Таштамковонь 6-це чистэ топодить 64 иеть
Владимир Иванович Ромашкинэнь чачома чистэнзэ
Эрзянь ды мокшонь ломантненень, кинь седейсэ палы вечкемась тиринь раськентень, сонзэ культурантень, а эряви толковамс, кие истямосбь Ромашкин. Пек ламонь туртов сонзэ лементь марто самай сюлмавозь минек эрзянь ды мокшонь моротнень марто васень вастовомась, кона поладовсь ды, кеман, ойместэнек уш а саеви-а нардави.
Вай, зяро иеть ютасть, кода арась мартонок Владимир Иванович Ромашкин! Сон чачсь сентябрянь 6-це чистэ, кулось августонь 29-це чистэ. Чачомазо ды куломазо ве шкас прасть. Ней бу тензэ топодевельть 60 иеть, ды вана уш эйстэст вейксэ иеть арась ютксонок. Арась – ды свал ули! Монень лиясто маряви, зярдо жив ульнесь – лемензэ ледстнесть аволь истя сеедьстэ. Куломадонзо мейле прок чадыведь таркастонзо сыргась, истя ламо мель кармась явовомо Володянень. Алкукс, седе вечктяно кулозтнень. Ледстнить лемензэ аволь ансяк невтемань кис. Покш тевть лемензэ марто ушолевить! Чачсть зярыя коллективть – Владимир Ромашкинэнь «Торамасто» пургондавкст: эйкакшонь, покшонь… Эряви меремс, эрьвасонть ули Ромашкинэнь таликась. «Вий» эстрадной коллективень прявтось Владимир Веряскин морыцянь эрьва покш пелькстамодо мейле видьксты: «Минь ушодынек морамо эрзянь-мокшонь моротнень Владимир Ромашкинэнь баславамодо мейле…» Аня Панишева прядсь Мордовской госуниверситетэнь национальной культурань факультет, ушодсь эрзянь моронь сёрмадомо, морась «Келу» ансамблясонть, ней уш изнякшны Анжелика Спиркина марто Московонь сцена лангсо. Текень мерить «Морденс» коллективсэ морыцятнеяк, Юрий Буянкин ушодсь морамо Ромашкин марто «Торамасо» . Ды а мезть уш кортамс сонстедензэ коллективденть, конань прявтсо ней Владимир Ромашкинэнь цёразо, Андрей. Аволь умок ансамблясь тешкстась эсензэ 15 иетнень, ульнесь покш концертэст, косо истя жо пек ламо паро валт ёвтазельть сонзэ ушодыцянть лемс. Мокшэрзянь раськень кодамояк покшчи ней, ловт, а ютавтови содавикс ансамблявтомонть! – Улезэ те мезеньгак презентация, выставка, концерт… — «Торамась» свал тосо – кенярдовты вечкицянзо-кунсолыцянзо. Течи, зярдо «Торамань» ушодыцянть Владимир Ромашкинэнь кулома чистэнзэ ютасть вейксэ иеть, арсеви, весемеде паро лецтямось сондензэ самай те – эзь ёма тевезэ, седеяк келейстэ сравтынзе сёлмонзо «Торамась».
Вирь ало Тавла веленть песэ кудынесэнть, конань зярдо-бути рамсизе Ромашкин аволь покш ярмакто, чувто ланга керсицянь «Эрьмезь» вейсэндявксонть ушодксонзо коряс ды васняяк сынст вийсэ панжовсь зярыя иеть теде икеле сонзэ лемсэ этно-кудось, ков сакшныть вана уш зярыя иеть сентябрянь котоце чистэ лемензэ ледстямо эрьва ёндо ломанть: кить содылизь ды а содылизьгак, вечкилизь моронзо. Покш питне путыть тензэ сонзэ творчестванзо вечкицятне.
Теде башка тосо ушодсть ютавтнеме эрьва кодат покшчить. Ромашкинэнь лемсэ эрзянь моронь фестиваль, «Кулдор-калдор» финнэнь-угрань юмористэнь фестиваль, лия тевть-ушодовкст… Эрьва ёндо ней сыть тов ломанть. Сыть сюконямо сонензэ, васолга-васолга эрзянь моронть вельде минек раськень лементь сравтницянтень…
Эри ломанеськак, бути эри лемезэ.
Минь, ловт ве шкань ды тетя лемсэ вейке-вейкенень зярдояк эзинек пшкалеяк. Одт ульнинек. Одсто туськак Володя эсь пингеде пингень таркантень. А ней вана сонензэ 60. Лади уш меремс тензэ тетя лемсэ: Владимир Иванович.
