Ульяновск ошсо ютась Эрзянь ды мокшонь од ломанень васенце форум. Тей тердевсть ламо инжеть. Сакшность эсест областьстэ, Мордовиясто ды Московсто. Те покш промксонть пурнызе-арсизе Ульяновской областень Эрзя-мокшонь национально-культурной автономиясь губернаторонть С.И.Морозовонь лезксэнзэ вельде.
«Гражданское общество и государственная национальная политика в Ульяновской области на 2014-2018 годы» госпрограмманть вельде явовсть ярмакт.
Пурнамс Весероссиянь эрзянь ды мокшонь од ломанень промкс, теде кортамось мольсь мелят, Эрзя-мокшонь раськень инекужосонть. Ёвтазель натой шкась – кизна, август ковсто. Ансяк мекс-бути тевесь эзь лисе. А вана шабра ёнксось, Ульяновскоень областесь, эзь пелезеве, изнясть грант ды пурнасть форум эсест кедьсэ. Кода ютась областень васенце промксось?
Весе учость Ульяновск ёнксонь губернаторонть С.И.Морозовонь форумов самонзо. Се чистэнть региононь прявтось тукшнось Чехияв. Секскак сонзэ таркас минек эйсэ Правительствасо вастсь Ульяновск ошонь Администрациянь прявтонь полавтыцясь С.В.Паховский. Вастовомантень сакшность Симбирской ды Новоспасской Митрополитэсь Анастасий, Эрзянь ды мокшонь раськень Регионъютконь общественной вейсэндявксонь исполкомонь прявтось А.С. Лузгин, Равчирень финнэнь-угрань раськень культурань куншкакуронь прявтось Р.И.Акашкина, Ульяновск ёнксонь эрьва кодамо раськень национально-культурной автономиянь прявттнэ ды ламо лия инжеть.
Весе пурнавозтне кортасть од ломантнеде. Кода сынст тонавтомс, пачтямс тенст эсест ундокстнэде, койтнеде-кирдатнеде, культурадонть, содавлизь тиринь келест, улевель раськень ёжост. «Эряви вишка шкасто саезь кортамс эйкакшонть марто тиринь кельсэ, ёвтнемс эсь раськеде», – мерсь Анастасий владыкась.
– Сюкпря ёвтан тынк губернаторонтень С.И. Морозовнень, весе сетненень, кить пурнызь форумонть – национальной политиканть туртов мелень явоманть кисэ. Истят промкст эряви ютавтнемс. Сынь кандыть лезэ. Россиясь – ламо раськень мастор. Эрзятне ды мокшотне ульнесть сетнень ютксо, кить тейсть государственностенть. Мон комсь иень перть ардтнян тынк ёнксов. Ды вана мезе меревлинь: меельце иетнестэ ламо изнявкст теиде экономикасо, авиа- ды автомобилестроениясо. Теке жо шкане тейтядо весементь эрьва кодамо раськень ломантнень пряст парсте марямга. Тынк ошсо ули кеврунго чувашонь просветителентень И.Яковлевнень, минек содавикс скульпторонтень С.Эрьзянень. Эрьва иестэ Ташто Бесовка велесэ тешкстатадо эрзянь букварень васенце сёрмадыцянть А.Юртовонь чачома чинзэ. Улить школанк, косо ветяви эрзянь келесь. Содазь, минек раськенть, нама, улить ламо стакачинзэяк. Васняяк, те, эрзятнень ды мокшотнень срадомась, аволь вейке таркасо эрямось, рузыямось. Бути раськесь эряволь вейсэ, паряк, весемесь улевель лиякс, – кортась А.С.Лузгин.
– Минек губернаторось, видьстэ меремс, яви покш мель раськень политикантень. Те тевсэнть ды лиясояк тонавтнетяно тынк, Мордовиянть пельде, – мерсь С.В.Паховский.
С
еде тов вал сайнесь Ульяновск ёнксонь Эрзя-мокшонь автономиянь васенце пурныцясь Михаил Иванович Крымкин:
– Минек автономиясь ушодызе кинзэ 1999 иестэ саезь. Эряви меремс, чаво таркасто. Сеске сынек мельс – эряви панжомс автономиянь отделеният областень районтнэсэ. Сестэ малав косояк эзь ветяво тиринь келесь. Арсинек ютавтомс областень эрзя-мокшонь кенярксчить, эйкакшонь фестивальть. Сестэ ламо лездась тенек областень Администрациясь. Покш кевкстемакс аштесь тиринь кельтнень тонавтомась, койтнень-кирдатнень вельмевтемась ды ванстомась. Те тевсэнть миненек лездасть татаронь ды чувашонь автономиятне. Минь эрьва чистэ вастневинек, кортынек вейсэнь мелявкстнэде ды тевтнеде. Седеяк покш сюкпря ёвтавлинь Мордовиянтень: культурань ды национальной политикань министерстватненень. Сестэ тосо важодсть П.Н.Тултаев, А.С.Лузгин. Сынь лездасть миненек книгасо, литературасо, стасть фольклоронь коллективтненень костюмт. Пек кецявтымим течинь форумось, ков пурнавсть кортамо тевде од ломантне. Тенень минь бажинек свал: одтнэ явовольть мель культурантень, койтненень-кирдатненень.
