизь ведь чирес кедьсэ,
Ёртызь иневедь толконс.
Кода Инязорось мерсь,
Истя чирязонзо тейсть.
Сэнь менельсэнть тештне цитнить,
Иневедьсэнть толкунт киштить,
Пелесь менельга ливти,
Лагунсь толкунга уи,
Потсонзо авась чави,
Майси, пильгсэнзэ пстыли.
Касы эйкакшке вакссонзо,
Чиде чис касы трявксозо.
Авась сельведензэ правты,
Эйкакшось веденть кармавты:
— «Тон иневедь, келей ведь,
А кирдеви тонь виеть,
Ведьсэть чават зяро мелеть,
Кевтнень човсят ламо пингеть,
Ули мелеть — модас чадат,
Сы ва мелеть – венчт ваявтат.
Илить сае ойменек,
Кандымизь модас минек!»
Маризе тень иневедесь,
Сеск оймась-тейсь чави ведесь.
Лагунонть сон кепедизе
Ведь чирес састо путызе.
Сонсь сеск скимсь,
Толкунт ёмасть,
Истя идемась тенст сась.
Авась таго кедьсэ чави,
Кода ушов лисемс сави?
Нишкепаз мари эйсэст,
Инешкись касты виест.
Цёрась сэставтсь. Сэрьсэ стясь,
Прязо лангаксос токась.
Тёхмадсь весть, ды тыцмадсь кавксть:
— «Кода ушов кенкш менстямс?»
Истя мерьсь ды пек вачкодсь,
Лагун лангаксось почкодсь!
Лиссь цёрынесь, лиссь авась,
Кавнест моданть лангс чалгасть.
Лекстясть ваньксонь эрий коштсо,
Варштасть перькаваст, сынь косот?
Неить келей-келей пакся,
Куншкасонзо – покш пандо,
Прясонзо – сыре тумо.
Перькаст иневедесь налкси,
Вармась ашо пельнеть панси.
Цёрась мельс сась: -«Курок ве,
Ярсамс тенек эряви».
Синдсь тумостонть кеме тарад,
Тейсь эйстэнзэ налчирьке,
Пракстастонзо карькске калавтсь,
Тейсь эйстэнзэ нал свистьке.
Калго синдсь, тейсь шожда нал,
Молить леднемс нармунть, калт…
Тусь вешнеме идемкатнень,
Тусь муеме ярсамкатнень.
Яки иневедь чирева,
Вешни келей, покш лаймева,
Ансяк пачкодсь ведь чирес,
Марявсь вайгельне пилес:
Ведьсэнть локсей чави, кувси,
Кежей куцькан сонзэ панси.
Майси пиштяка локсей,
Ливтни перьканзо транзей.
Куцькан кенжензэ нолдынзе,
Вериязь нерензэ автизе…
«Бий!», — тейсь налось,
Куцьканс понгсь,
Верть кирьгастонзо валовсть.
Цёрась чирькенть новольстизе,
Неи. Куцьканонть ледизе!
Куцьканось кармась ваямо,
А нармунькс прянзо ветямо.
Локсеесь перьканзо уйкшни,
Ваявтомонзо бажи,
Калги эйсэнзэ, чави.
Мейле пшкадсь эрзянь цёрантень,
Мерьсь эрзякс эрзянь алянтень:
«Тон эрзянь цёра-аля,
Монень кармить идиця.
Иля мелявт. Колмо чить,
Эрят-печтят вачочить.
Иля мелявт налот кис.
Ваясь сон а стякочис.
Се зыянось – а зыян,
Парос велявтса. Теян
Тонеть ламо паро тевть,
А маньчетян, монень — кемть.
Идить тон аволь локсей,
Идить эрямос — тейтерь.
Аволь куцькан тонеть ледевсь,
Ледевсь теть ведун-идемевсь.
Пингем перть а стувттан тонь,
Сы мелеть – муйсамак монь.
Ней велявт мекев курок,
Мадть ды кеместэ удок.»
Ливтясь. Тусь ашо нармунесь.
Ульнесь сон? Эли эзь ульне?…
Ават-цёрат чи ютавсть,
Вачо пекть удомо мадсть.
Пувтась цёрась, панжи сельть,
Удоманзо пани. Перть –
Ош неи сон инень ине,
Перькаванзо – кевень пире.
Сэрей пирявкс пейтнень экшс,
Мазый кудот-утомт кекшсть.
Цитнить сырнень кудо прятне,
Сияждыть кудо конятне.
Цёрась аванть курок пувты,
Тона вайкстась! Абунгавтни:
«Мезе те?» — сельмензэ нардтни,
Цёрась каршо: «Неян мон,
Локсейнем — налкси мартом…»
Ават-цёрат ошов сыргасть,
Ансяк пачкодсть ортатнес,
Баягат чавомо кармасть,
Гайтесь вачкодсь пилезэст.
Ломанть молить тенст каршозост,
Морыть пазморот. Эйсэст
Сюпав кардайсэ васодить,
Шнам валсо ёвтыть лемест.
Инязоронь цёранть пряс,
Путсть прявт каштаз. Сон – Чиняз!
Прявтокс путызь. Цёрань кор!
Аванзо мелензэ коряс
Лемдизь сеск: Виян Азор.
Иневедьсэ вармась налкси,
Иневенчкенть кольнезь панси,
Венчкесь уи толкун ютксо,
Вармамевтне тетькезь, ювсо,
Венчломантне абунгалить,
Венч сэдявкссонть вейс пурнавить,
Тюнихась тенст а содавикс,
Тамашась тенст а неявикс:
Сырнень кудонь ош сынь неить,
Венч содома сэдьксэнть редить.
