2017 иень якшамковонь 7 чистэ Вокнаволок велесэ ды Костомукшо ошсо ульнесь панжозь «Вуоккиниеми — Шкинемань суоми-угрань мирэнь прявтош 2017» иесь. Кода минь икеле сёрмадынек, те велесь кармась изницякс МАФУН-онь проекттсэнть, кона максы касома мастортнэнень косо эрить суоми-угрань раськеть.

В

ейс пурнавсть: велень эрицятне, кие тосо чачсь, Карелэнь Республикань Костомукшонь ошонь кужонть администрациясь, Карелэнь Республикань вийкирьдиень кучовикстнэ, Россиянь ды Суоминь вейсэньломанень пурнавксонь улицятне ды тердезь инжеть.

Васняяк, кие сась валскень шкава невтизь Вокнаволок веленть. Пек мельс тусь одсто чувтосто путозь-чапозь тонавтнема ды эйдень кужонь кудотне. Теизь суоминь ярмак лангс, стомитне. Велень Кудосо (карелэнь ды суоминь кельтнесэ Kylatalo) покш питнечи ды паро мель инжетне максть Карелэнь Шкинемань Музеентень.

П

окшчинть панжомо ульнесь максозь Карелэнь Республикань Костомукшань ошонь кужонть администрациянть прявтонтень Анна Бендиковане:
«Пек покш чись течи минек Вокновалок велесэнть. Минь каштанксчи марто кецятано, минек велесь теевсь Шкинемань суоми-угрань мирэнь прявтошокс. Кода вадря, истят проект улить, конат кепстить раськень шкинеманть, ванстыть раськесмустенть. Сюкпря сетненень кие те проекттэнть теизь.»

У

льнесь ливтязь сцена лангс Шкинемань суоми-угрань мирэнь тёкшсось. Те ине нармунесь карми иенть перть Вокнаволок велесэнть, сон карми панжомо эрьва-кодамот ютавтома чить, сон карми вастомо ды кис ильтямо инжетнень. Сонзэ ускизь 2016 иень прядомаванть Искасентдьёрдь велестэ ды Веспрем ошсто, Мадьяронь Масторсто, косо ульнесь 2016 иень Шкинемань суоми-угрань мирэнь прявтошось. Лебедевань Татьяна, Вокнаволок велестэ, ды сон морась «Деревенька Вокнаволок» моронть. Пароль улевель сонзэ ютавтомонзо карелэнь кельскак.

Л

едстясынек, «Шкинемань суоми-угрань мирэнь прявтош» проекттэсь — те МАФУН-онь (Одломанень Суоми-угрань раськень Вейсэндявкс). Сон максы касома суоми-угрань раськетьнень эрямо таркатнень искусствань ды шкинемань полавтомасо. Веси инжетнень паро валсо вастась Петра ошонь ды Ленинградонь ёнксто МАФУН-с Ветикуронтень совицясь Петрянь Андю:
«Паро мельсэ шумбракстнетяно од Шкинемань суоми-угрань мирэнь прявтошонть! Шкинемань прявтошонть аволь шожда тевезэ — улемс шкинемань эрямопизекс ды ламо масторсто суоми-угрань раськетнень алдомолиця тевень чачомакс; ды весе масторонтень невтемс суоми-угрань шкинеманть ламоксчинть. Минь кемтянок, Вуоккиниеми парочисэ карми кандомо Шкинема прявтош лементь. Иесь карми цитордыця валдокс тевень ды покшчинь коряс, а сонсь велесь карми неезь ды саи сяткине эсист шкинемань, туристэнь ды экономикань касоматнева. Минь кенярдтано ялгаксинь толось ды уралонь раськетнень вейсэндямось 2017 иестэ карми молеме карелэнь тевтеитнень лездамосо.»