Володя! Владимир Иванович! Валом течи алтан тонеть. Сонзэ эйсэ тондеть ледстнемат. Эсень. Сеть ломантнень, кить содылидизь, кить вечкилидизь.
Конёвон ютксто муинь кавто панкскеть ды сынь мерят казимизь вастовомасо… Владимир Ромашкин марто. Конёвнеть, эсень тешкскень – ды, вант вана, зяро вий эйсэст: ловномстост пек парсте лецтявсь, мезде кортынек ды мик кодат ёжонок ульнесть сестэ. Лецтявсь натой, кода ёвтнемстэ цитнесть Володянь сельмензэ, кода валдосто сон мизолдсь.
А мерян, ульнинек мартонзо покш ялгакс, ансяк вастовоманок свал ульнесть лембеть, талновтыцят. Володя ёвтнесь «Торамадо», косо ульнесть, кода лембестэ вастасть сынст. Мон, сонзэ кунсолозь, дивинь ды кенярдынь: оно кодат ломанть улить ютксонок! Стакачитнеде соодазь, снартнинь мейсэяк ды лездамс Володянень. Се вастовомастонтькак кортамось мольсь теде. Мон сёрмадокшнынь сондензэ, ансамблядонть, ансяк, марявсь тень, Володянь мельс сёрмадовксом эзь туе. Эйсэнзэ ульнесь пеняцямо – а пек лездыть ансамлянтень. Сон витимим: лездыть! Ды ёвтнизе, те макссь тензэ ярмакт Швецияв, лиясь – Финляндияв… Лезды республикань Прявтонок Николай Иванович Меркушкин се шкасто саезь, зярдо Володя якась Теньгушевской районов шокшатнень моротнень пурнамо. «Уш бути ули мелеть тенек лездамс, сёрмадт минек моротнеде, — энялдсь Володя, сынь надобиядо парсте ойметь лецить…»
Ёвтнесь, кода эсь эйкакшонзо марто чинь чоп морсить. Фая шабраст, келя, яла мери тензэ: «Те кить истя минек кудосо пель ие свадьбат тешкстыть?»
Сонзэ пельде марякшнынь сестэ неть валтнэньгак: «Бути раськень культурась ёмамо лангсо, эряви муемс ломань, кона виев кедензэ вийсэ таргасы сонзэ кулов потсто». А содан кинь сынь, паряк, эсензэ Ромашкинэнь, ансяк, марявсь тень, сынь, эстедензэяк. Сон истя эрясь, истя тейськак эрямонзо — илязо ёма тиринь раськень культурась.
Ломанень обуцясь истямо: а неемс максозь тенек паронть. Зяро теде кортазь, зяро валмеревкст пингестэ пингес тень ланга ладсевсть… Ды ялатеке те паронть редясынек ансяк сестэ, зярдо сон туи, ёми, сайсызь маластонок…
Зяро янксемат, эсь прянь чумондомат тень кувалма…
Сеедьстэ эрси: паро валтнэнь ломанденть ёвтыть куломадонзо мейле, прок те шкас сонзэ эзть редя. Сельмень сявадстомась кинь-бути кирди тень эйстэ эли мельтемечись?.. Володя вастневсь эрьва мезе марто, куш а мерят: питнензэ кияк эзь сода, эзь редя. Содасть, несть. Ялганзо, тонавтыцянзо, покш прявттнэ… Аволь кувака пингензэ перть сон кенерсь теемс минек раськень культуранть туртов пек ламо: невтемстэнзэ кепедизе питнензэ-мазычинзэ мирэнть-масторонть келес. Секс, нать, течияк ризнэвти эйсэнек арсемась: мекс истя рана сон тусь? Кода рана… Иетне молить – те арсемась шкантеньгак эзь нардавт ды пешти седеенек течияк ризкссэ.
…Вишка пингева Володянь эзть кольневтне. Таня патянзо марто кассть тетявтомо. Нужачи эзть сода ды ялатеке урозчись, сельмень сявадомась ульнесь эрямосост. Аваст, Мария Григорьевна, ульнесь тонавтыцякс, сонзэ вечкилизь эйкакштне ды пек кунсолость. Кудосо вана кольневтемат патят-ялакст пельдензэ эзть сода, а истямоль те авась.
Кассть сынь ве ульцясо: Ромашкин Володя, Викторов Ваня, Павлухин Володя, Еделькин Володя… Ульнесть ялгат, пингес кадовсть ялгакс, вейке вейкенень лездыцякс. Икелепелев мерян, Ромашкиннэнь сы тевсэнзэ ялгатнень лездамось пек маштовсь.
