Ловнотано течи Эрюш Вежаень… ЭМ 27.11.15
ПИЗЕМЕ
(неень шкань эрзянь ёвкске)
Кизэсь сась… Учовсь! Аштемков….Эрзятне шождасто таргизь оймест. Видевкстнэ видевсть. Ракшатне якить лугава. Эрзянь велес сась нурькине шкась, зярыя таргот тикшень ледема шканть видьс, зярдо паро эрзятне аламошка оймсить кардаз ютконь тевтнеде. Ильтизь тундонть, вастызь кизэнть. Секскак «июнь» ковось эрзякс лемдязьгак АШТЕМКОВОКС (аштема+ков).
Ней улезт лембе пиземеть ды сэтьме лембе чить, сестэ весе видезесь венстясы модасто лисезь принензэ Чипаентень, сонзэ лембе валдозонзо, кона максы эрьва касовксонтень вий ды касома. Курок сюротне кармить каямо пряст, пирень эмежтне панжтыть ды кармить сюлмамо марть. Кизэсь весеменень максы ЭРЯМО… Эрямось – Инешкипазонь казнекс ашти весеменень.
Пиземе… Кизэнь пиземе… Кинень а вечкеви сон? Лембе… Ванькс… Кивчк мери ёндолнэ марто, пурьгинень стака зэрнема марто… Эрзятне пельсть Пурьгинепаздонть. Ялатеке кизэнь пизементь вечкильть. Сыретне тонавтыльть эйкакштнэнь: — Ва, иля чийне штапо прясо пургине пиземень шкасто! Пурьгинесь чавтанзат! Марят, кода зэрни?! -, ды сырявась кузиль каштом лангс каштомонь синдерьксэнть пекстамонзо, илязо, ва, ёндолось понго качамваряванть кудос. Лисни, эрзятне парсте содыльть оскань кондямо ёндолдо….
Арази эйкакштнэ кирдевить?! Ансяк юты пиземень чопода-сэнь пелесь, а кенерить лоткамо меельце ведьбайгетне прамодо, эйкакштнэ сеск, понкспильгень илиштнезь, теке сараз левкст чошкадевить кудыкелькстнэстэ, ды адя(!) чиеме кепе тов, косто сисем тюссо пиземечирькесь «сими» ведте лейстэнть!
Истят, эрзянь эйкакштнэ, вечкить кизэнь пиземетнень!
ПИЗЕМЕ… Косто саевсь те тантей-мазый эрзянь кезэрень валось? Кие ней соды… Ансяк, марявить эйсэнзэ кавто валт… ПИ+СЭМЕ. Мекс? Ули эрзянь вал – СЭМЕ. Эйстэнзэ теевсь СЭМЕДЕМС валось. Неень шкатнестэ неть валтнэ чуросто марсевить… СЭМЕ валонть марто эрзянь кельсэнть улить зярыя валт: СУРСЕМЕ (сур+сэме)… Улема, истя? Паряк, улить-кармить тень коряс лияткак арсемат… Ансяк пиземесь пизезэ!
Пизек, пизек, пиземе,
Нишкепазонь сурсеме!
Ашо коцткине кодак,
Ведеть весемнень явтак!
****
Васень пиземе…
Панжиковонь сырне пры менельстэ,
Лембе, валдо, цитни ведьбайге,
Чамат шлясы сиянь ведьпрамосо,
Кедть аравтнек! Кундсек пиземе!
Норовавась валны сэнь веднесэ
Пижес нававт пиреть. Пурьгинесь —
Зэрнемасо сыргозти перть пельксэнть,
Куля, эрзят, курок сы кизэсь!
Норовавась моданть валны ведьсэ,
Ведявась парсейть лейнесэнть штердсь,
Нишкепазонь сырне пры менельстэ,
Тундонь кеняркс — васень пиземесь!
***
Пси чистэ…
Ков а варштат – мазычи!
Эрзянь оймес – парочи!
Коштось шожда, чись – маней,
Менель тёкшось – пек сэрей!
Кизэнь куншка, чизэ – пси!
Псиденть модась мик кувси,
Вирь томбале пурнавсть пельть,
Цярахмандо, веле, пельть!
Кизна сеедьстэ эрси,
Псиденть мельга – вачкоди!
Ютак вакска, цярахман,
Верепазонть мон вешан,
Иляк чаво монь пирем,
Илить машто видевксэм.
Кизэнь куншка, чизэ – пси!
Псиденть модаськак кувси…
***
Пиземе валсь….
Пиземесь валсь,
Толнэтне палсть,
Васолдо пурьгине зэрнесь,
Пиземень шалт,
Тошкамонь валт,
Кедеть кедень лембесэнть эждсь…
Сельведень пачк
Уцяскась чачк
Коцт панксокс цяторсо сезевсь,
Пиземе валсь,
Толнэтне палсть,
Оймесэнь эри се кизэсь…
Пиземесь валсь,
Толнэтне палсть…
Пиземень шалт,
Тошкамонь валт…
Сельведень пачк
Уцяскась чачк…
******
ЦЯРАХМАН
(неень шкань эрзянь ёвкске)
Эрзянь Масторсо эрсить пек пси кизэть. Истят псить, мик весе сюротне-видевкстнэ коськекшныть.
