Кода ютась Валморозеень чокшнесь «Тядянь-авань вал» Саранскойсэ ловнодо пунразь вейс кулянь сёрмадыйтнень материалтнень эйстэ.
«Э
рзянь правда», МОТОРКИНАНЬ ТАТЬЯНА:
Эйзюрковонь 23-це чистэ Национальной драмань театрасо ютась «Тядянь-авань вал» поэзиянь чокшне. Сонзэ пурныцясь – «Российской Федерациянь Финнэнь-угрань раськетнень ассоциация» Весероссиянь общественной движениясь. Тей тердевсть ошонь школатнестэ тиринь келень тонавтыцятне, библиотекасо важодицятне. Весень туртов сцена лангсто гайгсть стихть. Сынст ловность содавикс поэттнэ ды од сёрмадыцятне.
Поэзиянь чокшненть ветясть «Мокша» журналонь прявт редакторось В.М.Лобанов ды «Сятко» журналонь важодицясь Алина Подгорнова. Сынь макснесть вал эрзянь ды мокшонь сёрмадейтненень. Истя, эрзятнень пельде стихть ловность РФ-нь Писателень союзонь членэсь Р.С.Кемайкина, МР-нь Заслуженной поэтэсь Н.И.Ишуткин, Дубёнка ёнкссто сакшнось Любовь Дергачёва, эрзянь келень тонавтыцясь Марина Слугина, РФ-нь Писателень союзонь члентнэ Людмила Рябова, Татьяна Мокшанова, М.Е.Евсевьев лемсэ МГПИ-нь студенткась Юлия Демяшкина, Н.П.Огарёв лемсэ МГУ-нь студенткась Татьяна Шлабина. Эрьвась ловнось сеть стихтнень, конатне тукшныть мелезэст. Сынь ульнесть вечкемадо, тундодо, алтавсть тиринь авантень, велентень. А вана Валентина Комендантова марясь поэзиянь чокшнеденть ды сась сонсь. Авась седейшкава ловнось эрзянь поэтэнть А.Араповонь стихензэ.
Мокшонь поэзиянть невтсть МР-нь Заслуженной поэтэсь Р.К.Орлова, РФ-нь Писателень союзонь членэсь В.И. Нестеров, Краснослободск ёнкссто сакшнось поэтэсь Н.Циликин. Стихть ловность од автортнэяк.
– Чокшнесь ютась – эзь марявояк. Сеедьстэ эрси истя, перьканок паронть минь а редятано. Те вастовомась аволь стяко лемдезь «Тядянь-авань вал». Авань валось свал эжди, максы вийть. Эрзянь ды мокшонь поэзиясь сюпавдояк сюпав, сонзэ эряви невтемс, ловномс, марямс, кунсоломс. Паро ули, бути минь карматано пурнавкшномо седе сеедьстэ. Колмо ковс весть. Саемга, сы вастовоманть ютавтсынек июньстэ. Кадык кармить гайгеме сеть стихтне, конатне теевсть морокс. Те малавгавтсынзе эрзятнень ды мокшотнень. Од поэттнэде ламо, аволь эрьванть содасынек. Истямо чокшнетне ютавтневить сыненст лездамга. Миненек эряви невтемс прозаиктненьгак. Те ансяк васенце эскелькс. Кеман, карми омбоце, колмоце… Течинь вастовомадонть мейле карматано нолдамо поэзиянь вейспурнавкс. Сон ули вейсэнь – эрзянь ды мокшонь пусмо, кадык те книгась карми ловныцятнень кецявтомо. Койсэнь, эряви лездамс сетненень, конатнень пурнавсть книгань нолдамс сатышка материалост, – кортась Саранск ошонь мэрэсь, «Российской Федерациянь Финнэнь-угрань раськетнень ассоциация» Весероссиянь общественной движениянь прявтось П.Н.Тултаев.
Ва
на мезе теде сёрмадсть ПОДГОРНОВАНЬ АЛИНА:
Ялгат! Ютазь таргось малав весе алтазель Поэзиянь чинтень: школасо, библиотекасо вастовомат, валморот, валморот…
Эрзянь ды мокшонь сёрмадыцятнень сехте талновтыця чокшнесь ютась эйзюрковонь 23-це чистэ Национальной театрасо, косо гайгсть эрзянь ды мокшонь кельсэ валморот.
Те чокшненть арсизе ютавтомс Саранск ошонь прявтось П.Н.Тултаев. Ды сёрмадыцятне витизь седеест: аволь сеедьстэ сынь пурнавкшныть истямо покш сцена лангс сёрмадовксост ловномо.
Эрзянь поэзиянть ловность Маризь Кемаль, Н.Ишуткин, Л.Дергачёва, Л.Рябова, Т. Мокшанова, А.Подгорнова, М.Слугина, Ю.Демяшкина, Т.Шлабина.
Портал «Erzäks.ru»
Фотокувтне РЕТУНСКОЕНЬ Э. ды ПОДГОРНОВАНЬ А.
Невтевкс налткенть эряви максомонзо,
зярдо саят тестэ максозь сёрмадовкснэнь.
Комментировать