Эйзюрковонь 21-це чистэ Дубёнкань буень Кенде велесэ ютавтозель покшчи, кона алтазель эрзянь сёрмадыцянтень Александр Сергеевич Щегловнень 100 иень топодемантень.
Сё
рмадыцянть лемензэ кундамо Саранскойстэ сакшность Г.С. Гребенцов, М.Н. Салаева,Н.И. Ишуткин, В.Б. Бояркина ды «Сяктонть» пельде — А. Подгорнова. Лездасть ютавтомасо Дубёнкань Культурань кудосо важодицятне, Кенде велень прявтось Е.Н. Салаева ды те веленть школасо важдоицятне-тонавтницятне.
«Сятконть» туртов А.С. Щеглов ульнесь аволь ве ёндонь ломанекс: сон ниле иень перть важодсь сонзэ прявт редакторокс. Ды аволь ансяк тень кис минек журналось явсь ды яви сонензэ мель. Александр Сергеевичень ёвтнеманзо, очеркензэ, повестензэ, романозо — те минек литературантень пек питней путовкс, сюпавчи.
Кенде велень эрицятнеяк аштить каштанчисэ сынст велень истямо ёроков ды содавикс ломаненть кувалма. Кадык яла аламолгадыть сеть, кить содылизь сонзэ, шкинеманзо вельде сон малавикс натой школасо тонавтницятненень, конат паро мельсэ ловность сонзэ стихензэ, путсть сцена лангсо налксеманзо. Ды редявсь: эйкакштне тейсть тень аволь секс, мекс эрявсь — секс, мекс те алкукс тенст вечкевсь.
Покшчинть анокстыцятне мукшнызь натой радиосо А.С.Щегловонь кортамонзо! Минь маринек вайгелензэ, сон мерят ульнесь тосо, минек ютксо.
Мельс пек тусть покшчинть ветицятнеяк. Сынь кортасть мазый, ванькс эрзянь кельсэ, вайгелест гайтевть, кеметь, кунсолат-кунсоловлить. Лиснесь морамо Кенде велень «Эрзянка» ансамбляськак. Сонзэ теицянзо-пурныцянзо ютксо ульнесь А.С. Щегловгак, секс аватне ловить сонзэ седеяк малавикс ломанекс. Сынь, неень «Эрзянкасо» морыцятне, састь те морокуронтень аваст-патяст таркас кода раськень тевень поладыцят. Ды поладыть, эряви меремс, вадрясто!
Кортасть Саранскоень инжетнеяк. Ды эрьвась мусь лембе вал А.С. Щегловонь ледстямга, эрьвась путсь тензэ питне. Велень ломантне, конат сакшность велень Культурань кудонтень, марявсь, бажасть а менстямс вейкеяк вал — истя седейшкава кунсолость.
Вадрят Кенде велень ломантне. Весемева вадрят. Вастымизь кши-сал, эрзянь гайтев моро марто, туемстэнек ёвтасть сюкпрят сень кисэ, мекс минь истя парсте ды ваньксстэ кортатано эрзякс. Улема, сась шка, зярдо эрзятненень тень кисэяк вейке омбоце икеле сюконяма. Ломантне кемить: «Сятко» журналось седе товгак карми эждеме ловныцятнень седеест. Миньгак кемтяно.
Истя вана кундынек А.С.Щегловонь лемензэ.
Алина ПОДГОРНОВА
«Сятко» курось
©Портал «Erzäks.ru»
Невтевкс налткенть эряви максомонзо,
зярдо саят тестэ сёрмадовкснэнь.
Комментировать