Володянь эйкакшпингедензэ ёвтнесь тень Валентина Юдина, минек содавикс поэтэссась. Эрясть сынь карадо каршо, Володя секе тев сакшнось тенст, сельмезэ сявадсь: Юдинтнэнь ульнесь тетяст. Михаил Петрович важодсь лесокомбинатонь прявтокс, ломанесь чарькодицяль, кортниль Володя марто, кевкстниль, кода тонавтни, мезе теи ютко шкасто. Кармавтсь яла: илязо ризнэвте аванзо. Паряк, цёра ломань марто самай неть кортнематне весемеде пек таргасть церыненть шабрав. Васенце классо сынст Валя марто озавтызь ве парта экшс. Мезеяк берянь теньсэ арасель, авольть ушодо эйкакштне лангсост пеедькшнеме: «Тили-тили, теста, жених и невеста…» Сельведьс пачколесть Володят-Валят. Савсь озавтомс сынст зярыя чинь ютазь башка. Ансяк ялгаксчись эзь нардаво ютксост, вейсэ топавтсть кудов максозь уроктнень, лездасть вейке вейкенень. Юдинтнэнь кшнисэ вельтязь голландкаст свал формула потсоль – сон ульнесь доскань таркас, конань лангсо решасть задачат.
Танят-Володят оштё школасо тонавтнемстэ морсесть сцена лангсто. Мейле Володя тонадсь гитарасо седямо, ялганзо марто тейсть ансамбля, налксесть чокшне ланга танцплощадкасо. Ицялонь се шкань од ломантнень туртов те ульнесь уцяскав ды мазый шка. Весе свал учость, зярдо кармить седямо Ромашкин ды ялганзо.
Володя покш мель явсь спортонтень, сонзэ ульнесь боксонь коряс разрядозо. Ды ялатеке музыкась изнинзе лия бажамотнень, школанть прядомадо мейле Володя моли тонавтнеме музыкальной училищав, дирижерско-хоровой отделенияв, теде мейле, шкань ютазь, Казанень консерваторияв.
Казаньсэ тонавтнемстэ Володя ламо мель явсь моротненень. Се шкава тосо, госуниверситетэнь историянь факультетсэ, ульнесь патриотической моронь клуб. Ромашкин якась товгак. Историянь наукань докторось И.М.Ионенко сонсь вечкиль морамо, секс студенттнэсэяк сыремтсь те бажамонть. Володя свал эрсиль тосо, ансяк меленть явсь аволь патриотической моротненень. Сонзэ пек вадрясто лиснесть пейдема моротне. Морсесь Сергей Никитинэнь, Юрий Визборонь моротнень. Те шкадонть ёвтнесь тень исторической наукань докторось, профессорось В.А.Юрчёнков, кона истя жо тонавтнесь сестэ Казаньсэ, исторической факультетсэнть.
Кизна, Мордовияв самсто, Володя пурныль творческой группа ды концерт марто ялгатне ардтнесть минек велетнева. Гитарадо башка сон ней уш маштсь седямо нудейсэ. Эрзянь-мокшонь джазонтень бажамотне-эскелькстнэ саить ушодксонть тосто, авторонь моростонть, сеть концерттнэстэ, вастовоматнестэ.
В.А.Юрчёнковонь ды В.И.Ромашкинэнь китне-янтнэ таго вастовсть Саранскойсэ, ней уш МНИИЯЛИЭ-сэ, косо Володя седе домкасто кармась марямо-чарькодеме народонь моротнень домкачист ды смустест. Сон аволь весть ардтнесь Татарияв, каратайтненень, тейсь сындест телефильма. Ф.Жиганов, институтонь се шкань директорось, кода маштсь лездась Ромашкиннэнь. Ды кода а лездамаль сонензэ, зярдо весе несть, кодамо покш мель цёрась явсь кочказь тевентень. Сон вечксь экспедициятнень, маштсь ломантнень марто кортамо, ванстозь-мелявтозь пурнась минек раськень кельвалонь, моронь сюпавчинть. Володянь обуцясь истямоль – эрьва ломаненть оймес-седейс муиль ки-ян. Сонзэ марто шождаль якамс велетнева, куш сыре баба, куш од цёра – эрьвась панжиль икелензэ оймензэ, лездыль минек кезэрень творчествань пурныцятненень. Сонзэ марто весенень пароль.
