2016 иень медьковонь 7-це чистэ Саран ошсо карми ютавтовомо V-це Эрзянь Инекужось. Россиянь ды омбомасторонь эрьва ёнксто сыця эрзятне пурнавить А.С. Пушкинэнь лемсэ библиотекасо.
Т
е эрзянь раськень келей кортамо-арсема промкс. Эйсэнзэ онкстави-варчневи эрзянь раськенть неень шкань эрямозо, кортавить эрзянь раськенть эрямо ёнксонзо, икелев молемазо.
Ледстясынек, Эрзянь Инекужось ульнесь арсезь ды пурназь неень шкань 2000-нь эрямо иетнестэ, анокстыцязо ды ютавтыцязо ульнесь Эрзянь келень идема Фондось, ды лият седейсэ вечкиця эсисть раськест эрзятне.
Инекужос тердевить весе эрзятне, кие эсь прянзо лови эрзякс, кие арси эрзянь раськенть кувалма, мелявты эрзянь келенть, культуранть (шкинеманть) ды эрямопингенть кис, кие арси путомо эрзянь тевтненень эсь мелензэ, превензэ, виензэ ды шканзо.
«Мон Вирень Инзейне, ламо иеть эрян руз ютксо, Челяба ошсо. Мон Эрзя, прясто-пильгс! Медьковонь 7-це чистэ карман ютавтомо ветеце Эрзянь Инекужонть, косо весе масторлагонь эрзятне пуромить вейс ды кармить арсеме, мелявтомо эрзянь раськень седе тов эрямонзо кис. Моледе, эрзят, Инекужов» — сёрмадст-кемекстась Вирень Инзейне, V-це Эрзянь Инекужонь ветицясь.
Инекужось карми ютавтовомо вейке чинь перть, 10 чассто саезь 15 часонь видьс.
Секскак неень шкань эрямосонокак икеленек кадовить пек эрявиксэкс, топавтомас путовиксэкс сеть мельтне ды тёкшмельтне, конат ульнесть кемекстазь I, II, III, IV, Инекужотнесэ, сынст мельяволявтоматнесэ ды лия тевконёвтнесэ. Васенцетне эйстэст: эрзя леменек, эрзянь келенек ванстомась ды раськенек ламолгавтомась, касомась.
©Портал «Erzäks.ru»
Невтевкс налткенть эряви максомонзо,
зярдо саят тестэ сёрмадовкснэнь.
Комментировать