Кода минь икеле сёрмадыне Мордовиясо прядовсь тееме васеньце художественной фильма эрзянь кельсэ. Аумок лись официальной трейлерэсь «Азор» фильманть. Те проекттэнть эйстэ Учеватонь Сантяй режиссёронть марто ловнодо «Erzäks.ru» порталонть редакциянть пельде.
? — Мезе корты «Азор» фильмань трейлерэнть лисемась?
«А
зор» трейлерэнть лисемась корты фильманть лангсо важодеманть прядовомадо, сексня невтемадо.
? — Мезе седе тов?
Н
ей минь пурнатано эрявикс коневтнень, конатне эрявить невтемань кис. Вешнетяно тарка, косо теемс невтеманть, вешнетяно лездыцят-партнерт. Маласо шкасто пурнатано пекстазь невтема-премьера. Кадык васенцекс фильманть вансызь тевсэ ды ярмаксо лездыцятне.
? — Мекс васенце эрзянь кельсэ художественной фильмань снимамос савсь вешемс лезэ ломантнень кедьстэ? Мекс эзть лезда Мордовиянь кирдивийтне?
К
инонь снимамо тевесь апак аравто минек ёно. Пек парсте сонзэ теить Якутиясо, Бурятиясо. Саемга, 2011 иестэ удмуртонь ломантне анокстызь «Узы-боры» фильманть. Ней кинотеатрасо удмуртонь кельсэ кинонь невтемась а маряви дивань тевекс.
Кода карминек арсеме «Азоронть», эстенекак тевесь марявсь а саевикс текшокс. Ламот эзть кеме: кавто ломантне эсь вийсэ снимить келей художественной фильма. Истямо минек Республикасо седе икелев арасель. Кемтяно, фильманть лисемадо мейле весе полавтови ды путыть питне минек тевентень.
? — Мезекс тонеть маряви те проектэнть лангсо важодемась? Кодамо тев тон топавтыть?
Э
рзянь кельсэ васенце фильма – те бажамонок, конанть минь тейтяно минсь. Мон — сценариенть сёрмадыцязо.
? — Ёвты тынк марто лездыцятнень. Мезе тейсь эрьвась?
В
иктор Чичайкин – режиссер-путыця ды Бакич Видяй лементь ало композитор – моронь-налксемань сёрмадыця. Эряви меремс, весе моротне сёрмадозельть фильмантень. 90 процентс важодемась прась мон ды Викторонь лангс. Сценариенть, режиссуранть, музыканть теемадо башка кавонек путынек снимамонть, кочксинек налксицятнень, теинек реквизит ды оршамот, вешнинек лездамо ярмаксо ды тевсэ, сюлмавкшнынек ломантнень, газетатнень, телевидениянть, культурань Министерстванть ды лия кирдивийтнень (чиновникнень) марто. Гайкстнинек ды яксинек эрьва кинень: содавикс ломанть, предпринимательть, организацият. Весе тевтне а ёвтневить…Вейке съёмкань чинтень аностамос тукшнось ковдо ламо шка.
Пек тешкставлинек Павел Михайловонь, раськень драмтеатрань артистэнть. Сон налксизе Азор прявт героенть. Снимамсто пек лездасть сонзэ актеронь содамочитне. Сон ульнесь тенек нежекс.
Съёмкатнень прядомадо мейле – студиясо важодемась: вайгелень сёрмадома, витнема-петнема (монтаж), компьютерэнь ды гайтень эффектт. Все теема ёнксось ульнесь Виктор Чичайкин лангсо. Ёвтаса: монголонь кортамонть минь сёрмадовтынек Китай Масторсо эриця монголтнэнь кедьстэ.
? — Мезе ульнесь сехте шожда, а мезе сехте стака снимамсто?
М
инь теинек тевенть раськень, тиринь келень, чачома-касмома масторонь вечкема марто стакачитне лангс апак вано.Теньсэ шождачись.
Стакачись – снимамо читненень анокстамось: кедъёнкстнэнь-реквизитннэнь теемась (мезе эсенек кедьсэ, ардтнинек лия ошов оршамо мельгаяк), таркань ды актеронь вешнемась, лишметь ды эрявикс техника (тракторт, экскаватор). Пеь чи ютавтынек налксицятнень оршавтома лангс, таркань анокстамо лангс. Седея стакаль телень якшамочитнестэ. Режиссерос ды сценариень теицясь ульнесть эрьва мезекс снимамсто. Сюконятано весе налксицятнененьгак: снимамсто лездасть эрьва мейсэ.