Гуманитарной наукань научно-исследовательской институтонь неень директорось В.А.Юрчёнков ней арси нолдамс магнитофонс сёрмадозь весе пурназь моротнень, конатнень эсь шкасто туекшнынзе институтов В.И.Ромашкин, электронной вариантсо. Ламотне эйстэст совасть «Памятники музыкального творчества» пурнавксонтень, конанень покш питне путсь ЮНЕСКО-сь.
Нать, аволь наукас алтазель Володянь пингезэ. Институтсо улемстэ сон сайсь эстензэ сень, мезесь эрявсь тензэ сы шкань тевсэнзэ ды аламонь-аламонь лиссь се кинтень, кона тешкстазель тензэ менельстэ. Цёрась яксесь Рав чиресэ ютавтневиця Грушинэнь фестивалев, «Строитель» клубсо пурнакшнось моронь сёмадыцят-ладсицят, каратайтнеде, кода уш кортынь, эрзянь койтнеде фильмат тейнесь… Гуманитарной наукань институтсо улить сындест сонзэ кавто статьянзо. Ды тень пачк капшазь мольсь эсь тевентень. Сон уш маласоль, ансяк зярс эзть содаво паро ладсо сонзэ тешксэнзэ.
Геннадий Дулкин, — сонзэ марто самай вастовстькак Володянь китне-янтнэ «Торамань» теема шкастонть, — ёвтнесь сынст вейсэнь мельтнеде-бажамотнеде, седе, зяро савсь майсемс эсь прянть невтемга. Цёратне бажасть теемс инструментальной ансамбля, косо бу гайгевельть нудей, кальцяемат, пувамот, торамо… — Нурькинестэ, сеть седямопельтне, конат ванстовсть, пачкодсть течинь чис.
— Володя кассь интеллигентэнь семиясо, раськень моротнень маринзе ансяк консерваториядо мейле, эрзянь келенть ушодсь тонавтомо колоньгемень вете иесэ. Мон те шкас эзинь стувто, кода пейдевтсь эйсэнь эсь кортавкссонзо… — ёвтни Г.Дулкин. — Вейкесь минек вейсэндясь се шкава: а сон, а мон эзинек марсе, кода морыть эрзянь цёратне…
Цёрань вайгеленть сынь маризь моросо 1990-це иестэ Йошкар-Оласо, ков якасть «Фенно-Угрия» фестивалев. Эстониясто тов сакшнось Виктор Данилов, седей потмаксос эрзянь ломанесь, кона содась пек ламо эрзянь морот ды пек вадрясто, раськень койтнень коряс, морсесь сынст. Сон, тиринь культурань покш содыцясь, кортыль финно-угрань ламо кельтнесэ, кемевтинзе Ромашкинэнь ды Дулкинэнь: цёрань морамось мокшэрзянь раськень культурасонть – се лопась, кона прась раськенть историястонть ды сонзэ эряви кепедемс. Владимир Ромашкин поладызе тевензэ Мордовиясо, пурнась цёрань ансамбля. Зярдо васоло Эстониясо стака ормась куродызе Виктор Даниловонь, сон мелявтозевсь: ёми пингень перть пурназь сюпавчись – минек раськень сюпавчись. Энялдсь малавикс ялганзо туртов: весементь, мезезэ ули, эряви пачтямс Ромашкиннэнь. Ансяк сон чарькодьсынзе пурнавксонзо.
Данилов ульнесь финнэнь-угрань раськетнень творчестваст покш содыцякс, Ромашкин марто сынь кортасть ве кельсэ, чарькодевикс кельсэ. Эзь кенере Володя ялганть мелензэ топавтомо. Кода эзь кенере теемс ламо лиянтькак…
Кавто эрзянь цёратнень, Владимир Иванович Ромашкинэнь ды Геннадий Васильевич Дулкинэнь вастовомаст, путсь ушодкс «Торамань» теемантень. Кода уш кортынь, Ромашкин те шкантень прядокшнынзе Саранскоень музыкальной училищанть, Казанень консерваториянть, МНИИЯЛИЭ-нь аспирантуранть, Дулкин Саранскоень музыкальной училищанть прядомадо мейле сась важодеме Народонь творчествань кудос. Сынст васняяк вейсэндинзе мелесь-арсемась — вельмевтемс мокшэрзянь раськень инструментальной музыканть. Кезэрень налксемапельтне: нудеесь, кальцяемась, пувамось ды торамось муизь эсь таркаст «Вешкема» ансамблясонть, конась пурназель 1989 иестэ. «Вешкеманть» марто самай якастькак сынь Йошкар-Олав. Фестивальстэ самодо мейле Владимир ды Геннадий кармасть варштнеме виест мокшэрзянь цёрань вокалсонть. Ламо иеть ютасть се шкастонть, зярдо ушодызе морамонть «Торамась». Ледстневить мельс сынст васенце моротне. Марсинь сынст радиова, телевизорга: карьсэ ды кепе цёрат, оршазь кезэрень панарсо, морыть морот, конатнень валосткак лиясто а чарькодевить, ды ялатеке токить сынь витьстэ седейс. Веенст моротне пек мольсть лайшема ёнов, лиятне – тердема ёнов. Кода ёвтнесь мейле уш Андрей Ромашкин, лиясто раськень морось истямо кувакаль, эйсэнзэ натой 100 куплетт. Сёрмадомсто мерить бабинентень, келя, тон морык моронть целанек. Бабинесь каршозост: «Бути целанек мораса – кулан…» Ансамблясь морсесь 10-15 куплетт, бути жо лисильть сцена лангс – 6-7 куплетт.