Ледьмепочкотне леднить,
Венченть содомс кармавтыть.
Венченть содызь инжетне,
Тердизь сынст прявт кудотнес.
Сонсь Виян Чиняз сынст анды,
Арнемаст сэрейстэ канды.
Симди-теи, киведи:
— «Мейсэ, инжеть, микшнетядо,
Ков-васов кить-янт кирдтядо?»
Венчломантне тензэ каршо:
-«Мастор пертька янок-кинек,
Чинеметь ды урт микшнинек,
Равжо ривезть, миёнь кедть,
Валдо штат ды тантей медть.
Ней вана, сась-прась Шказо,
Чилисемав пурдассо.
Буй Ян усиянть ютнема,
Эрзянь Масторс пачкодема.»
Инязоронь цёрась мерсь:
«Ки валаня тенк! Паз лезкс!
Ламо сядт вайгельпень туро,
Муйтядо Эрзянь Масторо.
Вастсынк Эрзянь Инязоронть,
Пельдень тензэ – сюконь коро.»
Сыргасть инжетне. Виян
Нусманя, ваны мельга,
Ильти васоло ки лангс,
Валаня улезэ, ванькс.
Неявсь тензэ апак учо
Таго нармунь човтнэнь ютксо.
Ашо локсей састо уи,
Сонзэ ёнов? Эли туи?
Пшкадсь локсеесь ломань кельсэ:
-«Виев цёра, шумбрачи!
Кода эрсят, парочи?
Мекс ванат апаро мельсэ?
Мекс варштнят потмура сельмсэ?
Эли чись аволь маней?
Менелесь аволь сэрей?»
Седей панжсь тензэ Виян:
— «Вана мезде мелявтан,
Сэви оймем мелявкс-ризкс,
Ёвтамскак эйстэнзэ визькс,
Чей, цёраян. Теть видькстан
Покш мелем неемс тетянь.»
Локсейсь мери цёрантень:
«Те мелявкс, аволь зыян,
Кода алтынь – теть лездан.
Ули мелеть венченть мельга
Ливтямс иневеденть велькска?
Паро. Ливтяк! Теевть сеськекс.
Стардык иневенчкенть сеске!»
Сонсь ахолдась сёлмосонзо,
Ведьсэ пургась лангозонзо,
Прясто пильгс пургсизе. Сеск,
Велявтсь цёрась сеськинекс.
Вишка сеськинекс теевсь,
А эрьвантень ней неевсь.
Ливтясь сеськесь. Вай мезе!
Иневенчкенть стардызе.
Састо валгсь торсеенть пряс,
Лазкскес кекшсь, мерят, ёмась…
Вармась пуви, элякали,
Венчкесь чии, эрязкали,
Буй Ян усиянть пелев,
Эрзянь Масторонь элев.
Нерьсэнть веденть кавтов яви,
Учонь Масторось – неяви!
Сазьтне ансяк модас валгсть,
Инжекс тердемест кармасть,
Терди сонсь Ине Азорось,
Истямо Масторпрявт корось,
Инжень мельга Прявт кардайс,
Минек сеськеськак ливтясь.
Неи, сырнень оршомосо,
Мазый, сиянь озамосо
Озадо сонсь Инязорось,
Цётмарось кедьпесэнзэ,
Ризкст-мелявкст сельмесэнзэ.
Пиди-панийсь, коцтонь кодыйсь
Пупорь сыре куданть марто
Вакссо озадо аштить,
Инязоронть сельмс ваныть.
Стувор экшс инжеть озавтыть,
Ёвтнеме эйсэст кармавтыть:
-«Вай, паро азорт-инжеть,
Кинк, паряк, стака ульнесь.
Ёвтнеде, кува уйкшниде,
Мезе ды косо некшниде?
Кода-косо ломанть эрить?
Тюнголькст кодат косо эрсить?»
Венчломантне каршо мерить:
-«А беряньстэ ломанть эрсить
Тамашатнеяк улить,
Ды а весе сынст неить.
Тюнголькс-эрявкс вейке теевсь,
Ютамсто тенек сон неевсь.
Иневедь келей куншкасо
Усия ульнесь ве шкасто,
Эзь эря кияк лангсозо,
Эзть чалгсе ломанть модазонзо.
Ульнесь чаво, валаня,
Аняк тумо рацяня
Тикше потсо вейке кассь,
Лия – мезеяк арась.
Вана ней — се усиясонть
Кассь ошпандо. Сэрьс сиясо
Кудо прянзо оложась,
Латот – сырнесэ вельтязь.
Перькаванзо – умарьпиреть,
Умарь чувтнэ – сэрей принеть.
Ошсонть прявтокс Виян Чиняз,
Тонеть кучи сюконямот.»
Инязорось абунгали:
— «Ва кувать эрян-улян,
Инжекс Вияннэнь молян.»
Пидись-панись, коцтонь кодыйсь,
Пупорь сыре куданть марто
Теде марить, теде содыть,
Анокстыть сынь эсь мелест,
Апарос правтыть превест:
Инязоронть а нолдамс,
Молемс мелензэ — кардамс.
— «Мень те тюниха, ошпандо?»
Кончтни сельмсэ пидий-панийсь.
— «Сезякань пулосонть кандозь,»
Поладсь тензэ коцтонь кодыйсь.
— « Вана алкуксонь тамаша
Вирьсэ-карчсо теевсь-лиссь:
Касы куз, алонзо ур,
Урнэсь морынеть морси,
Вирень пештинеть чулгси,
Пештинетне аволь стяконь,
Лукшкест сырнень, а истяконь,
Товост – сэньшт кев сляникат,
Вана тамашась! Кемат?»
