«Ugrin Paikka» финнэнь-угрань шкинемань куншкатаркасо, конась ашти Финляндиянь Сиппула мазый пек таркасо, ютасть чувто ланга керсемань мастер-класст. Кавто чинь перть керсемасо эсь ёроков тевест невтсть «Эрьмезь» вейсэндявксонь мастертнэ-керсицятне Пётр ды Александр Рябовтне.
«Э
рьмезь» вейсэндявксонь весе керсицятнень ютазь иетнестэ ульнесть пек ламо выставкат ды керсемань семинарт Россиянь истят оштнэсэ, кода: Пенза, С.Петербург, Москва, Ульяновск, Лукоянов. Ней вана ульнесь мель невтемс эрзянь культуранть лия таркатнева. Эстониядо башка, аволь умок Тавлань налшкетне невтезельть Суоми масторсо. «Ugrin Paikka» финно-угрань культурань центрань прявтось Э.Хакимов тердимизь эрзянь традиционной Тавлань налкшкень выставкань тееме ды суоминь эрицятненень мастер-классонь невтеме. Тень кисэ ульнесь теезь программа весенень, кинь ульнесь мелезэ невтемс эзь ёрокчинть керсемасо ды варчнемс теемс керсевкст Тавлань пластиканть коряс.
«U
grin Paikka» финнэнь-угрань культурань кудосонть пурназель выставка. Тесэ невтевсть кода творческой керсевкст – «Вирява», «Пангонь шка», «Калонь кундыця», «Паксянь чи», истя жо тавлань лишметь, салдырькст, кудонь кирдийть ды эрьва кодат вешкемат. Покш экран лангсо ульнесь невтезь презентация «Эрьмезь» вейсэндявксонь мастертнэнь коряс. Те куронь прявтось П.В.Рябов домкасто ёвтнесь мастертнэнь тевдест, эрзянь культурадонть. Финнтнэнь-азортнэнь ульнесть ламо кевкстемаст весе керсицятнень коряс ды покш мелест чарькодемс тешкстнэнь смустест. Сынст марто кортамсто, ледстневсть минек «Масторава» ды сынст «Калевала» эпосонь персонажтнэ. Неть кортамотнесэ ламо шка эрявсь максомс финнэнь кельс ютавтомантень, сюкпря ёвтама те покш тевсэнть лездамонтень кудонь прявтонть цёранзо туртов – Ильяснэнь.
Весе пурнавозтненень Тавлань налшкенть теемс ульнесть анокстазь чувтонь ламо формат, керсемань кедьёнкст. Эрьвантень эрявсь теемс лишме ды тутушкине-вешкема. Минек пек дивавтымизь, зярдо финнэнь-угрань культурань кудосонть пурнавсть керсеме эрьва кодамо иень финнтнэ. Вейке сыре авась истя жо эрязасто ушодсь керсеме лишменть. Вете часонь ютазь весень марто вейсэ ульнесть теезь керсевксэст. Эрьвась кенерсь теемс эстензэ лишме ды вешкема, конатнень сынь саизь мартост.
Минек Вирь Тавлав сакшность пек ламо инжеть эрьва кодамо омбо масторсто, истя жо Суоми мастороньгак. Керсемадо мейле вейке авась витькстась, сон ульнесь минек велесэ ламо иеде икеле, неекшнынзе истят чувтонь налшкетнень. Мейле натой морась «Кавто цёрат тикше ледить» моросто саевкс.
«Ugrin Paikka» финнэнь-угрань культурань кудосонть улемстэ миньгак теинек «Кезэрень ушман» керсевкс ды кадынек теске казнекс, сон карми невтеме эрзянь культуранть.
Кавто чинь перть паро мельсэ Суоми масторсо ютасть чувто ланга керсемань мастер-класстнэ. Путозь покш питне те тевентень. Минь васенцеде ульнинек финнтнэнь кедьсэ, косо невтезель «Эрьмезь» вейсэндявксонь керсицятнень налшкетне. Кемтяно, минек ды финнтнэнь ютксо кемекставить культурань виев сюлмот.
А.Рябов, Саранскоень 4№ эйкакшонь артонь школань тонавтыця,
Россиянь артыцянь Союзонь член
«Эрзянь правда» курось
©Портал «Erzäks.ru»
Невтевкс налткенть эряви максомонзо,
зярдо саят тестэ сёрмадовкснэнь.
Комментировать