Кода икеле сёрмадокшнынек, Мамаевань Юлия, эрзянь тейтерькась, сайсь омбоце тарка весероссиянь олимпиадань пелькстамосо. Сон вадрясто эрзянь кельсэ теинзэ важодеманть. Течи, «Erzäks.ru» редакциясь максы кортамот сонзэ марто.
Erzyaks.ru: Ёвтнек эсеть эйстэ: косо чачить, эрят, тонавтнят?
Ш
умбрачи! Мон чачинь Мордовиянь Орданьбуе ёнксонь Ташто Орданьбуе – аволь покш велинесэ. Прядынь Орозбуень школа. Ней эрян Саран ошсо, тонавтнян Мордовской университетэнь филологиянь факультетсэ, уш 3-це курссо.
Erzyaks.ru: Косто тонь истямо вечкема эрзянь келентень?
Т
е кевкстеманть лангс а максан виде каршо вал, секс мекс монсь а содан , косто те вечкемась. Зярс ледстяса – эйкакшпингестэ саезь пек вечкса тиринь келенть. Мельспаросо кирдян мельсэ, кода ушодовикс класстнэсэ тонавтнинек аволь покшке стихть ды морынеть эрзянь кельсэ. Сестэяк уш марявсь – сынь кодат-бути алкуксонь, тиринь, ойментень малавикст, вечкевикст. Седе тов ловнынек седе покш жанрасо произведеният – ёвтнемат, романт . Те ловноманть-ванноманть марто кемекставкшнось те вечкемась эрзянь келентень. Покштояк покш сюкпря минек тонавтыцятненень – сынсткак лезксэст истямо покш – натой а ёвтави, зяро превть ды содамочить сынь миненек максть. Арсян, те вечкеманть монь мештес кадызе монь тиринь раськем, семиям, школасо тонавтнема иетне.
Erzyaks.ru: Коли ушодыть сёрмадомо? Ды мезе те ульнесь сех васенцесь? Лиякстомсь-арась сёрмадома лувось: васня валморот, ней сёрмадомат?
С
ёрмадомо ушодынь, эстень маряви, позда – 10-це классо. Те ульнесть валморот эрьва кодамо тематика лангс : пертьпелькстэ, тиринь ломанде, тиринь кудодо, вечкемадо, авадо, кемемадо, пелемадо. Арась, сёрмадомань лувось эзь полавтово. Сехте пек тень эстень вечкеви сёрмадомо валморот, шкань-шкань – прозасо миниатюрат ды прозасо валморот.
Erzyaks.ru: Мекс мелеть ульнесь тонавтнеме молемс филологиянь факультетс? Улить ламо лия важодемат, косо седе ламо ярмак пандыть?
А
лкукс, вельть ламо вадря профессият течи улить минек масторсо. Ансяк мон, малав, 10-це классто уш содылинь – молян тонавтнеме филфакс! Икелев ульнесть мелень молемс тонавтнеме медицинань факультетс эли психологокс. Мон свал вечкинь ламо ловномо, школасо сехте малавикс тонавтнема пельксэнь ульнесть кельтне (рузонь ды эрзянь) ды литературатне. Чарькодинь – монь таркам филологиянь факультетсэ! А зярдо ушодынь валморонь сёрмадомо, ёнксюткова (межрегиональной) олимпиадава ардтнеме, валморонь марто изнямо тосо – кемезевинь, аволь лавшосто ладсян, эряви седе тов касомс, тонавтнемс кельть, кастомс вийсэнь-ёроксчисэнь. Ярмакс лангс мон а ванан. Монень прявтось – тевесь улевель бу вечкевикс, кенярдовтыця, седей эждиця.
Erzyaks.ru: Кие теть лезды неень шкань содавикс ломантнеде тонь сёрмадома ёрокчисэть седе виевгавтомо (сёрмадейть, валморозейть, куляньсёрмадейть)?
П
окштояк покш лезкс монень ды весе лия од сёрмадыцятнень кандыть эрьва сёксень-тундонь Республикань Од Сёрмадыцянь Семинартнэ, конатнесэ аноксты Мордовиянь Сёрмадеень Вейсендявксось. Минек (эрзянь) секциянть марто важодить Н.И. Ишуткин ды Т.В. Разгуляева – вадря, лембе ойметне, содавикст сёрмадыцятне.
