Кода эрзятне эрьва-кодамо ёнкстнева анокстыть Эрзянь келень Чинтень? Ледстясынек, сон ютавтови чадыковонь 16-це чистэнть. Течи кортамось моли «Руця» эрзянь Лезэпаргонть тевензэ.
«Р
уця» эрзянь Лезэпаргось теи эрзянь кудоютконь улипаронь невтема «Ламораськень Мурманось» невтельмасонть, кона панжови Мурман ошсо эйзюрковонь ветеце чистэнть. Кармить невтевеме ломанень сельме икелев эрзянь оршамот: руця, панар, пулай, каркс, эрзянь коень кечесь, эрзянь салдырькст, пеельть, седямо нудейть, чувтосто керсевкст, карми невтезь эрзянь раськекоцтось, эрзянь ковкерьксэсь ды эрзянь ванмот-фотот. Ули башка сёрмадкс пусмо, косо ёвлеви Эрзянь раськеденек. Невтемась карми молеме Эрзянь келень Чинть видьс ды алтави курок сыця Эрзянь келень Чинтень.
Саинк мельс, лия ёнксонь эрзят, эрзянь невтемась юты ЭРЗЯНЬ раськекоцт ало. Юты кода ЭРЗЯНЬ РАСЬКЕНЬ невтема, аволь «мордва»-нь. Мурман ёнкссо вейкеяк кирдивиень ломань тень каршо а моли, ды а карды, ды а полавты ЭРЗЯ валонть «мордва» валсо. Секскак минек эрзянь раськекоцтось те невтельмасонть невтезь вейкеть правасо лия раськень раськекоцтнэнь ютксо. Сон панжадо ды парсте неяви весе лия раськень ломантненень. Минек те невтевксэсь невти весе эрзятнененень: кинь ули мелезэ невтемс Эрзянь раськенть виде-паро мазый Эрзя лемензэ, се теияк истя, кие пели невтемензэ – се тейни «мордовской выставкат», аволь ЭРЗЯНЬ НЕВТЕМАТ. Эрзятненень а виськс улемс ЭРЗЯКС. Сестэ кияк а вийсэ, а маньчемасо а кармавттадызь полавтомонзо леменк. Эрьва косо тенек эряви улемс ЭРЗЯКС. Минь а лемдятано те невтеманть «этноневтема». Минь панжадо эйсэнзэ лемдятано ЭРЗЯНЬ НЕВТЕМА. Сон аволь покш. Ды эрзянь. Теньсэ – ине питнезэ. Кода ине Стёпан Эрьзя саизе минек раськенть лемензэ эстензэ, ды невтизе Эрзя лементь Модамасторонь келес, истя миньгак, лангозонзо ванозь, меринек: — Минь карматано улеме те невтельмасонть кода Эрзянь раське.
«Руця» эрзянь Лезэпаргось
2016 ие, даволков, 26 чи.
©Портал «Erzäks.ru»
Невтевкс налткенть эряви максомонзо,
зярдо саят тестэ сёрмадовкснэнь.
Комментировать