Кавто иеть ютасть, кода Бакич Видяй (Виктор Чичайкин) ды мон (Учеваткин Сантяй) паро ладсо арсезевинек васенце эрзянь кинонь снимамо ланга. Мейле аламодо арсемась матрась: эрьвась важодсь эрьвачинь тевсэ.
20
15 иень сёксень ушодовомсто Бакич Видяй тагояк кирвазтизе эсь потсо те меленть, кирвазтизе монь, Учеваткин Сантяень потсояк. Меленек прась Пургазонь шкатне лангс. Савсь (пейдян) кундамс сёрмадомо алкуксонь, мельстуиця эрзянь сценарий. Ды кода а сёрмадомс, зярдо кунсолынь фильмантень сёрмадозь моротнень-музыкатнень? Ковонь перть прясо чарасть эрьва кодат арсемат, удомась ёмась… Те шкане Видяй анокстась тевентень: налт, налчиркеть, умоконь пеельть. Весе эсензэ кедьсэ. Карминек пурнамо оршамотненьгак, мезенть кармавтынек стамс эсенек ярмакто стыця ломанентень.
Ацамков… Шкась мольсь… Видяй яла гайгстнесь монень, кевкстнесь, ризнэсь, педсесь сценариенть коряс. Монь пельде седе ламо алтамот, арсемат, сценариенть пезэ, мезть сёпомс ушодксозояк, яла эзть неяво. Ансяк пря потсо чарасть-велясть эрьва кодат сценат.
Ацамковоськак прядовома лангсо. Сценариень пелькст-пелкст чачсть коневсояк. Икеле Од иень оймсема чить. Ней кеман – сёрмадса!
Велесэ оймсема читнестэ тагояк эзь муеве шка: вишка цёрам, ни… Мезе-бути потсо а ёвтавикс эсэнь яла кармавтсь муемс шка ды вийть. Сеске а евтави мезе. Удомась седеяк ёмась… Чокшне ланга, зярдо весе матедевильть, панжовиль арсимашинась (компьютерэсь), пилес путовильть эрзянь моротне ды ушодовиль важодема. Марявсь, теке туилинь мода лангсо ков-бути лияв. Истя оймсема чинь перть, зярдо стувтовиль шкась (лиясто лиялинь эсень марто 5 часос) педе пес анокставсь сценариесь.
Прявт налксиекс (героекс) теевсь од цёра. Сонзэ эрямонь пельксэнзэ пачк невтеви шкась, зярдо эрзянь модатне лангс сась а содавикс теде икеле вий – монголтнэ. Церанть вельде невтезь сехте ванькс эрзятнень (арсян, весе модамасторонь раськетненьгак) паро ёнксост: малавикс ломанень вечкема, тиринь раськень ды моданть кис педе пес аштема.
Церась ёмавтсынзе сехте малавиксэнзэ, велензэ-раськензэ пултазь. Сырги героенек Пургазонь ушмантнэнь вешнеме. Сон анок максомс эрямонзо тиринь раськенть седе тов эрямонзо кис. Те а нельгеви киненьгак масторлангсо. Седе тов а карман панжомо сюжетэнть, курок нейсынк.
Аволь сеске пряс сась фильманть ды прявт героенть лемезэ. Арсемат, арсемат, арсемат… Азор!!! Сон азор эсь лангсо, сон азор эсь оймензэ лангсо. Весе эрямонь стакачитне лангс апак вано сон ванстызе оймень ванскчинть..
Сценариесь сёрмадовсь. Эзинь кирдеве, учинь мельть. Карминь ёвтнеме малавикс эрзянь ды лия раьскень ялгатненень. Евтнемстэяк марявиль, туилинь лия чив мода лангсто. Кунсолыцятне кемекстызь – вечкевсь! Вечкевсь Бакич Видяй ялгантеньгак!
Теде мейле кортынек раськень театрань Михайлов Павел налксицянть марто. Сонзэяк, марявсь, кирвазтинек. Сынденст башка Видяй кирвазтизе налксеме Иван Боярнкин ялганзо, Раужо Промза ёндо мусь паро мокшонь цёра, конанть ули лишмезэ ды сон парсте ласте ардтни. Весе пурнавсь, аравтынек чи ды сыргинек валске марто Промза ёнов вирев.
Чись, кода лия теленьсетнеяк, аволь пек лембель. Кавтошка част ютавтынек ансяк оршамонть лангс. Зярдо весе анкоставсь, ушодовсть чийнемат сценарий, камера, микрофон марто. Теке онстонок понгинек съемкань тарка лангс, эзь кемевеяк, тейдянок васенце эрзянь кино! Чинек ливтясь – эзь маряво. Кемень минутат ютавтынек эжнема лангс, чай симинек. Саезь ярсамось стувтовс. Янсяк кенеремс чивалгомас…Кенеринек.
Сизесь, вачо сыргинек кудо ёнов. Паша ды мон совинек Бакич Видяйнень, покш телевизорсо ванынек снимазь кадратнень. Теевсь мельспаро.
Седеяк покш мельспаро теевсь, зяро Видяй важодсь 3 таргот (недлят) видеонть, вайгельтнень-мезтнень марто.Съемкатне те пелкс, седее ламо шка юты вейс пурнамонтень. Истя минек лись тизер-трейлер. Лиякс меремс, те 5 минутань ёвтнема-реклама фильмантень. Зярдо неия монсь васенцеде – кургом автевсь. Ульнесь мель седе курок невтемс ломантненень, кецявтомс-ёвтамс васень эрзянь кинонь (кадык ушодксонь) лисемадо. Неень шкасто интернетсэ «Youtube» сайтсонть ваннызь 815 ломанть, «Одноклассниксэ» — 1500. Ванодо тыньгак.
P.S.
Пшкалинек Мордовиянь культурасо, кирдивийсэ (властьсэ) покш ломантненень, прявтнэнень. Иестэ, конась аравтозь Россиянь кинонь иекс эрзянь фильмась эзизе тока киньгак седеензэ, лездамот а учнетяно…
Вечкевикс ялгат! Ламот эзть кемть, ансяк тевесь тееви. Кинонь иестэнть ушодовсь важодема «Азор» васенце эрзянь кельсэ художественной невтеманть лангсо. Ламо те шкас теезь. Седе тов кинонть снимамонь кис минь вешнетяно ломанть, конатне лездыть тенек превсэ, ярмаксо. Кемтяно, ломантнень оймес сови минек тевенек. Минь путынек ламо вийть превть те тевентень. Содатано, лездазь-апак, «Азор» невтемась лиси шкань ютазь.
А ней тынк сельмс-превс «Азор» трейлерэсь.
Сценарий — Учеваткин Александр
Режиссер — Чичайкин Виктор
Композитор — Видяй Бакич
В Главных ролях: Павел Михайлов, Иван Бояркин
Счёт на поддержку фильма «АЗОР»
40817810039000260887
Бик банка 048952615
Кор / счёт банка 30101810100000000615
Учеваткин Александр Андреевич
Учеваткин Сантяй, 29.03.2016, 2.40 пелеветь.
©Портал «Erzäks.ru»
Невтевкс налткенть эряви максомонзо,
зярдо саят тестэ сёрмадовкснэнь.
Комментировать