Неть семинартнэде башка минь «ВАЛ» сёрмадыцянь куронть марто пек сеедьстэ пурнавкшнотано «Сятко» журналонть редакциясо, ловнотано эсь валморот, ветятано седейшкава кортамот. Неть маней промкстнэнь кисэ сюкпря весе «Сятко» ковставксонтень, модас сюконямо – Люда Рябованень, Алина Подгорнованень ды Маша Ереминанень.
Erzyaks.ru: Мезе вечкат ловномо рузонь кельсэ, эрзянь кельсэ? Ки теть ульнесь, паряк ней палы киньневтиця тештекс ней сёрмадыцятнеде?
Л
овномо вечкан пек, ды ламо шка яван те тевентень. Рузонь вечкевикс сёрмадыцятне: Достоевской, Толстой, Бунин, Есенин, Бродский, Полозкова; эрзянсетнеде – Абрамов, Седойкин, Брыжинский, Моро, Кемаль, Арапов, Рябова, Еремина. Сехте вечкевикс валморозей – Александр Арапов. Сонзэ поэзиязо пек виев ды мазый кода рузонь, истя и эрзянь кельсэ. Весе валморонзо – домкат, сэтьметь, виев смусть марто, седейс токицят. Истя жо мон пек вечкса Алинань Подгорновань. Тейтеренть поэзиязо а ёвтавикс, темань ды образонь коряс вельть сюпав. Алина свал муи истят валт, конатне лиядыть оймесэ вельть куватьс.
Erzyaks.ru: Зняро кельть содат? Бажат содамо, эли тонавтомо седе лият?
З
ярс вадрясто содан кавто кельть : рузонь ды эрзянь, тонавтнян – англань. Покш мелем содамс сонзэ истя жо вадрясто, кода содасынь неть кавто кельтнень. Седе тов – кода лиси. Келень тонавтнемась – вельть вадря тевесь, кона тень туи мельс.
Erzyaks.ru: Кода арсят, эрзянь келень содамось мезе теть максь/максы? Ды эрзянь раськесь теть те мезе?
Э
рзянь келесь тень максы эрьва чистэ кодамо-бути вадря потмоёжо. Истя лембе-лембе потсон, зярдо марян эрзякс кортыця ломанть тесэ, ошсо. Тиринь келесь, тиринь раськесь тень – певтеме каштанчи ды сюпавчи, конань миненек, од ломантненень, весе вийсэ эряви ванстомс ды кепедстямс.
Erzyaks.ru: Ламо од ломанть прыть ве мельс мартот эрзянь кельденть ды раськенек эйстэ?
Н
еень шканень эрьва кодат ломанть сави вастомс. Эрьванть минек эйстэ ули эсензэ алкуксчизэ. Нама, улить истят ломанть, конат прыть монь марто келенть ды раськенть коряс кортамотнеде ве мельс. Сынь истя жо палыть-цитнить каштанчинек кисэ. Улить лияткак – сыненст допрок а чарькодеви – мезекс эряви эрзянь келесь, кинень сон эряви… Вадря – васенце куронь ломантнеде, монь койсэ, седе ламо – те пек кецявты! Кеман, вейсэ минь пачкодтяно сэрей текшос!
Erzyaks.ru: Кодат тонь икелев молиця мелеть сёрмадома ёрокчисэть, ды эрямосот?
В
адрясто прядомс тонавтнемам, муемс вадря важодема тарка, бути лиси – нолдамс валморонь пусмине, сёрмадомс седе тов ды свал кастомс содамочить.
Erzyaks.ru: Тонь мелеть ловныцятнень туртов.
М
аней, валдо мельть! Ламо вийть! Уцяскав чить! Вечкема ды уцяска!Тиринь раськеньды келень ванстома, каштанчинь сонзэ кис кирдема! Икелев молема!
кортнесь ПЕТРЯНЬ АНДЮ
«Erzäks.ru»
Невтевкс налткенть эряви максомонзо,
зярдо саят тестэ сёрмадовкснэнь.
Комментировать