Инязорось абунгали,
Сеськесь, мари, кежейгали,
Кежть пурнась ды сеск невтинзе,
Вить сельмес пидинть пупизе,
Пидиесь теск ловташкадсь,
Чамазо чирьтявсь-пурдавсь,
Кудась, сазорось, лездыйть
Пижнезь сеськиненть кундыть.
— «Идемевсень марав-сеське!
Ва минь тонь!»- Сон вальмас теске,
Ливтясь ушов, тусь васов,
Иневедень товолов.
Таго Чиняз ведь чиресэ,
Сельмть а саи иневедьстэнть.
Ювк, неявсь толкунтнэнь ютксо
Локсеенть ашо сёлмонзо,
Цёранть каршо нармунь уи,
Толкун прясто сятктнэнь нуи.
— «Шумбрачи, мазый аля!
Шумбрачи, виев цёра!
Таго-мекс чамат нусманя,
Мень ризксэнть седейзэть саят?»-
Кевкстни цёранть нармунесь,
Теке мартонзо ульнесь…
Виян Чинязось каршонзо,
Ёвты мелявксов валонзо:
-«Мель сась. Кедьсэм улезэ
Вейке эрсикс тамаша,
А содавикс тюниха,
Маринь, ули сон вирьсэ,
Тусто карч пулынесэ.
Се вирьнесэнть казы куз,
Кузонть ало налкси ур,
Урнэсь морынеть морси,
Вирень пештинеть чулгси,
Пештинетне аволь стяконь,
Лукшкест сырнень, а истяконь,
Товост – сэньшт кев сляникат.
Виде те? А маньчемат?
Паряк ломантне маньчить,
Зярдо эйстэнзэ ёвтнить?»-
Локсеесь тензэ корты:
-«Те тамашась – видечи.
Мон содан те уронть эйстэ.
Иля мелявто, Чиняз,
Лездан теть паро ялгакс!»-
Валдомсь оймезэ, одов
Паро мельсэ тусь кудов,
Икелензэ – валдо ян,
Арси пародо Виян.
Чиняз Виян чалгась кардайс,
Луга нарнэс, аволь рудайс,
Мазый кустимбезэнть куйсь,
Сеске неи сэрей куз,
Кузонть алов урнэ валгстась,
Весень пингстэ пештьке калгстась,
Пештень лукшкесь — чова сырнень,
Товось – питней пиже кев.
Чулгси урнэсь пештинетнень,
Калгси эйсэст секе тев.
Чулги-теи, морот морси,
Нолдни мазыйстэ вешкевкст.
Товтнэнь вачки вейке таркас,
Сырнень лукштнэнь – обмоцес.
Ломантне перька аштить,
Тень неезь – кургост автнить!
Чиняз Виян абунгадсь:
— «Вай, сюкпря! – сон вал каясь,-
«Те – локсей, вана, локсей!
Мезе тейсь монень! Ды мей!
Кадык тензэяк улезэ,
Кода монень. Чансть тензэ!»-
Чинязось те тевенть мейле,
Мерьс урнэнтень кудо тейме,
Аравтсь ушман-ванстыця,
Товонь-лукшонь ловиця.
Парсте ловомо кармавтсь,
Чинязнэнь – эрьме,
Урнэнтень – тансть!
Вармась пуви, элякали,
Венчкенть икелев тёхмали,
Лажныть, чикордыть торсейть,
Морыть пувавт вармамевтть.
Верев лиссть венчень ломантне,
Таго учить тамашатнень.
Неить сэрей усиянть,
Ош кудопрятне – сиянь!
Ледьмепочктнэ тосто леднить,
Венчкентень лоткамо мерить.
Лоткасть сазьтне, модас валгсть,
Сынст инжекс тердемест кармасть.
Сонсь Виян Чинязось терди,
Инень инжекс сазьтнень кирди,
Анды инжетнень, симди,
Кидест- яндост киведи:
— «Мезть тынь, инжеть, микшнетядо?
Васов кинк-янонк кирдтято?»-
Венчломантне каршо мерить:
— «Моданть перька минь ютынек,
Айгорт-алашат микшнинек,
Дон лей чирень лишметькак
Савсь микшнемс. Эйстэст содат?
Ней тенек шказо туемка,
Кись — васолонь. А сэзнэмка.
Буй Ян усиянть кадомка,
Эрзянь Масторов сеземка.»
Сестэ мери тенст Чиняз:
— «Ванстозо тынк Верепаз!
Иневеденть печкеде,
Эрзя юткс пачкодеде.
Инязоронтень монь пельде
Шумбракстнема валт ёвтнеде.»
Инжеть тензэ сюконясть,
Ойсесть венчс ды тов сыргасть.
Виян сеске ведь чирес,
Локсеесь тоск нейгак уйнесь.
Вешсь цёрась, келя, оймезэ
Тов, васов, уски эйсэнзэ…
Таго локсеесь пургсизе,
Карвокс цёранть велявтызе.
Ливтясь карвось, венчес валгсь,
Лазкскес совась, мерть, ёмась.
Вармась пуви, элякали,
Венчкенть икелев тёхмали,
Увныть-чикордыть торсейть,
Морыть пувавт вармамевтть.
Кадовсь удало Буй Янось,
Икеле – Эрзянь Масторось,
Покш мельсэ учозь модась,
Сельме икеле тейсь-панжсь.
Содстасть инжеть, сэднесь валгсть,
Инжекс тердемест кармасть.
Сонсь Инязорось сынст терди,
Инень инжекс эйсэст кирди,
Инжень мельга покш кудос,
Карвонок ливтясь мартост.
Неи, Инязор оршазь сырнесэ,
Нупаль куншкасонь эземсэ,
Прясонзо сиянь каштаз,
Сельмсэнзэ мелявкст таштавсть.