Ульнесь ярмаконь стакачитькак. Паро ломантне пурнасть миненек малав 90 тежат. Кинонь снимамс, содави те ярмакось аламо. Те лангс апак вант, те покш лезэ миненек. Тевесь аволь ансяк ярмаксо. Весе седейстэ ёвтатано сюкпря весенень. Сынст лемест кадовить историяс. Фильмань титратнесэ сёрмадынек весень, кинь лезэ марто лиссь эрзянь кельсэ васенце фильмась.
Кавто иес минь Виктор марто ютавтынек пек ламо ярмаконь, пряудемень, тевдеемань, потмоёжонь вийть.
? — Мезе ланга фильмась? Кодамо сюжетэзэ?
12
37 ие. Эрзянь модатне лангс сась апаро – монголонь ушмот. Прявт персонажось, Азор од цёрась, вирьга якамсто эшкеви монголтнэс. Сонзэ кундасызь ды сюлмсесызь. Монголтнэ мерить важодемс сынст лангс, ансяк цёрась а мисы тиринь масторонть, раськенть. Сон оргоди полонсто, ансяк ятонь налось сасасы апелицянть. Верь потсо, вийтеме, пеень сускозь Азор пачкоди тиринь велес. Пачкодемстэ неи ансяк пултазь кудот ды чавозь ломанть Сон ёмавтынзе весе малавиксэнзэ.
Пельскулозь цёранть мусы ды кандсы эстензэ ведунава, таргасы тоначистэ. Тиринь масторонть идемадо мелесь кармавты молеме цёранть Пургаз инязоронть ды сонзэ ушмотнень (войскатнень) вешнеме. Ютамсто сон эшкеви Пургазонь ды сисем буень прявтнэс. Азорнэнь максыть Ине тев, конанть эйстэ карми аштеме эрзянь раськенть эрямозо. Эрямонь стакачитнень, апаротнень, яттнэнь лангс апак вант цёрась лияды азорокс эсензэ ойментень ды превтненень.
? — Кодат проектэнть путовксонзо?
М
инек прявт путовксось – тиринь келень ды культурань, кинематографонь кастомась. Шкань ютазь лисест кинотеатрасо седе ламо-ламо фильмат эрзянь кельсэ. Мельспаросо минь карматано кецтнеме ды лездамо мейсэяк истят рузонь, мокшонь, татаронь ды лия кельсэ проектнэненьгак. Эсенек теезь студиянть минь лемдинек «Paro Production». Эрьва раськентень тиринь келесь – те Ине вечкема. Кодамо ёжо раськетне путыть мель шабра раськень келентень, тень коряс содави сынст ютксо ялгаксчись.
? — Мекс кинось (налксемань, документэнь, раськень) кодаяк апак невте эрзянь кельсэ? Мейсэ тувталось? Кода кастомс-кепетемс те ёнксонть?
М
онень маряви, те невти раськеёжонть. Ламо ней кортамот тиринь масторонь вечкемадо. Кеман, тиринь масторонь вечкемась а эрси чачома таркань, тиринь келень вечкмавтомо.
Эряви тейнеемс школасо ды университетсэ тонавтницятнень ютксо видеороликень, фильмань пелькстамот. Бути кортамс минек студиядонть, минь арсетяно теемс невтемат, неть ярмактнень лангс рамамс аппаратура (камерат, квадрокоптерт) ды седе тов снимамс фильмат.
? — Зярдо карми премьерась? Косо? Мезе седее тов карми фильманть марто?
М
аласо читнестэ пурнатано пекстазь невтема. Тов тердьсынек весе лездыцянок.
Ней анокстатано конёвт кинотеатратнесэ-клубнесэ невтемас. Теде башка, арсетяно ютавтомс фильманть финнэнь-угрань раськетнень ды лия кельтнес. Финляндиясо ды Эстониясо ломатнененьгак вечкевсь минек тевесь, кортнетяно мартост, мезеяк ды лиси.
Учотано весень премьерас!
«Азор» — Официальной трейлер (HD)
Кода тейсть фильманть Орданьбуень Баеньбуесэ.
Кортась ПЕТРЯНЬ АНДЮ
Портал «Erzäks.ru»
Невтевкс налткенть эряви максомонзо,
зярдо саят тестэ сёрмадовкснэнь.
Последние комментарии