Саранскоень 26№ лицеень тонавтыцясь А.А.Данильчев ёвтнесь ошонь школасо келень ветямодонть.
Те форумсонть яволявтозель: Ульяновск ёнксонь Эрзянь ды мокшонь национально-культурной автономиясь панжи эсензэ юрсо од ломанень вейсэндявкс. Сынь кармить топавтомо истят жо тевть, кода автономиясь, – кармить весемесэ лездамо, панжить истят жо курот районтнэва. Прявтокс ладязь А.А.Ростовцев.
К
ода молить тевтне областьсэнть ней?
Ульяновск ёнксонь 32 школасо ветяви тиринь келесь, конань тонавтнить малав 1100 эйкакшт. Эйкакштне сеедьстэ сакшныть келень коряс олимпиадав Саранскоев, саить изнямонь таркат.
Тесэ государстванть лезксэнзэ вельде нолдави «Ялгат» мазый тюссо эрзя-мокшонь газетась, кона лисни ковозонзо кавксть. Ламо иень перть Кузоватовабуень Кивать велесэ ютавтови «Масторавань морот» раськень творчествань фестивалесь. Сонзэ туртов веленть вакссо стявтозь башка тарка. Ломантне ловить фестиваленть алкуксонь покшчикс.
Ней кемекстазь «Шумбрат» эрзя-мокшонь кенярксчись, кона эрси Ульяновск ошсо. Неть покшчитнес свал сакшны губернаторось С.И.Морозов. Автономиянь прявтокс аволь умок ладязь Владимир Анатольевич Софонов эрзянь ломанесь.
* * *
Кругловой стольсэнть кортасть ламот, кепедевсть эрьва кодат кевкстемат. Тешкстазель, областьсэнть пек а сатныть культурасо национальной кадратне. Теде мейле весе пурнавсть В.И.Ленинэнь лемсэ областень научной библиотекас. Зярыя морот морась Инзабуень Оськина велень «Лейне» эйкакшонь фольклорной коллективесь. Сонзэ ветицязо А.А.Смолкина.
Инжетне явовсть зярыя курова. Программань коряс арсевсть ютавтомс эрьва кодат мастер-класст. Истя, А.А.Данильчев ды О.М.Богданова ютавтсть эрзянь келень урок. Ольга Михайловна сась форумонтень Тольяттистэ. Сон иень перть ветясь эрзянь келень курсат Эрзя-мокшонь культурань куншкакуросо. Ней тонавты ломантнень скайп вельде. Мокшонь урок ветясь А.И.Ануфриева, сон важоди Саранскоень 33№ школасо.
4№ лицеень воспитательной тевтнень коряс прявтонь полавтыцясь А.А.Учеваткин ёвтнесь пурнавозтненень минек музыкадонть, раськень моротнеде, «Торама» фольклорной ансамблядонть. Ламо пачтясь коллективень пурныцядонть, содавикс музыканттонть Владимир Ромашкиндэ, конанень сы иестэ топодевельть 65 иеть.
Чувтосто керсемань коряс мастер-класс ютавтсь Россиянь народной мастерэсь П.В.Рябов. Сон таргинзе ламо теевксэнзэ, невтсь, кода важодемс чувтонть марто. Ёвтнесь Вирь ало Тавласо эриця кедьчелькевтнеде, кодамо покш выставкасо невтневсть сынст керсевкстнэ.
Раськень киштемань коряс мастер-класс ютавтсь Н.П.Огарёв лемсэ ИНК-нь старшей преподавателесь Л.А.Березина.
Теде мейле весень туртов Бакич Видяй эрзянь морыцясь казсь концерт.
Т.МАТОРКИНА ©Портал «Erzäks.ru»-те
Фототнень кисэ сюкпря Ульяновск ёнксонь Эрзя-мокшонь национально-культурной автономиянтень
Невтевкс налткенть эряви максомонзо,
зярдо саят тестэ максозь сёрмадовкснэнь.
Комментировать