Коцтонь кодысь, пиди-панись
Пупорь куданть марто вейсэ
Инязоронть вакссо аштить,
Сельмс ватракшокс тензэ варштнить.
Инязор инжеть озавтни,
Эрванть кевкстни, эрьванть арни:
-«Вай, тынь инжеть, вай, важовт,
Васов яксиде тынь? ков?
Весе ладс веденть томбале?
Эли зыянт тосо улить?
Кодат улить тюнихат?
Кодат эрсить тамашат?»
Ведьга уйкшныцят каршо:
-«Васов укшнынек, ламо,
Эрямось тосо паро,
Вейке тамаша некшнынек,
Эзэнзэ абунгадынек.
Усия веденть куншкасо,
Ошпандо усиянть прясо,
Кудо прянзо сыреждыть,
Утом прянзо сияждыть.
Перькаванзо умарьпиреть,
Сюро паксят сравтневить.
Куз касы кудо икеле,
Алонзо ве урнэ эри.
Сляникань кудынесэ,
Кедьс тонавтозь урнэсь се.
Мезес машты — тамашат!
Морот морси, а кемат!
Сонсь пештинеть яла калгси,
Чинзэ чоп кольни ды налкси.
Петштень лукштнэ цитни сырнень,
Товтнэ – мазыйне кевнеть.
Алят ванстыть ёвксонь урнэнть,
Весе одт, мазыйть, виевть!
Ловий ломаньгак аравтозь
Пештень ловомс. Ушман вий
Невтни мик арнема ахолкс
Се ёвксонь урнэнть пелев.
Од тейтерть сеть товтнэнь пурныть,
Цюланс, ларьс лукшкетнень кекшнить.
Весе ломантне сюпавт,
Кевстэ кудотне вачкавт.
Прявтокс ошсонть — Виян Азор,
Кучи теть чанстямот Пазонь.»
Инязорось абунгали,
Ёвтнемаст мельзэнзэ саи,
Мери инжетнень каршо:
— «Паз максозо, тов молян,
Усиянть лангс мон варшан,
Ды Виянонь содавтса,
Мелензэ сонзэ ванса!»
Коцтонь кодыйсь, пиди-панийсь
Пупорь куданть марто вейсэ
Бажить а нолдамонзо,
Инжекс а пурнамонзо.
Ёжовсто сесьмесэст кончтазь,
Инязоронтень сынь кортасть:
-«Мень се тамаша? Эно,
Урнэ пештть чулгси? Паро,
Ансяк мейсэ тамашась?
Анок сырненть вачкамс марс —
Теньсэ тюниха арась!
Виденть ёвлизь, эли аволь,
Кие соды…
Лия тамаша эрси
Мастор лангсо. Мель саи!
Абунгавтни, мель куцьти:
Иневедесь чави човт,
Урны-ирны, теке овтт!
Карми этеме, чадомо,
Чиренть трокст модас валомо,
Салыведьсэ валсы моданть,
Мерят, Масторлангось лондадсь,
Одс скими, карми потамо,
Моданть олячис нолдамо,
Чиренть лангс кадови теск
Витезь ушмо. Чалгить сеск
Колонькемень колмо ушмант,
Мазыйть, виевть, кеме цёрат.
Лангсост панарт сырнень лукшонь,
Чамаст валдот, маней ушонь.
Весе одт, мазыйть, сэрейть,
Ве шкасто теке кенерсть.
Мартост прявт, Ведень Азор,
Ведь потмаксонь инязор.
Те тамаша тык тамаша,
Эрьва ломаненть чаравтсы!
Превей инжетне чатьмонить,
Пелькстамо каршост а молить,
Инязорось абунгали,
Виян кеж мельсэ псилгали…
Бизкстась карвось. Сеске — уцьк!
Валгсь авинень сельмс ды сусксь!
Видьстэ керше сельме керьс
Сускомонзо сон кенерьсь.
Коцтонь кодыйнь чамась пурдась,
Теке пици палакс кундась.
— «Вай! Кундак сонзэ! Кундак!»-
Весе пижнить! Ков… Стардсак…
— «Лепштик сонзэ! Чавт! Мерькак!»
Косто! Ливтясь карвинесь вальмас,
Тусь. Эсь Масторов ливтясь.
Виян ведь чирева яки,
Иневедьстэнть сельмть а саи,
Ваны, локсей малав уи,
Толкун прятнень нуезь нуи.
— «Шумбрачи, паро цёра!
Мекс чаминеть потмура?
Кодат мелявкст ойметь сэвить?»
Чинязонь нармунесь кевкстни.
Од Азорось каршо тензэ:
-«Покш мелявкс седеем разди,
Тамашанть кедьсэм аразьде,
Кона Масторсом улевель,
Ды ламо ломанть кецтневель.»
— «Мень те тамаша? Ёвтак.
Апак сёпо тень видькстак.»
-«Та-косо, вейке таркасо
Иневедесь чави човт,
Лажны, ирны, теке овтт!
Карми чадомо, пивтеме,
Кевень яжамо, эвтеме,
Чиренть трокст мик валовомо,
Ведь чиретнень лондавтомо.
Салыведьсэ моданть валы,
Мейле скими, мекев поты.
Чиренть лангс кадови теск
Витезь ушмо. Чалгить сеск
Колонькемень колмо ушмант,
Лангсост сырнень лукшонь панарт.
Весе одт, мазыйть, сэрейть,
Ве шкасто теке кенерсть.
Мартост прявт, Ведень Азор,
Ведь потмаксонь инязор.»