1991-це иестэ, июньстэ, цёратне, — ней уш «Торама» ансамбля (те лементень састь вейсэ, превть путсь-макссь художникесь А.С.Алёшкин, кона парсте содасы минек фольклоронть), — тердемань коряс тусть Финляндияв. Ниленьгемень вете чинь перть цёратне ардтнизь раськень масторонть трокс ды кувалт, невтнесть эсь концертэст 120 церьковава, чизэнзэ кавто-колмо концертэнь макснезь. Сындест сёрмадсть весе газетатне, эйсэст невтнесть телевидениява. Морост гайгсть радиова – весе программатнева.
Самай се шкастонть, Финляндиясто велявтомадо мейле, мон седе парсте карминь содамо Ромашкинэнь. Сон сась тенек издательствав, се шкань директоронтень А.С.Лузгиннэнь, покш мельспаросо невтнесь весе газетатнень, листовкатнень, плакатнэнь, фотографиятнень, конат нолдазельть Финляндиясо «Торамадонть». Ёвтнемадонзо минек эйсэяк кассь-кенерсь раськенек кувалма аёвтавикс мельспаро. Мон снартынь Ромашкиндэ, «Торамадо» эсенек газетас сёрмадомо. Володя максызе тень весе материалонть, ансяк те сёрмадомась таргавсь течис. Тенень ульнесть тувталт, конатнеде аламодо уш ёвтнинь икелепеле.
1991-це иестэ цёратне тусть Нефтекамскоев презентациянь международной ярмаркав, косо комсь масторонь коллективтнень ютксо лия ёнов а молиця морамонть кис ульнесть казезь васенце таркасонть. Те изнямодонть мейле самай ансамблясь саизе неень лемензэ. Кист таргавсь омбо масторга. Финляндиядо мейле ульнесть Швеция. Англия… Фестивальть, концертт… Минек цёратнень вельде раськеденек содасть уш мирэнь-масторонь келес.
Нефтекамскойсэ Международной ярмаркасо улемадо мейле, сынст тердизь мик кото масторов! Ансяк «Торамась» ковгак эзь моле – ярмакост арасельть ды кияк тенст мезеяк эзь яво. Тосо содасть, тесэ жо, эсенек масторсо, сынь прок мерят арасельтькак. Ды сестэ «Торамась» сыргась Смоленскоев, «Голоса России» фестивалев.
Смоленскоев вана, кода а стакаль ярмактомо сыргамс – сыргасть! Эрясть апак ушто турбазасо ды тень лангс апак вано изнясть! «Торамась» лиссь весемеде икелев. Васенце таркас! Истя изнязель тиринь мастороськак минек раськень моротнесэ, эрзянь ды мокшонь алятнень талантсост.
Седе тов ульнесть од вастовомат. Од масторт, од изнямот… Истя весе мольсь 1998 иес.
Самай сестэ мон сермадыяк васенце материалом, кона алтазель Ромашкиннэнь ды «Торамантень». Шкатне ульнесть, эрьвась соды, пек стакат, секскак мон эсь очерксэнь аволь ансяк шнынь «Тораманть» — ряцек ёвтынь эрямонок, культуранок кувалма ризксэм. Ды те самай эзь туе Володянь мельс. Ансяк ламо иень ютазь максан те апак печата статьястонть саевкстнэнь целанек, куш, витьстэ меремс, смустесь аламодо нардавсь.
