Аштемковонь 15 чистэ Рузонь музейстэ Ине-Петрань ошсо панжови невтевкс «Степан Эрьзя. 1876-1959». Сон алтазь Ине керсицянть 140-це иень чачома чистэнзэ. Сехте ламо невтематнень эйстэ саезь музеенть ванстома паргстонть. Шкинемань вечкицятнень туртов те покш казе, неемс ве таркасо теезь Степан Эрьзянь кедьсэ чувторунготнень неень шкасто чуроксто, Рузонь музейсэ арась эрьва шкасто невтема.
С
тепан Эрьзя чачсь ожоковонь 27-це (сундерьковонь 8-це) чистэ 1876 иестэ Баева велесэ – кулось сундерьковонь 24-це чистэ 1959 иестэ Московсо) — Эрзянь Инекерсиця, Россиянь ды Раськеютконь артыця, чувтосто керсиця. Эрзя раськень лементь путызе эсензэ лемс вана мезень коряс — арсесь невтемензэ веси Мастороньте вишка раськеденть, конань улить Инеломанть.
Васенце артома тонавтнемат сайсь Ратор ды Казанень оштнень пазавань теемакудотнесэ. 1902 иестэ саезь 1906 иес тонавтнесь МУЖВЗ-со (Московонь живописень, ваяниянь ды зодчествань училищасо) Волнухинень С. М. ды Трубецкоень П. П. содавикс тонавтыцятнень кедьсэ. 1906 иесте саезь 1914 иес чувтосто керсицясь эрясь Италиянь ды Франциянь Мастортнева. 1920 иестэ саезь 1926 иес эрясь Кавказонь ёнксо ды лия СССР-нь лембе ёнкснева. 1926 иесте Степан Эрьзя ардсь Франциянь Масторов (Париж ошов) эсинзе невтевкс марто, сесте сонзе ушодовсь кувака омбомасторонь эрямо ды шкинема шказо.1927 иестэ саезь 1950 иес Инекерсицясь важоди ды эри Аргентинань Масторсо (Буэнос-Айресес ошов).
1950 иестэ Степан Эрьзянень максть велявтомо совамо одов Советень Масторов, ды 1951 иестэ сон сась Москов ошов, ансяк тиринь, Эрзянь Масторов сонзэ эзизь нолда. Мартонзо усксь пек ламо эсензэ теевкст.
1957 иестэ Эрьзя ульнесь Казезь Важодемань Якстере Раське коцтонь орденсэ-тешксэ. Инекерсицясь Степан Эрьзя кулось сундерьковонь 24-це чистэ 1959 иестэ Москов ошсо. Калмазь Саран ошсо.
Рузонь музейсэ сехте покш пурнавкс Степан Эрьзянь теевксэнзэ, конань сон казинзэ прявтмастороньте.
Невтемантень совавтозь 31 кедьсэ теезь чувтосто ды лия материалсто рунготеевкст, конат улить Рузонь Музейсэ, ды 5-не Саран ошонь С.Д. Эрьзя лемсэ Мордовской республиканской изобразительной искусствань музеенть.
Таркась: Ине-Петрань ош, Михайловской замок, Садовая курось, 2. панжома чинть шказо 16:00.
Невтевксэнть ютавтома шкась: 2016 ие аштемковонь 15 чистэ — умарьковонь 8 чис
Паро мельсэ садо, ялгат!
©Портал «Erzäks.ru»
Невтевкс налткенть эряви максомонзо,
зярдо саят тестэ сёрмадовкснэнь.
Комментировать