Локсеесь тензэ корты:
— «Вана мезесь мелявты,
Иля мелявт, сяткинем,
Те тамашась монь кедьсэм.
Иневедень витезьтне,
Те монь вишка ялакстнэ.
Иля мелявт. Тук, удок,
Инжекс ялаксом учок.»
Тусь Чинязось апак мелявт,
Шожда мельсэ кудов велявтсь,
Куйсь ошпандонь копёр пряс,
Ваны пштистэ толкун лангс,
Ведесь -плесть! Вачкодсь виевстэ,
Витезьть лиссть ашо човтнэстэ,
Мазый, виев алятне,
Иневедь маралятне.
Лангсост панарт сырнень лукшовт,
Толсо палыть пря путовксост,
Колонькемень колмо цёрат
Молить мельга-мельцек аравт.
Шержев прячерьсэ цитни,
Ведь Азор эйсэст вети.
Ушмось ошонть пелев шашты,
Виян Чинязось сынст васты.
Питнев инжетнень учи,
Ломанть каршозост кучи.
Мери тензэ Ведь Азорось:
-« Локсеенть топавтовсь корось,
Сон кучимизь минек тей,
Ды меремат путсь локсей —
Масторот-ошот ванстомост,
Пштистэ яттнэстэ ваномост,
Эрьва чистэ иневедьстэнть
Лиснеме ды тей сакшномо.
Курок таго васодтяно,
Ней шказо ведь потс совамо.
Мастор коштось тенек стака.»
Мерьсь истя. Ды тусть истяко.
Иневедьсэнть вармась налкси,
Иневенчкенть кольнезь панси,
Вармась пуви, элякали,
Венчкесь чии, эрязкали,
Буй Ян усиянть вакска,
Мазый ошпандонть экшска,
Бийнить-зыйнить вармамевтьне,
Чикордыть сэрей торсейтне,
Леднемпочкотне леднить,
Содомс венченть кармавтыть.
Содовсь венчесь, инжеть валгсть,
Сэрей кудос састь-совасть.
Виян Чинязось сынст анды,
Симди пуресэ. Кармавты:
-« Мезде, инжеть, микшнетядо?
Ков минек эйстэ туйтядо?»
Венчломантне каршо мерить:
-«Моданть перть а весть ютынек,
Эрьва мезде минь микшнынек.
Микшнынек пшти-кеме торот,
Сянгот-сялгот, налчирькеть,
Рамсекшнынек сюро норовт,
Пштистэ човазь узереть.
Ульнесь сырненек, сиянок,
Ней сыргамо минь анокт,
Шказо сась туемс, ванок.
Буй Ян усиянть ютамка
Эрзянь Масторонть варштамка.
Корты тенст Виян Чиняз:
— «Ванстозо тынк Верепаз!
Иневеденть печкеде,
Эрзянь видьс пачкодеде.
Инязоронтень монь пельде
Шумбракстема валт ёвтнеде.»
Инжетне модас сюконясть,
Ойсесть венчс, киваст сыргасть.
Таго Чиняз ведь чирев,
Оймесэнзэ стака кев.
Неи локсей иневедьстэнть,
Сэняжа валдо келестэнть,
Састо уйкшни толкун ютксо,
Човнэть панси сёлмосонзо,
Цёранть каршо састо уи,
Толкун прясто сятктнэнь нуи.
— «Шумбрачи, мазый аля,
Шумбрачи, виев цёра!
Таго мекс чамат нусманя,
Таго ризкс седейзэть саят?»
Кевкстни цёранть нармунесь,
Теке арсеманзо нейсь…
Цёрась каршо: — «Истя, истя,
Оймем теке пинкссэ свистязь,
Тошнакалемась изни,
Эрзянь Масторов терди…»
Таго локсеесь пургсизе,
Мода укскакс велявтызе.
Ливтясь укскась, венчес валгсь,
Лазкскес эцесь. Кекшсь, ёмась.
Вармась пуви, элякали,
Венчкесь уи, эрязкали,
Васов усиянть кадызе,
Эрзянь Масторонть муизе,
Капши венчкесь икелев,
Эрзянь Масторонь элев.
Ансяк инжеть модас валгсть,
Инжекс тердемест кармасть,
Терди сынст Ине Азорось,
Истямо масторонть коесь,
Инжень мельга прявт кардайс,
Мода укскаськак ливтясь.
Неи, сырнень оршомосо,
Мазый, сиянь озамосо,
Озадо сонсь Инязорось,
Эрзянь Масторонь азорось,
Цётмарось кедьпесэнзэ,
Ризкст-мелявкст сельмесэнзэ.
Коцтонь кодысь, пиди-панись
Пупорь куданть марто вейсэ
Инязоронть вакссо аштить,
Сельмсэст теке сялгт пезнавтнить.
Инязор инжеть озавтни,
Эрванть кевкстни, мелест ваны:
-«Вай, тынь инжеть, вай, важовт,
Васов яксиде тынь? ков?
Весе ладс веденть томбале?
Эли зыянт тосо улить?
Кодат улить тюнихат?
Кодат эрсить тамашат?»
Ведьга уйкшныцят каршо:
-«Васов уйкшнынек, ламо,
Эрямось тосо паро,
Тамаша тосо некшнынек,
Эзэнзэ абунгалинек,
Усия веденть куншкасо,
Ошпандо усиянть прясо,
Эрьва чистэ тосо неявтт,
Тамашат-мезть редят-неят,
Ведесь ушоли чавомо,
Ашо човсо вельтявомо,
Шолдорсо карми чадомо,
Ведь чирентень валовомо,
Човстонть лиси-келеми,
Ушман куро эскели,
Колонькемень колмо ушмант,
Колонькемень колмо цёрат,
Вейке сэрьсэ, виевть, мазыйть,
Кавтонь-кавтонь вейсэ шаштыйть,
Прявтокс тенст Ведень Азоро,
Кедьсэнзэ цитниця торо.
