Исяк, таштамковонь 21-це чистэ А. С. Пушкинэнь лемсэ раськень ловнома кудосо ютась Йовлань Олонень алтазь ледстнемань чокшне. Пурнавкшность Йовлань Олонь ялганзо-малавиксэнзэ, сеть, кить парсте содылизь, ды сеть, кить зярдояк эзть вастневе мартонзо, ансяк «Тораманть» шкинеманзо вельде парсте содасызь, мейсэ эрясь-лексесь те ломанесь.
У
лить ломанть, конат туемадост мейлеяк кадыть мельгаст валдо тешкс, лембе ледстнемат ды ёмавтомаст кувалма аёвтавикс сэпшть, ризкс, кона мейсэяк а нардави, а шождалгавтови. Владимир Иванович Ромашкинэнь, Йовлань Олонь, лемесь содавикс ламонень, ды аволь ансяк эсенек масторсо, сонзэ томбалеяк. Тедеде сонензэ топодевельть 65 иеть. Те пек аламо, ансяк сон уш зярыя иеть арась ютксонок. Эрясь сон — минек раськенть культуранзо, мазый моронзо-седямонзо тонавтнемасо-ванстомасо ды ломантнень оймес пачтямосо.
«Ялгатне ледстнить…» — истямо лем ало ютавтозель те ледстнема чокшнесь. Йовлань Олодо лембе валт ёвтасть А.С. Лузгин, А.М. Кочеваткин, Г. Д. Мусалёв, П.В. Рябов, В.Н. Мартышкин, А.С. Алёшкин, П.В. Мигунов, В.С. Родионов, Т.С. Баргова ды лият. Сехте покш казнекс пурнавозтненень ульнесь «Торамань» васенце морыцятнень марто вастовомась. Неть — Г. Дулкин, В. Прокин, Ю. Буянкин ды И. Ацапкин. Самай сынь В.И. Ромашкин марто ушодызь минек раськень кезэрень моротнень сэрей тёкшос кепедеманть, невтизь минек моротнень-седямопельтнень омбомасторсояк. Ды кода парсте сынст тосо вастсть!
Пурнавозтненень теде ёвтнесь А.С. Алёшкин, кона истя жо ульнесь «Тораманть» пурныцякс-лемдицякс. Ансяк вана тиринь ёнксов велявтомадо мейле морыцятне эзть маря а лембе, а кувалмаст мелявкс. Берянь, ансяк истя эрси пек сеедьстэ: эсеть парось а редяви ды а ванстови, питнейчизэ маряви ансяк ёмавтомадонзо мейле. Паро, ульнесть лездыця ломанть, конат эзть ютне «Тораманть» мелявксонзо вакска. Та-кода мукшновсть ярмакткак, панжтневсть лия масторов китнеяк. Ды мезесь сехте пек кенярдовты, весе стакачитнень лангс апак вано, «Торамась» эри течис. Кадык сонзэ моротнень гайгемась пачкоди Йовлонь Олоненьгак…
«Сятко»
©Портал «Erzäks.ru»
Невтевкс налткенть эряви максомонзо,
зярдо саят тестэ максозь сёрмадовкснэнь.
Комментировать