Якшамковонь 14-це чистэ «Саран ошонь культурань кудо» МБУК-со ютась «Мерема» Раськень морамо куронть этнографиянь невтевксэзэ.
Сонзэ эйс совасть Мордовия Республикань (Отяжелень, Кочкурвелень, Зубово-Полянань, Инсаронь, Ковылкинань буетне) ды Пенза (Сосновоборонь, Городищань буетне) ёнксонь раськень эрьва кодат кедьёнкст ды оршамопельть. Весе невтезесь пурназель «Меремань» этнографиянь экспедициятнесэ.
«М
инек морамонь курось теезель 2010-це иестэ, – ёвтни «Меремань» прявтось Екатерина Модина. – Неень шкас минь морынек ламо велетнесэ, косо эрить эрзятне ды мокшотне. Теке марто ушодынек пурнамо седикелень эрьва кодат кедьёнкст, оршамопельть. Течи минек юты васенце покш невтеманок. Невттяно весементь, мезе пурнынек кавто меельце иетнень перть. Прявт тевенек – содавтомс минек ошонь эрицятнень эрзятнень ды мокшотнень оршамопелест ды кедьёнксост марто».
Невтевксэнек ваномо пурнавсть ламо сыцят. Сынст ютксо ульнесь 18-це школань, 19-це гимназиянь ды Мордовия Республикань эйкакшонь музыкальной школань-интернатонь тонавтницятне. Теде башка весе сыцятне теевсть содавиксэкс чувтосто керсемань налкшкетнень марто, конатнень невтизь «Эрьмезь» вейсэндявксонь 12 кедьчелькевтне. Невтевсть керьстэ теевкстнэяк.
Лембе вал марто рузонь, эрзянь ды мокшонь кельсэ весенень пшкадсь «Саран ошонь культурань кудо» МБУК-онь прявтось Александр Иванов. Сон тешкстызе: те невтевксэсь пек эряви эйкаштнэнь туртов ды карми кастомо сынст эйсэ вечкема тесэнь эриця кавто малавикс раськетненень. Пси шумбрат-парт ды сюконямонь валт весень туртов ёвтасть «Мерема» Раськень морамо куронь прявтось Екатерина Модина, «Эрьмезь» Вирь Ало Тавлань чувтосто керсемань вейсэндявксонь прявтось Калаганонь Керяз (Пётр Рябов), раськетнень ютксо сюлмавоматнень кевкстематнень коряс куронь прявтось Елена Щукина, Мордовия Республикань Теевксэнь коряс (Заслуженной) важодицясь, Мордовия Республикань Артыцянь вейсэндявксонь прявтось Александр Занкин, «Морамо» эрзянь кезэрень моронь морамо куронь прявтось Геннадий Дулкин.
Невтевксэсь карми молеме якшамковонь 26-це чис.
Зинёронь Сантяй,
Саран ош
***«Мерема» раськень морамо курось теезь 2010-це иень таштамковсто. Прявт тевекс ловови раськень койтнень вельмевтемась ды невтемась. Прявтось – Екатерина Модина, прядсь А. А. Архангельскоень лемсэ Пензань музыкань училища, Н. П. Огарёвонь лемсэ университет. Теде башка сон Н. П. Огарёв лемсэ университетсэ Раськень культурань институтонь раськень музыкань кафедрань тонавтыця, регионъютконь ды раськеютконь моротнень пелькстамотнесэ изниця. Сонзэ курозо изнякшнось ламо пелькстамотнесэ Сарансо, Пензасо, Набережной Челнасо, Самарасо, Саратовсо, Ижевскойсэ, Омскойсэ, Сочисэ, Ало ошсо ды лия оштнэсэ, Эстониясо, Суомисэ ды Австриясо. «Меремась» изнясь раськеютконь казнень максомась пелькстамосояк (Эстония). Сон морси эрьва кодат покшчитнесэ: «Ошонь чи», «Мастя», «Изнямонь чи», «Содамочинь чи», «Медень чи», «Од ие» ды седе тов.
«Эрзянь Мастор»
©Портал «Erzäks.ru»
Невтевкс налткенть эряви максомонзо,
зярдо саят тестэ максозь сёрмадовкснэнь.
Комментировать