Лиснить ванстомо ошпандонть,
Душмандо ды кежей ятто.
Ванстыцятне пек нардевть,
Тонавтозть ванстомань тевс.
Прявтокс ошсонть Виян Азор,
Кучи теть чанстямот Пазонь.»
Инязорось абунгали,
Ёвтнемаст мельзэнзэ саи,
Мери инжетнень каршо:
— «Паз максозо, тов молян,
Усиянть лангс мон варшан,
Од Чинязонть содавтса,
Мелензэ сонзэ ванса!»
«Пс-ст» а мери коцтонь кодыйсь,
«Какст» а каксты пиди-панись,
Пупоренть кургозо автевсь,
Турвань пуртнезь мерезевсь:
-«Мень те тамаша? Мень неявтт?
Ведьстэ лисни ломанть неят…
Лисить, тия-тува якить,
Ошонть перька яксезь чакить,
Мейсэ тамашась тесэ?
Абунгалемась мейсэ?
Тамаша меньгак а неян,
Кенгелема. Мон а кеман.
Улить лият тамашат,
Лият эрсить тюнихат.
Васоло, веденть томбале,
Ведь Азоронь тейтерь эри,
Мазычизэ – Ковавань,
Шумбрачись – Норовавань.
Валдо чистэ ваны Ковокс,
Чоподь вестэ эжди толокс,
Конясонзо цитни теште,
Мазый рунго, сэрей меште,
Черьпулынес ков кодавсь,
Викшнезь палясо оршазь.
Корты сэтьместэ ды састо,
Чудикерькскекс маряви,
Кона каи шольть лиясто,
Кротамозо мель вити.
Тейтерь, мазычинь тамаша,
Мастор томбале эри!»
Превей инжетне чатьмонить,
Пелькстамо каршо а молить,
Инязорось абунгали,
Уксканть кежензэ псилгалить,
Ялатеке прянть кирди,
Пупорь куданть а пупи.
Кувать чары прянзо велькска,
Мезес салмукссонзо нерькстамс?
Судо прянзо лангс озась,
Укскань салмукссонть пупась.
Сеске таргойсь пупазь судось,
Кирнявтсь кудась пижнезь-сюдозь:
-«Вай, лездадо тень ломанть!
Судос пупимим укскась!
Кундадо сонзэ! Чаводо!»
Азё кундык… Се укскась
Лыйк вальмава! Сеск ёмась…
Тусь. Эсь Масторов ливтясь,
Эсь кудозонзо велявтсь.
Чиняз ведь чиреванть яки,
Стака мельть мештьсэнзэ лакить,
Сэняжастонть сон неи,
Локсей каршонзо уи.
-« Шумбра чи, мазый цёра!
Мекс чаминеть потмура?
Мекс тонеть нусманя чизэ?
Мень мелявкс педясь эзэзэть?»
Кевкстни локсеесь сонзэ,
Сонсь уйкшны икелензэ.
Од цёрась кеми тензэ,
Панжизе седеензэ:
— «Вана мезде мелявтан,
Вана мекс мон нусманян,
Весе цёратне урьвакстнить,
Мукшныть эстест вастат-нить,
Ансяк мон те шкас ськамоян,
Кодяк пола а муян,
Апак урьваксто эрян,
Скамом эрямом печтян..»
— «Паряк киньгак эстеть редить?
Ули истямось ва? Невтик!»
-«Кортыть, тейтерь вейке ули,
Сондензэ марсекшнынь кулят,
Сельмть а саевить эйстэнзэ,
Прят ёмавтсак мазыстэнзэ.
Васоло, веденть томбале,
Се мазый тейтересь эри,
Мазычизэ – Ковавань,
Рунгозо – Норовавань.
Валдо чистэ ваны Ковокс,
Чоподь вестэ эжди толокс,
Конясонзо цитни теште,
Чова рунго, сэрей меште,
Черьпулынес ков кодавсь,
Викшнезь палясо оршазь.
Корты сэтьместэ ды састо,
Чуди лейнекс маряви,
Кона каи шольть лиясто,
Кротамозо мель вити,
Кунсоломонзо терди.
Виде кулясь, эли аволь?
Теде содамс тень эряволь,
Аволь маньчема ва се?»
Локсеесь варштазевсь пштистэ,
Чатьмоньсь-тейсь, ды мери сестэ:
-«Иля мелявт, иля пеле,
Се тейтересь алкукс эри,
Ведь Азоронь се тейтересь,
Мирдес иензэ кенерезь.
Ансяк содак, цёра-аля,
Полась – теть аволь варьга,
Ашо кедьстэть а каяви,
Карксот экшес а пштедеви,
Превс мон путтан, арсек теде,
Илязат янксе мееле.»
Чинязось кармась чекамо,
Прянь парсте алтась ветямо,
Келя, арсесь сон парсте,
Анок урьвакстомс тече,
Оймезэ бажи ливтямо,
Мазый тейтеренть чиямо,
Печтясы кувака кинть,
Ансяк муемс тензэ нинть.
Колонькемень колмо масторт,
Те а пирявкс, вийтне сатост.
Укстась локсеесь домкасто,
Мерьсь цёрантень, лекстясь састо:
— «Мейсь васов молемс тонеть?
Мелявксот весе тесэть,
Содак, уцяскат маласо,
Вейке кедень венстямосо,
Се тейтересь, видькстан, мон,
Теде содак ансяк тон.»