М

ейле валонть саизь инжеть Суоминь Масторсто. Эва-Кайса Линна, Карелэнь шкинемань вейсэндявксонть прявтось кемекстась:
«Вечкевикс ялгат, васняяк минек ушодовсь сёрмадома лувось, ульнесь кортамонь, ды весе содамочись молсь курксто-кургс ды истя ванстовсь раськень ледстнемасо. Эйсэнзэ ванстовсь превейчись, рунатнэ ванстасть содамочинть, шкинеманть, раськенть искусстванть ды эрьва мезенть, конань а эряви содамс весенень. Фольклоронь улемась кой-кинень те ташто ды аэрявиксэкс, ансяк минь сонзэ а ставтано ды пек сеетьстэ тесэ ульнитяно (Вокнаволоксо). Тесэ ули се, мезе эряви ванстомс карелэнь эськоень шкинемасонть. «Калевала» — те пек вадря морокерьксэсь, ды ульнесть нейгак улить ламо кевкстемат кинь сон: суоминь эли карелэнь шкинемантень? Сонзэ, тия, не таркатнева пурнась Элиас Лёнротт, кона ульнесь суоминь келень юронь теицякс-чапицякс. Неень шкасто содыйтне кемекстасть, эряви те морокерьксэнть невтемензэ ды содавтомонзо келень содыцятнень-кандыцятнень марто. Сынь мерить те морокерьксэсь карелтнэнь, ды сонзэ эряви ютавтомс карелэнь кельс. Секс, 2015 иестэ Карелэнь шкинемань вейсэндявксось нолдызе Калеваланть эсь карелэнь кельсэ.
Минь карматано тукшномо те пусмонть ды казямо те иенть перть сех малавикс Шкинема прявтошонть инжетненень. Весе суоми-угрань мирэст карми вано минек веленть мельга. Секс, эряви тень коряс аштемс, ялгат!»

С

ари Хеймонен, Вуoккиниеми пурнавксто (Viokkiema seura), Суоминь Масторсто:
«Мон чачома таркам тестэ. Кода меля ульнесь Ильянь Чись, мон кеминь ды содылинь минь карматано изницякс! Мекс минь саинек ашконть те проекттэнть топавтомонзо? Сон эряви велентень ды эриця ломантненень тесэ. Пек кеман, Шкинемань прявтошось максы од эрямокошт, карми касомо эрямо таркась, ды кадык нуцькан ды нуцькань нуцькам кармить само тей. Кадык весе тесэ цецяволь! Мон карман лездамо весенень!»

М

аркку Ниеминен, Юминкеконь лемсэ Фонд, Кухмо ош:
«Вечкевикс велень эрицятне ды инжеть! Мелезем пек паро улемс тесэ чистэ, коли Вокнаволок тееви Шкинемань суоми-угрань мирэнь прявтошокс. Теде башкаяк, Вокнаволок велентень кавто пингеде седе ламо — те весе мирэнь карелэнь шкинемань куншкатарка, ды сон содавикс. Те шкинемась, конань ванстыть велень эрицятне истямо питней, арсян сынь коли-коли а чарькодить кодамо сон эрявикс. Эрямось ульнесь стака: ойнань шкасто ламотнень тесэ панизь лия таркав эрямо; 1956 иестэ кармасть а мереме тонавтомо карелэнь ды суоминь кельтнесэ школасо; ютазь пингень 70-це иетнестэ кардасть кортамо пакшатнень марто. Ансяк тень лангс апак вано, келесь ды шкинемась кадовсь эрямо! Те иесь карелэнь раськень ие, вокнаволоксо эрицят, те тынк иесь. А минь ялганк, кить тынк марто ульнесть, карматано лездамо тенк.»

