Самарасо ютась «Масторава» эрзя-мокшонь раськень хоронь «Тундонь вастома» концертэсь. Сон ушодозель «Каванямонь моросонть», конань морызь Раиса Кичаева, Любовь Панькина, Лидия Короткова. Ваныцятнень каванясть позадо ды пачалкседе. Тенень пек кецясть кенярксчинь инжетне.
«Ма
сторава» ансамблянь солисткась Нина Черных морась тиринь веледензэ морот: «Веле, веле, велинем», «Ташто велесэ», истя жо «Ливтить письмарт» лайшеманть, конань валтнэнь сёрмадынзе эрзянь сказительницась Серафима Люлякина.
Сценанть лангсто истя жо гайгсть эрзянь лия моротнеяк, кода: «Пекшень дудкине», «Утянь Катю», «Саян мон штерине». Татьяна Колышева эрзякс морызе «Домик окнами в сад» рузонь моронть («Свал мельсэм се кудось»). «Масторава» хорось морась истят морот: «Кевень седеезэ», «Кенерсть сюротне паксясо», «Вай, сюконятано».
Виде-паронь казнекс Самарань эрицятнень туртов кармась «Мазый тейтерне» эрзянь морось, конань гитарань коряс морызе Алексей Лесных. Интернетсэ сонзэ содасызь «Олёш» псевдонименть ало.
Концертсэнть гайгсть рузонь мороткак. Меельцекс артисттнэ ды ваныцятне вейсэ морызь «Вирев молян» эрзянь моронть, конась кармась весе эрзятнень ды мокшотнень гимнакс.
В.Алексеева
Фототне: А.Лесных
«Эрзянь правда» курось
©Портал «Erzäks.ru»
Невтевкс налткенть эряви максомонзо,
зярдо саят тестэ сёрмадовкснэнь.
Комментировать