Сёлмосонзо ахолдась,
Мода чирес сеск ливтясь,
Валгсь тусто куракштнэнь потс,
Толганзо теевсть коцтокс,
Рестединзе коцтнэнь сон,
Тейтерькс теевсь. Мазый он!
Мазычизэ – Ковавань,
Рунгозо – Норовавань.
Перькаванзо ваны Ковокс,
Варштавксозо эжди толокс,
Конясонзо цитни теште,
Чова рунго, сэрей меште,
Черьпулынес ков кодавсь,
Викшнезь руцясо оршазь.
Сась цёранть ваксс, теке пава,
Ёвкссто саезь тейтерь-ава,
Корты сэтьместэ ды састо,
Чуди лейнекс маряви,
Кона каи шольть лиясто,
Кротамосо мель вити,
Кедьс кундамонзо терди.
Цёрась састо кутмордызе,
Лембе мештьсэнзэ эждизе,
Кудов тейтеренть вети,
Аванстэнзэ сеск невти,
Веши аванть, энялды:
— «Вечкень авай, корьмакай,
Кочкинь пола, тирякай,
Тонеть урьва, монень ни,
Вешан чанстямот течи,
Мерть тенек вечкезь эрямо,
Эрямонть вейсэ печтямо.
Авась кирвазтсь ванькс штатол,
Сельведь правтсь. — «Паз чанстяволь!
Аволиде уле косо,
Верепазось тынк ванстозо!»
Чинязось шканзо эзь сацтсе,
Урьваксть сеске, шканть эзь таргсе,
Кармасть парсте эрямо,
Эйкакшкинень учомо.
Иневедьсэнть вармась налкси,
Иневенчкенть кольнезь панси,
Венчкесь уи толкун ютксо,
Вармамевтне теткезь, ювсо,
Венч ломантне абунгалить,
Венч сэдявкссонть вейс пурнавить,
Тюнихась тенст а содавикс
Тамашась тенст а неявикс:
Сырнень кудо ош сынь неить,
Венч содома сэдьксэнть редить.
Ледьмепочкотне леднить,
Венченть содомс кармавтыть.
Венченть содызь инжетне,
Тердизь сынст прявт кудонтень.
Сонсь Виян Чиняз сынст васты,
Арнемаст сэрейстэ канды.
Симди-теи, киведи:
— «Мейсэ, инжеть, микшнетядо,
Ков-васов кить-янт кирдтядо?»
Венчломантне тензэ каршо:
-«Мастор пертька янок-кинек,
Эрьва мезде минь микшнинек,
Микшнинек, содазь, а стяко,
А эрьвась теде содазо.
Ней вана, сась-прась Шказо,
Кись Чилисемав пурдазо.
Буй Ян усиянть ютамка,
Эрзянь Масторс пачкодемка.»
Сэтьме вал каясь Чиняз:
«Ванстозо тынк Верепаз!
Иневеденть печкеде,
Эрзямасс пачкодеде.
Инязоронтень монь пельде
Шумбракстнема валт ёвтнеде.
Ледстинк тензэ, сон алтась,
Учонь инжекс тенек самс,
Ты те шкас эзь пурнаво,
Кодяк эзь сэрняво.»
Инжеть тензэ сюконясть,
Ойсесть венчс, васов сыргасть.
Виян ней эзь ливтя мартост,
Кудос кадовсь нинзэ марто.
Вармась пуви, элякали,
Венчкенть икелев тёхмали,
Увныть-чикордыть торсейть,
Морыть пувавт вармамевтть.
Кадовсь удало Буень Янось,
Икеле – Эрзянь Масторось.
Покш мельсэ учозь модась,
Сельме икеле тейсь- панжсь.
Содстасть инжеть, сэднес валгсть,
Инжекс тердемест кармасть.
Сонсь Инязорось сынст терди,
Инень инжекс эйсэст кирди,
Неить, Инязор оршазь сырнесэ,
Нупаль куншкасонь эземсэ,
Прясонзо сиянь каштаз,
Инжеть тензэ сюконясть.
Коцтонь кодысь, пиди-панись
Пупорь куданть марто вейсэ
Инязоронть вакссо аштить,
Сельмезэнзэ, ёжовт, варштнить.
Инязор инжеть озавтни,
Эрванть кевкстни, эрьванть арни:
-«Вай, тынь инжеть, вай, важовт,
Васов яксиде тынь? ков?
Весе ладс веденть томбале?
Эли зыянт тосо улить?
Кодат улить тюнихат?
Кодат эрсить тамашат?»
Ведьга уйкшныцят каршо:
-«Васов укшнынек, ламо,
Эрямось тосо паро,
Вейке тамаша некшнынек,
Эзэнзэ абунгалинек.
Усия веденть куншкасо,
Ошпандо усиянть прясо,
Кудо прянзо сыреждыть,
Утом прянзо сияждыть.
Перькаванзо умарьпиреть,
Сюро паксят сравтневить.
Куз касы кудо икеле,
Алонзо ве урнэ эри.
Сляникань кудынесэ,
Кедьс тонавтозь урнэсь се.
Мезес машты, тамашат!
Морот морси, а кемат!
Сонсь пештинеть яла калгси,
Чинзэ чоп кольни ды налкси.
Петштень лукштнэ цитни сырнень,
Товтнэ – мазыйне кевнеть.
Алят ванстыть ёвксонь урнэнть,
Весе одт, мазыйть, виевть!
Ули тамаша лия,
Невтьсь тенек Азор Виян,
Ведесь ушоли чавомо,
Ашо човсо вельтявомо,
Шолдорсо карми чадомо,
Ведь чирентень валовомо,
Човстонть лиси-келеми,
Ушман куро эскели,
Колонькемень колмо ушмант,
Колонькемень колмо цёрат,
Вейке сэрьсэ, виевть, мазыйть,
Кавтонь-кавтонь вейсэ шаштыть,
Прявтокс тенст Ведень Азоро,
Кедьсэнзэ цитниця торо.
