Александр Константинович Мартынов чачсь 1913-це иень даволковонь 8-це чистэ Саратова ёнксонь Петровской буень Синенькие сокицянь-видицянь кудораськесэ. Ушодксонь школань прядомадо мейле 1929-це иестэ саезь 1932-це иес тонавтнесь Петровской тонавтыцянь техникумсо.
В
ажодсь «Ленинэнь киява» ды «Эрзянь коммуна» кулялопатнесэ. 1958-1963-це иетнестэ важодсь прявт витницякс «Сурань толт» журналсо. 1964-1971-це иестнестэ важодсь МАССР-нь сёрмадыцянь вейсэндявксонь прявтокс.
А. Мартынов – МАССР-нь (1973) теевксэнь коряс (заслуженной) сёрмадыця, Мордовиянь Государственной премиянь лауреат (1982). 1938-це иестэ саезь Советской Союзонь сёрмадыцянь вейсэндявкссо аштиця. «Од пингень сёксь» васенце валморозо нолдазель 1931-це иень сундерьковсто «Якстере теште» кулялопасонть. «Морот счасияв эрямодо» васенце пусмось лиссь 1938-це иестэ. Тезэнь совась «Шутихин Гриша» васенце поэмазо.
1940-це иестэ А. Мартыновонь «Вечкема» лем ало лиссь валморонь омбоце пусмозо. Теде башка тей совавтозельть лия раськень валморонь сёрмадыцятнень эрзянь кельс ютавтовкстнэяк. Од вий марто гайгезевсь Мартыновонь вайгелезэ Ине Отечественной торпингестэяк. Те шкасто лиссть «Изнямос» (1942) ды «Изнямонь зорят» (1944) валморонь пусмотне. Сынь алтазельть Тиринь Масторонтень вечкемантень ды ятонь изнямонь кемемантень. Башка тарка торпингень (войнань) иетнестэ саи «Монь ялгам» валморонь повестесь. Сон прядозель 1946-це иестэ. Тевдеемась моли «Присурье» эрзянь колхозсонть ды торпингень паксятнесэ. Прявт героесь Радай Иван – те алкуксонь ломань, Советской Союзонь героесь Иван Радайкин. Седе тов сёрмадеесь од вий марто сёрмады покш поэмат, конатнень ютксо «Галянь вечкемазо», «Ванда», «Норовжорч» ды лият.
А. Мартыновонь поэзиянзо марто теевить содавиксэкс седеяк ламо ловныцят. Нолдавить валморонь од пусмот эрзянь ды рузонь кельтнесэ: «Норовжорч» (1972), «Валдо музыка» (1982), «Полынный мёд» (1986) ды лият. Вечкевиксэкс теевить истя жо прозасо сёрмадозь произведениятне. Сехте вадрякс сынст ютксто ловови «Розень кши» (1977) романось. Эйсэнзэ кортави неень шкань эрзянь велесэ эрямодонть. «Розень кши» романонть кисэ ды «Валдо музыка» валморонь пусмонть кисэ А. Мартыновнень максозель Мордовиянь Государственной премиясь (1982). Ламо иень перть сёрмадыцясь важодсь «Тетятнень киява» колмо книгасо романонть лангсо, кона 1988-це иестэ лиссь Московсо, «Современник» издательствасо.
Александр Мартынов содави кода ютавтыцяяк. Эрзянь кельс ютавтсь А. Пушкинэнь, М. Лермонтовонь, В. Маяковскоень, Н. Некрасовонь, К. Хетагуровонь, Т. Шевченконь, Я. Купалань, А. Прокофьевень ды лиятнень. Казезель ламо орденсэ, медальсэ ды шнамонь конёвсо.
Кулось 1989-це иень сундерьковонь 30-це чистэ.
Зинёронь Сантяй
©Портал «Erzäks.ru»
Невтевкс налткенть эряви максомонзо,
зярдо саят тестэ максозь сёрмадовкснэнь.
Комментировать