2016 иень панжиковонь 28 чистэ Ульяновск ошсо ютась колмоце раськень покшчи «Шумбрат!». Пурнавкшность эрзят ды мокшот Ульянонь ёнкссонь буетнестэ ды инжеть Самарасто, Удмуртиясто ды Мордвоиясто.

Т

едеде Ульяновск ошсо таго ютавтозель «Шумбрат!» покшчись. «Владимирский садс» колмоцеде пурнавкшность Ульяновск ёнксонь эрзятне ды лия раськень ломантне, конатнень ульнесь мелест теевемс содавиксэкс минек раськенть марто.

Содавиксэкс теевемась ютась моротнень, киштематнень, валморотнень вельде- сындест прявт сценанть лангсто ды покшчинь ютавтомань лия таркатнестэ ульнесть невтезь байтяк. Ды невтсть сынст аволь ансяк Ульяновск ёнксонь буетнестэ ломантне — Мордовиянь делегацияськак.
Явовтсь мель: валморонь ловномо-ёвтнеме лиснесть школасо тонавтницятне ды мик эйдень кужос якиця эйкакшкетнеяк. Весемева содавсь: мартост важодицятне путсть покш мель анокстамстост. Паряк истяшка меленть аволизь путояк, бути авольть сода: карми ютамо «Шумбрат!» фестивалесь, эряви невтемс прянть ансяк вадря ёндо. Ды истя лисськак.

Башка эрявить шнамс пидицятнень-инжень каваницятнень. Сынь анокстасть эрзянь ярсамопельть. Паро казнекс Ульяновск ёнксонь эрицятненень ульнесь «Торамань» морамось-седямось. Сон аволь ансяк ломантнень — Равонь толкунтнэньгак сыргозтьсынзе-киштевтьсынзе.
Покш сюкпря те покшчинть анокстыцятненень. А стяко мелявтсть, а стяко важодсть!

«Сятко»
©Портал «Erzäks.ru»

Невтевкс налткенть эряви максомонзо,
зярдо саят тестэ сёрмадовкснэнь.