Лиснить ванстомо ошпандонть,
Душмандо ды кежей ятто.
Ванстыцятне пек нардевть,
Тонавтозть ванстомань тевс.
Од Чинязонть ули низэ,
Ведень чирестэ муизе,
Аволь ава — мазый он!
Черезэнзэ – кодазь ков,
Якси-чалгси теке пава,
Ёвкссто саезь тейтерь-ава,
Конясонзо теште цитни,
Варштавкссонзо мельть сон витни.
Мазычизэ – Ковавань,
Рунгозо – Норовавань.
Аволь ава – тантей он,
Нейсак, мерят — чивалдонь!
Ошсонть — прявтокс од Виян,
Истямо арась лия,
Сонзэ весе арнить, вечкить,
Тонеть юконямот кучи,
Яла инжекс эйсэть учи.
Пеняцясь тенек сон а весть:
-«Инязорось самс алтнесь,
Сонсь а сави кодаяк,
А пурнави течимскак.»
Инязорось эзь кирдеве,
Макссь пурнамо меремат.
Мерьсь анокстамс иневенч,
Тевстэнзэ арси менемс,
Инжекс Вияннэнь молемс.
Коцтонь кодыйсь, пиди-панийсь
Пупорь куданть марто вейсэ
Бажить а нолдамонзо,
Инжекс а пурнамонзо.
Сынст Инязор а кунсолы,
Каршост мери, мелест колы:
— «Мезе мон? А Инязоран?
Мекс а кирдтядо монь кором?
Мон а пейдян! Сеск пурнан!
Инжекс усияв молян!»
Пильгесэнсэ модас пстидьсь,
Зэрькстась кенкшсэнть, ушов лиссь!
Валма ало Чиняз ашти,
Чатьмони, ведь васолкснэс варштни,
Иневедесь а чави,
Састыньгине лымбакстни.
Неи Виян, васолкссо
Венчкеть неявсть, се тосто
Сонсь Инязоро уи,
Венчсэнзэ толкунт нуи.
Чиняз рангстась, пижакадсь:
-«Вай, авакай-корьмакай!
Варштакая, полакай!
Варшадоя весе тов:
Веденть томбальксэв, васов!
Тетинем тень инжекс сы,
Минек ошонть содавтсы!»
Венч ушминесь малавгады,
Виян васолсельмукшс ваны,
Инязороськак тосто
Ваны ваномпочкосо.
Пупорь кудась мартонзо,
Кодыйть-панийть вакссонзо,
Ваныть сынь, абунгалить,
Неезентень а кемить.
Ледемпочктне ледсть, зэрневтсть,
Баягатне гайтть гайневтсть.
Васты Виян Инязоронть,
Пиди-панинть, коцтонь кодынть,
Васты Пупорь кудантькак,
Кода коенть коласак?
Ошов инжетнень ильти,
Вети эйсэст, чатьмони.
Совить весе сэрькскудос,
Кардайсэнть – сырнень валдо,
Аштить ванстыцят икелест,
Весе виевть, вейкетть сэрест,
Колоньгемень колмо алят,
Виде-парынеть маралят!
Ведь потмаксонь Азор прявтсост,
Кедьсэст узерть, цитнить сялгост.
Инязорось кардайс чалгась,
Касы кузонть алов варштась,
Неи куз, алонзо урнэ,
Кольнеме, налксеме пурны,
Урнэсь морынеть морси,
Вирень пештинеть чулгси,
Пештинетне аволь стяконь,
Лукшкест сырнень, а истяконь,
Товост – сэньшт кев сляникат,
Вана кодат тамашат!
Товнэтнень урнэсь таргси,
Кескавнес ванстомс вачкси,
Кардаз нарось прок шушмосо
Вельтявсь. Сырнень лукшонь потсо.
Ваныть. Вай! Сонсь Чинязавась,
Лиссь каршозост ёвксонь павакс!
Ававтонзо кедте ветясь,
Инязор содызе! Рангстась:
-«Кода? Кинь сельмсэм редян?!
Вечкень полынем неян?»
Сельведть сельмстэнзэ пургасть,
Нинть кутморямо кармась.
Кутмори цёранть, урьванть,
Таргазь стувор экшс озасть.
Кенярксчинь ине ярсамос,
Важов инжень каванямос.
Коцтонь кодыйсь, пиди-панийсь,
Тандадокшнозь кекшнесть-сралесть,
Аксялкстнэстэ эль муевсть,
Видькстасть апаро тевдест.
Мезес сатотсть сынст визьксэст,
Чумонь нолдамот сынь вешсть,
Аварьдить, виевсэ рангить,
Рангомасост ойметь раздить,
Кода чумост а нолдамс?
Рангомаст кода кардамс?
Инязорось мельпаросоль,
Кевкстни сынст: — «Тынк превенк косольть?»
Кувать кежензэ эзь кирде,
Эсест кудов сынст нолдынзе.
Чизэ кеняркссо ютась,
Иневедьс чипай ландясь,
Пельс иредезь Инязорось
Оймсеме, удомо мадсь.
Покшчисэнть монгак ульнинь,
Мезде неинь – тенк ёвтынь,
Тантей пуреде симинь,
Коське турвинем начтынь.
Пуресь уловам чудесь,
Кемеде, тантей ульнесь!
(Эрзянь кельс-лувс велявтомась – Эрюш Вежаень)
2016 ие, эйзюрков-таштамков.
Комментировать