«Косо бу те аволь уле, вере аштицятнень кедьсэ эли эсь юткова кортамсто, зярдо ледстяви минек культурась – сельмень икеле сеск сти Володя Ромашкин, «Торама» фольклорной ансамблянть прявтось, кона гайги меельце иетнестэ аволь ансяк минек масторсо – томбалеяк. Сеске мик а лецтявитькак весе мастортнэ, косо сон уш ульнесь: Финляндия, Австрия, Швеция, Англия, Германия, Венгрия… Сельмень икеле ашти Володя Ромашкин, минек эрзянь цёрась, сэрезэ – малав кавто метрат, мазы чачо, куцьканонь судо, варштавкс марто, конадо а кекшеват, ды истят кеметь мельть-арсемат прясонзо, конатнень кувалт цёрась тунь а кавтолды… Ды истямо виесь – Володя Ромашкин — сельмень икеле ашти кедень венстезь… Виськс, амазы, апаро – ансяк те минек неень эрямонть весемеде редявикс невтевксэзэ. Те минек неень шкань культуранть, весе минек эрямонть тешксэзэ.
Венстезь кедесь – культурань кудотнева, библиотекатнева «керязь» телефонтнэ (сынст кис апак пандо), издательствань редактортнэ энялдыть рамамс книгат, конатнень максызь тенст зарплатань таркас, минек поэтнэ ды писательтне сынсь микшнить эсь сёрмадовксост-книгаст. Врачтнэ, музыкантнэ микшнить шапкат, кассетат… Кие тень а теи, ёжовтомо пракшны вачо пекеде эли каи прянзо симемас, поезд алов…
Ды, тень лангс апак вано, ялатеке гайгить морот, лиснить книгат, библиотекатнесэ ютавтневить ловныцятнань марто вастовомат. Невтневить художественной выставкат. Кевкстемс: кинень те эряви, бути мезеньгак кис ярмакт а пандыть?..
Миненек ды сетненень кить сыть минденек мейле.
Мазый валт, мертядо. Паряк, истя. Ансяк сеяк виде: весе минь важодтяно васняяк шнамонь апак учо, сы шканть лезэс. Нужась комась вельксэзэнек. Ансяк минь а синдевицят, седеяк покш мельсэ тейтяно вечкевикс тевенек.
Ромашкин ды сонзэ «Торамась», эрзянь моронть вельмевтезь виезэ –алкукс сы шкас эскелькс. Те минек ули-паронок. Сюпавчинек. А стяко истямо покш мель явить омбо масторга те минек сюпавчинть лангс – сонзэ эйсэ ванстови раськенть оймесь. Зяроцеде кунсолан «Торамань» моротнень, «Тюштянь»… ды седеем пешкеди а ёвтавикс кенярксто, прок эрьва моросонть монсеньгак оймем, кона вайгелень таргамсто кепеди верев монь эйсэяк.
«Торамань» моротне сёрмадозь лазерэнь диск лангс. Зярс кияк Мордовиясо теньс эзь пачкоде. Ансяк вана кевкстнян Володянь вастовомсто:
— Мезеньгак пандовкс тень кис ули?
— Неят, вана тесэ вишкинестэ сёрмадозь лемем… — корты тень сон.– Тень кисэяк пильгес сюконян омбо масторонь лездыцятненень. Кадык истя ды ванстовить минек моротне.
Истя вана минь ванстатано минек сюпавчинек. Ансяк кинь течи те пек талновты, кодамо бороцицянть те кармавтсы ризнэме? Минь тонадынек ансяк бороцямо… Минсь кадык вачотано, кадык пезнынек асатыкстнэс. Ансяк макст тенек бороцямс…Властенть кис, идеятнень кис, чи ало тарканть кис, лия мезенть кис…
Окойники зярдояк ойматано, ялгат? Зярдояк арсезевтяно: «Мезе кадови минденек мейле?» Арсезевтяно-арась азорокс: нать, раськенть вандынь чизэ, сонзэ культуразо, сюпавчизэ ды мазычизэ – трешникень питнесэть?.. Улема, сюпавтнэнь питней кудост седе эрявить?.. Тердян арсезевемс весень. Тердян сюпавтнэнь ды «од рузтнэнь»…
Арсезевтяно…»
Те статьясь сестэ эзь лисе. Володя ловномодонзо мейле тень мерсь: «Весе истя. Ансяк лисемадонзо мейле монень а кармить мезеньгак максомо».
