Эрзянь симемкат. Поза.
«Федай бабам теиксэлизе истя. Анокстыль розь почтонь чапакс. Тейниль розень сюкорнэть. Сюкорнэтнень путылинзе каштомс. Кувать панилинзе, зярс эйстэст а теевить коське сюкорнэть — курягат. Чопода тюжат. Миненекак максниль поремкакс. Сынь ульнесть ламбамнэть ды пек пейс педильть.
Неть курягатнень мейле лоподстилинзе лакавтозь ды экшендязь лиьма ведьсэ. Теде мейле куряга веденть педилизе педямкань пачк. Каиль те де лоподь веденть парькас эли битонс, ды путыль тозонь оргат аламнешка. Эли теевиль комоляведь оргатнень таркас.
Позанть якамганзо, парькась путовиль лембине таркас. Колмошка чинь ютазь эрзянь позась аноколь. Теде мейле позась ливтявиль экше таркас. Экшинесь седе тантей симемстэ. Кизна позась пек маштови салведень тейнеме.
Вана истя монень лецтявсь эрзянь позанть теемазо. Улема, мезеяк стувтынь?»
Эрюш Вежай. 2015 ие, сёксь. Самара ёнкс.
«Минек аламодо лиякс ульнесь…»
Тунда видильть сахоронь якстерькайть. Сёксня сынст таргилизь, ды шлямодо-урядамодо мейле путылизиь пиеме каштомс. Пидильть чугунсо. Мейле якстерькайтнень меркилизь-тапилизь ды човорилизь почт марто. Теде мейле тейсть сюкоркат, конатнень таго пуштасть кшнинь лопа лангсо каштомсо. Сюкоркатне минек ульнесть лемдязь «позакшить».
Кода теильть позанть? Позакшитнень путылизь флягас, покш каструляс, пештилизь лембе ведьсэ. Почодыльть сахор,путыльть оргинеть. Валскес позась теевиль ламбамокс, лангсонзо лексиль ашонь-тюжаня чов. Седе тов, шкань ютазь, позась теевиль чапамокс.
Ваканка копордат — паро теевиль. Судоткак кутстиль. Превтне налкесеме туильть, ёжоськак паролгадыль, лавшомиль. Авам свал одкстомиль ташто позадонть, кода сонсь мериль: «Одомиль»…
Путыль позакшине, почодыль сахор. Позась таго теевиль одокс. Эрьва чистэ позанть эзть тейне, тейнильть покшчис, лемень кундамос.
Позакшитнень анокстыльть ламо, сатыльть иень перть.Вишкинестэ порилинек позакшитнень, пек тантейть марявсть.
Кудряшов Виктор, Самара ёнкс.
Эрюш леляй, мон те мазыйстэ пурназь вейс сёрмадовксонть максыя Эрзянь Википедияс: Позась . Арсян а пек кармить мурнеме, кить сёрмадызь?
Паро. Ансяк тосо витевкст эряволь теемс, ды а содан, кода совамс витевксень тееме…