Псиденть мейле апак учо вачкоди давол. Шкань-шкань мик цярахман марто. Цярахман (цярахма, сярахма) валось, улема, теевсь истяня. — Цяррах! – зэрневти пурьгинесь…
Те Пурьгинепазось менель крандазсо менеленть пачк арды ды зэрневтни. Крандазозо кильдезь колмо ашо айгорсо! Айгортнэнь пильге кенжест алдо сельмень кери валдо сяткт верьгелить, сисем тюссо менель чирькезэ Эрзянь Масторонть келес неяви, вейке лейстэ ведь поти, лия лейс-эрькес каи. Кие чии малазонзо, се теде сонсь неи. Ансяк чиеме покштнэ а мерить, секскак тень маласто кияк эзизе некшне….
Пурьгинепазось чаросонзо зэрневтни, локшосонзо цяраи. Локшо пестэ ёндолт-кирвитолт ливтить, сэрей тумо пряс понгить. Иля стякшно алонзо. Иля аштне штапо прясо! Ёндолось прязот понги!
Сыретне ёвтнить, келя, те Пурьгинепазось Литова эрзянь нинзэ мельга Эрзянь Масторов арды. Нолдызе Литовань кавто чис Масторов, тетянь-авань содавтомо, ды кодаяк тензэ эрзянь мазыйкась мекев Менелев а учови. Колмоце чистэнть Пурьгинепазось кильдсь колмо айгорт ды сонсь сась мельс – эстензэ ардомс-валгомс Менельстэ Эрзянь Масторов ды саемс Литовань мекев Менелев…Пек кежев те шкастонть Пургинепазось. Пек тошнакадсь Литова нинзэ кис. Арды Эрзянь Масторов вешнемензэ — мекев Менелев саемензэ…
Кивчкади ёндол! Цяради пурьгинесь! Масторганть истямо зэрть юты, мик модаськак зярыяксть сорксты. Вачкоди давол ды мик цярахман марто!
Цярахман (цярахма, сярахма, сяракма) – те эень покольнеть-кснавнеть, конат покшт эрсить мик саразонь эли дигань алшка. Теевить сынь истя. Вачкодить менель айгортнэ пильге кенжсэст ашо давол пельс, эйстэнзэ лазовить эйкевнеть ды прыть сеть кевнетне модамасторов.
Эрзятне седикеле содылть, кода кардамс цярахманонть. Ливтильть кудосто ушов мазый тейтерь ды мерильть: — Пурьгинепаз, неемизь, марямизь! Иля кеждя лангозонок! Вана теть мазый тейтерь, лемезэ – Литова! А муеви ва нить Эрзянь Масторсто, саик эстеть минек Литовань…. Паро, Пурьгинепазонь нись, Литова, кодак мари Пурьгине зэрни, сеск сонсь капши велявтомо мирденстэнь Менелев…
Секскак сехте мазый тейтертнень эрзятне сеедьстэ лемдильть – Литова.
А кода сяракмась пры, сестэ сыринетне вишка эйкакштнэнь кучилизь ушов каштом тенстенть-помиланть ёртомо цярахманонть алов, лоткавтомганзо. Ды цярахманось сеск лоткиль!
*****
Таго панжозь кадови вальмат…
Цярахманось вачкодсь апак учо,
Менель лазовсь, вальмас эшксть вармат,
Сёрмам кадовсь тонеть апак кучо,
Учомонзо ней кувать кармат…
Вармась вальмазот ёрты кевнесэ,
Ашо вашинекс ливти васов,
Минек ютксо теевсь тея лазкске,
Вешан Пазонть: — Илязо касо!
Састо зэрьксты коське вальмалазось,
Истя, кода сестэ, ютамсто,
Эрьва чокшнэ вальмазот вачколинь,
Аламодо пелезь, сурпрясо.
Ютасть иеть, ледстнян цярахманонть,
Кона сестэ панжизе вальмат,
Ледстнян нурька, нусманя варштамот,
Кона седеезэм сялгсь пшти сардт.
Таго сёрмам кадовсь апак кучо,
Таго панжозь кадови вальмат,
Содан, тешкас сонзэ пельдень учат,
Кода сестэ, вальмасто ванкшнат…
***
Лемень кундамо
Сулеесь эрькентень ваясь,
Чизэ качамос валги…
Кудов эзь велявто алясь,
Авась мельганзо ранги.
Эрзят, покштянк илинк стувто,
Лемест кирдеде мельсэнк.
Эйкакшонк ды ласькенк туртов
Морот морседе вейсэ.
Мороюткось:
Кундака лемест эрзянь цёратнень,
Ледстнека, мезес путсть сынь покш вий…
Ёвтнека, мезень кис модас прасть сынь,
Ине тевест а ёми зярдояк!
Прядови кезэрень морось,
Дорамонь меельце гайтть…
Эрзянь кепедьсынек коронть,
Моразенть мелезэть сайть.
Умок минь мольтяно вейсэ,
Тевесь изнямо касты,
Пултазь Олёнань седейзэ
Толсто мартонок корты.
Мороюткось:
Кундака лемест эрзянь цёратнень,
Ледстнека, мезес путсть сынь покш вий…
Ёвтнека, мезень кис модас прасть сынь,
Ине тевест а ёми зярдояк!
Раськенек ине виезэ
А тертяви киненьгак.
Эрзянь Масторонть лемензэ
Ванстыть эрзятне нейгак.
Эрзянь Мастором, тон эряк!
Нежекс аштят тенек тон.
Учи уцяскась икеле,
Тон эрзятненень – кудо.
***
«Iltahuuhto» суоминь моронть коряс. Седямолувось: Kulervo Hämäläinen.
Автор публикации
Комментировать