К

лееровань Татьяна, МККФУН-нь прявт (Петроской ош):
«Мон пек каштанчисан, Вокнаволок теевсь Шкинемань суоми-угрань мирэнь прявтошокс. Те од ломанень проектэсь, ансяк минек ули мель невтемензэ карелэнь шкинеманть, карелэнь меленть. Мон-монсь карелан ды кортан се карелэнь кельсэ, конатасонть кортыть Вокнаволоконь, Ухта таркатнесэ ды весе кить эрить Куйта эрькенть вакска. Минек пек мазы шкинеманок, минек пек домкат ундоксонок те мода масторсонть. Минек эряви невтемс ломантненень кить эрить те модасонть — минек шкинемась эри ды минь пек прянок шнакшнано сонзэ кисэ. Мон ёвтнинь теде, мон ускинь ды ёвтнинь шумбракстнематнень Вокнаволоконь эрицятненень Искасентдьёрдь велестэ — 2016 иень Шкинемань суоми-угрань мирэнь прявтошонть пельде. Монь ули мелем, миненек эряви вейсэндявомс истямо проекттнэнь курова, сынь кепедить ойменть, максыть од лексема, сынь вановтыть мирэнь валдосто ды цитордозь. Ансяк икелев молема, арсян те проектэсь минек вейсэндявтсамизь!»

П

окшчинь прядомадо икеле сценанть лангс листь инжеть Удмуртиянь Масторсто, Ташто Быгы велестэ, сынь ульнесть васенце Шкинемань суоми-угрань мирэнь прявтошокс. Ульнесь те 2014 иестэ. Мызы удмуртонь кельсэ моросо, удмуртокс оршазь сынь вастызь весе пурныцятнень. Ташто Быгы веленть администрациянь прявтось Нина Беляева ушодсь кортамо:
«Паро чокшне марто ялгат, малавикс раськенек! Самс истямо васолосто ды морамс вейке моро, те пек аламо! Минь ардынек колмо чинь-вень седе ламо кувалма, секс кортан аламодо… «Шкинемань суоми-угрань мирэнь прявтош» проекттэнть минек велесэ появась од ярсамонь фестиваль «Быг-Быг», кона ютавтови медьковсто. Валдо седейстэ саезь кучтан тенк поздоровт те од леменк марто. Ды те пек покш тев тенк. Содан, ярмакт ламо арасть, сынь колияк арасть. Минь 2014 иестэ ютавтынек 5 омбомасторонь покшчить, 20 россияньёнкссонь. Кавто ковс саезь минек велесэ ульнесть 4 тежа инжеть-туристт. Те покш важодема! Минек веленек кармась цецянь пусмокс! Не вана удмуртонь тейтерькатне-цёратне важодить 27 част чинть-венть! Мелем ули тень седе ламо важодемс, ды теемс эрьва кодат тевть, аволь ансяк шкинемасояк!»

Панжома чинть ветицякс ульнесть: Елена Мокеева ды Елена Плюйко. «Вуоккиниеми — Шкинемань суоми-угрань мирэнь прявтош 2017» иенть панжомасонть важодиця кельтне ульнесть рузонь ды суоминь.

В

анодо фотокувт седе ламо:

Невтема:
«Шкинемань суоми-угрань мирэнь прявтош» — те программа МАФУН-онь, кона максы касома мастортнэнень косо эрить суоми-угрань раськеть. Макови шкинемань ды искусствам мазычинь ёрокчисэ. Те программась ульнесь нолдазь тевс 2014 иестэ. Васенце Прявтошокс ульнесь Ташто Быги велесь Удмуртиянь Масторсо. 2015 иестэ те тешкстэнть кандсь сетунь Обиниця велесь Эстэнь Масторсо. Суоми-угрань Шкинемань Прявтоштне 2016 иестэ кармасть Искасентдьёрдь веле ды Веспрем ош, Мадьяронь Масторсо. 2017 иень Шкинемань Прявтошокс кочказь Вокнаволок карелэнь велэсь. Седе кувакасто ловнок теде — www.uralic.org.

МАФУН (Молодёжная Ассоциация Финно-Угорских Народов) — суоми-угрань ды уралонь (самодиень) раськень одломанень вейсэндявксонь пурнавкс. МАФУН теезь келень ды шкинемань уралонь раськень лездамонтень, кона карми кемекставтомо суоми-угрань раськетнень юткова, мастортнэва ды ёнкстнэва.

ПЕТРЯНЬ АНДЮ
Портал «Erzäks.ru»
Невтевкс налткенть эряви максомонзо,
зярдо саят тестэ максозь сёрмадовкснэнь