Сюкпря, ней шкатне полавтовсть. «Торамась» теевсь седицянь-морыцянь пек содавикс коллективекс, Ромашкинэнь содасызь весе Финно-Угрияванть. Сонзэ содамочись, маштомачись, чарькодьксчись цидярдызь весе стакачитнень. Полавтневсть коллективсэнть ломантне, апак учонь стакачить лиснесть эрьва ёндо (ушолевсть судебной тевть, «Тораманть» лоткакшность невтеме телевидениява, моронзо лоткакшность марсевемеде минек республикань радиосояк — а чарькодеви мезень кис пандсть кежть…), ялатеке «Торамась» эрясь, морась! А ютниль ве концерткак, косо сон а лисевель сцена лангс, ды свал ваныцятне вастасть эйсэнзэ кецязь. Кадык ютыльть моро марто кедень венстезь – ней уш те коесь теевсь налксемакс, конань коряс неявсь, кинь кодамо оймезэ – максыть-а максыть лескс… «Торамась» виензась од эскельксэнь тейнезь. Сон уш налксесь-морась джазонь седиця марто ды киштиця марто. Морась аволь ансяк эрзянь ды мокшонь, лия раськень мороткак. Россиянь эрьва областьсэ, республикасо, косо эрить эрзят ды мокшот, сон ульнесь вечкевикс инжекс, сыремтиця штатолокс, конань эйстэ эрьва косо кирвазиль раськень койтнень, моротнень содамо бажамось. Истя ульнесь, ды тень кис весе Финно-Угриянть пельде пачкодезэ тоначискак Ромашкиннэнь минек сюкпрясь. Лецтясынек, теде башка, истят покш концерттнэнь, конат алтавсть республикань покшчинтень, ине Эрьзянь 125 иетненень. «Торамась» эрьва косоль, кенериль эрьва ков. Ды Ромашкин ульнесь раськень творчестванть весенень покштояк покш пачтицякс-кандыцякс. Те капшавтсь сонзэ эрямо, кважодеме, ламонь тееме. Кармавтсь кенереме эрьва ков. Мезес ансяк сон а кундыль, ансамблянтень концерт марто ардтнемс ярмаконь добовамга! Ве шкасто кармсесь модамарень кастомо, мейле – скалонь кедень тееме…Медьгак ушолесь таргамо-микшнеме. Отяжелесэ ульнесь паро ялгазо –К.Я.Казеев, кона тонавтызе, кода кезэрень шкава минек сэрдятне пурнасть-анокстасть вирьга медь. Володя сыремсь, ансяк те тевеськак сюпавокс цёранть эзизе тее. Кой-кить арсесть сондензэ кода коммерсантто, сельмест мик сявалесть сонзэ лангс. Ансяк вейкесь эзь сатно те»коммерсантонтень» – эзь машто манчеме, эзь машто ярмаконь тееме. Зярдо тень сонсь парсте чарькодизе, видькстась: «Мон – артистан». Ды уш эзь кундсе теде мейле лият кодат-бути тамашатнес. Содась, лезкс тень эйстэ а ули.
Теде ёвтнесть Владимир Ивановичень малавикс ялганзо Владимир Павлухин ды Иван Викторов. Цёратне содылизь Володянь, кода кортыть, нучк-пачк. Саемс куш тень: неть ялгатнеде башка кияк бу а ёвтаволь: школадо мейле Ромашкин сыргсесь тонавтнеме Астраханев, рыбной институтов. Тосто саизь армиявгак. Мейле уш тов тонавтнеме Астраханев сон эзь велявто. Армиясо ульнесь шифровальщикекс. 1971 иестэ, армиядо мейле, кармась тонавтнеме Саранскоень музыкальной училищасо. Теевсь содавиксэкс Н.И.Бояркин марто. Кист мольсть рядсек. Вейсэ важодсть «Памятники народного творчества» книганть лангсо – Володя пурнась материалонть. Ансяк вана учёноекс сон эзь карма. Мекс? Те кевкстеманть максния ялгатненень. В.Павлухин, паряк, весемеде видестэ ёвтызе тувталонть: Ромашкинэнь бути ансяк кияк пек кармавтовлизе – сестэ сон улевель наукань кандидатокс. Сестэ жо сонензэ те эзь эряво. Володянь мельс тукшнось пурнамс перьканзо велень бабатнень ды кунсоломс сынст, сёрмадомс мельгаст моротнень. Теньгак эрявсь маштомс тееме.
Ве шкане Володя рамась каладо кудыне Вирь ало Тавласо, ульнесь пизынезэ Рузаевкань районсояк, Ичалкань Ташкина велинесэяк. Сон усксиль тува омбо масторонь ялгатнень, невтсь сыненст минек эрямонть, койтнень, сонськак, паряк, тоналесь ваномо эрямонок лангс сынст сельмсэ.
