Умарьковонь 5-це чистэ А.С. Пушкин лемсэ библиотекасо, Саран ошсо ютась покшчи. Сон алтазель «Масторава» эпосонть печатьс лисемасто 20 иетнень ды «Масторава» вейсэндявксонтень 25 иень топодемантень. Ломанть сакшность ламо, эрьва косто ды эрьва кодамо раськень. «Масторава» эпосонть (морокерьксэнть) пурныцязо-теицязо А.М. Шаронов ёвтнесь стакачитнеде, конатнень вастынзе те ине книганть нолдамсто ды конатне те шкас яла а прядовить, пшкадсь седейшкавань сюконямо марто сетненень, кить лездасть «Масторавантень» улемс эриекс. Истят ломантнеде ламольть, ды сынь, А.М.Шароновонь валсо кортазь, лиядыть историяс.
Ушодызе покшчинть «Торамась». Сонзэ «Тюштянзо» эрзятне свал кунсолыть стядо.
А.М. Шаронов.
В.И. Дёмин: «Ламот снартнесть икелеяк теемс эрзянь эпос, ансяк А.М. Шароновдо башка киньгак тевезэ эзь лисе».
А. Гадаев: «Аволь весе раськетнень ули эпосост…Сон эрямосонть а эрсияк, теемганзо эряви ломань. Эряви поэт. Эпоссонть невтема пелькстамо, ятт. Содави, те а лади политкорректностень лувонтень, ансяк яттомо эпос а лиси… «Мастораванть» лувозо-фольклоронь, рунгозо-лангозо — авторонь… «Масторавасо» ломанесь кавтолды: эйсэнзэ тюрить парось ды берянесь, ды кие эйстэст лиси изницякс — а содави».
Г.Д. Мусалёв: «Прявттнэнь авидечист пек покорды эрзятнень…»Масторавась» — менельсэ теште, кона невти, кодамо таркасо аштить эрзятне масторлансонть.»
Р.С. Кемайкина: «Мон сонензэ истя мериньгак: «Шаронов, ней куш вейкеяк вал иля сёрмадо: тон теить ИНЕ произведения!»
Комментировать