Ялгат, путодо, инескеть, питне Ольга Богданова(Сусоревань) валморотнень туртов. Сон Казнес ванкшновиця сёрмадей «Руця» эрзянь Лезэпаргонть 2016 иень «Эрзянь Ойме» эрзянь сёрмадома шкинемань Казнень максомантень сёрмадовкссо.
О
льга Богданова чачсь 1982-це иень аштемковонь 25-це чистэ Дубёнка ёнксонь Поводелесэ. Прядызе Н.П. Огарёв лемсэ МГУ-нь филологиянь факультетэнь эрзянь отделениянть, аспирантуранть. Важоди Тольятти ошонь Мордовской культурань центрасо.
Сёрмады ёвтнемат, миниатюрат. Лиссь «Ваномс верев» ёвтнемань пусмозо (2008). Мордовия Республикань Прявтонь од сёрмадыцятнень туртов литературной премиянь лауреат (2009).
ЭРЗЯНЬ МОРОНТЕНЬ АЛТАВИ…
Вай, косто истямо орамаменькс качады,
Вай, косто седей ёжомарямо сравтови?
Вай, косто истямо мазый валт ливтить,
Вай, косто истямо оймень чамдома кайсети?
Те а вирь увны, а варма вешки,
Те а ломань корты, а ракша урны.
Вай, истя монь мазый эрзянь морось качады,
Вай, истя, монь корьминецем вайгелензэ нолды.
Вай, кодамо сэрей те вайгеленть моцезэ,
Вай, кодамо келей те моравксонть виезэ.
Вай, кода кенярды эрзянь морось олянтень,
Вай, кода киштезевсь эрзянь оймем коштонтень.
Вай, кувать-кувать кирдизь пиштяканть
Сэрей кенкштнень удало.
Вай, кувать-кувать учось майсицясь
Олякстома шканть танстензэ.
Сон коштонть марто велясь-чаразевсь,
Ломаненть лексеманзо марто метелкут мерезевсь.
Чиии-чии сон, эрзянь мором, коштованть,
Тапи-лотки сон, эрзянь оймем, модаванть.
Паксява ютась, эрзянь мором, эрькева,
Лугава сравтовсь, эрзянь оймем, велева.
Чинтень кенярдсь сон, варманть кутькизе,
Луганть шнызе сон, ведьсэнть экшэлясь.
Вай, варма, варма, иляк тандавто эрзянь моронь оймензэ,
Вай, давал, давол иля кежиявт корминецьнем моравксонть.
Кадык морозо мастор мештеванть сравтови,
Кадык оймезэ моданть потмаксокс пештясы.
Кадык морозо коштонть марто налксеви,
Кадык оймезэ чинть марто шумбракстни.
Вай, тусто вирь, тон сэрей вирьаля,
Иля каштангале монь эрзянь мором икеле.
Ульть пиштякантень аволь пирявксокс – валаня кумбокс,
Ливтязо корминецем лангат, теке нимиляв.
Вай, мазый килей, тон тейтерьчама,
Вастык монь эрзянь мором киулосто,
Ульть пиштякантень аволь пирявкокс — оймамо таркакс,
Нурсик тон, килей, монь корминецем эсеть тарадсот,
Сон оймси-теи, вийть пурны, седе тов ношксты.
Вай, кирмалавт, кирмалавт, лугань-паксянь азорт,
Илядо педя эрзянь моронтень, монь пиштякантень,
Кинзэ лангсто шаштодо, икелензэ комадо.
Вай, мазыйка-чи, тон эрямо чансть,
Весемеде содат, веседе марят,
Лездак тон, ялгай, эрзянь моронтень,
Иляк пиде тон эсь налтсот сонзэ ойменть,
Иляк кирта тон эсь псисэть сонзэ моронть.
Ульть пиштякантень лездыця авакс,
Ветяк валдосот сонзэ седе тов.
Марязо моронзо весе ломантне,
Шназо моравксонть пертьпельксэнь виесь.
Вай, чамдык, чамдык, эрзянь мором эсь ойметь,
Чамдык потмакска, валык мезе ульсь.
Вай, сравтык, ставтык, эрзянь оймем эсеть моравксот,
Сравтык, иля виздть, сравтык иля пель.
Тонеть те оля чинть Пазом максызе,
Мастор теицясь тонеть казизе,
Кенкштнень панжинзе ды кинть невтизе.
Ливтязо монь эрзянь мором васов-васов,
Сравтовозо гайгезэ верев-верев,
Кецявтозо седееть тонь ды монь….
Uralistica.com-сто саезь ©Портал «Erzäks.ru»
Невтевкс налткенть эряви максомонзо,
зярдо саят тестэ максозь сёрмадовкснэнь.
Комментировать