Эрьва косо сонзэ ульнесть малавикс ялганзо ды тенень лездась раськень моротнень вейсэнь вечкемась. Сон эсь эйкакшонзояк – Виталянь, Андреень ды Галянь — тонавтынзе раськень моронь вечкеме-чарькодеме. Лецтнян, ёвтнесь тень Андрейде: келя, ушоды истя верьга морамо, мик ёжозо цёранть машты. Оно кодамо моронть виезэ!
Галянень кемголмово иесэ кармась пандомо стипендия Нижней Новгородонь Приокской райононь администрациянь прявтось – истя вечкевтизе минек раськень ломаненть «Торамась», эрзянь ды мокшонь морось. Виталянь саизь тонавтнеме Эстонияв, тосо церась эсь вийсэ тейсь кавто творческой коллективть ды тонавтни мартост народонь моротнень. Сонсь Владимир Иванович казезель Святой Мариянь крестсо – Эстониянть ды Мордовиянть ютксо ояксчинть кемекстамонть кис, теке иестэнть, 50 иетнень топодемань кувалма – сонензэ максозель Каролинской торось – кезэрень налксематнень вельмевтемаст кис. Фестивальсэнть, кона ютась Ленинградской областень Рощина велесэ, примасть участия ниленьгемень коллективть ды весемеде пек мельс тусь «Йовлат» ансамблясь, конасонть Ромашкинтнэ пурнавсть семиянек: эйкакштнэ ды тетяст.
Косо сон ансяк арасель, ков эзь пачколе! Зяро сон тейсь! – Ды тень лангс апак вано кияк зярдояяк эзизе марсе эсь прянь шнамсто. Сон шнась эрзянь раськенть талантонзо, моронзо, шнась «Тораманть»… Ды зярдояк эзь покшкавтне. Кияк куломодонзо мейлеяк Володянь теньсэ а чумондсы, кода а чумондови сон лиясооояк: пингензэ перть киньгак церась эзь покорда. Киньгак эзь сялдо. Сон чумочинь кисэяк. Чумонтеньгак муиль идема вал.
Владимир Иванович Ромашкин истя жо казезель «Мордовия Республикань культурань заслуженной деятель» лемсэнть. Уш куломадонзо мейле, 2002-це иестэ А.П.Рябов лемсэ фондось казизе Владимир Ивановичень лауреатонь премиясо тиринь келенть ванстоманзо кис.
Ансяк сонзэ таликазо эрзянь ды мокшонь раськень культуранть ванстомасо теньсэ а пандови ды а онкстави, шкась тень пек парсте невтизе.
2006-це иень сентябрянь котоце чистэ Вирь ало Тавла велесэ, зярдо Владимир Ивановичнень топодсть 55 иеть, се кудынесэнть, конань васоло 1989 иестэ рамизе Володя, панжовсь «Этоно-кудось». Сон пек бажась, штобу Вирь ало тавлав сакшновольть инжеть, штобу велесь соваволь этно-туристической маршрутонтень, конань коряс республикань седе ламо инжеть кармавольть бу содамо эрзянь моротнень, чувто ланга Вирь ало тавлань керсевкстнэнь.
Истя лисськак. В.И.Ромашкинэнь мелезэ топодема лангсо, курок те велесэнть панжови покш музей, велесь ули ловозь эрзянь раськень культурань ванстома таркакс.
Ромашкинэнь кондят ломантнень пельде эряви миненек тонавтнемс, кода вечкемс эсь тевенть, путомс тензэ ойменть, верьга кандомс эсь раськень лементь. Пельдензэ тонавтнемс сененьгак, кода маштомс ладямс эсь юткова, мазыйстэ эрямс. Аволь весе лиснесь тесэ Володяньгак. Ильведькстнэ ней уш а витевить. Се паро – ломанесь эсензэ трокс эзь стякшно. Те самай се кись, конаванть молезь ялатеке вастасак часиянть.
«Седе вечктяно кулозтнень…» А, паряк, мон стяко ушодкс валонть истя лемдия? Весе, мезе лисни менеленть ало, нать, Пазонть арсеманзо коряс моли-тееви, ды истямо эрямонь ки тешкстазель ютамс Володяненьгак, печтямс сеть кеняркстнэньгак, стакачитненьгак, конат сатотсть сонензэ. Сон мейсэяк эзь явово лиянь эйстэ: эрясь – сась шказо – тусь эрямостонть. Мейсэяк… Бути ансяк Пазось казизе оштё покш вечкемасо: эрямонтень, тевентень, ломантненень.
Те – покштояк покш казне.
Тамара Баргова
Комментировать