20015 иень, ожоковонь 30 чистэ, коли Россиясо тешкстыть Политикасо лепштязь ломантнень Чи, Петра ошсо ледстизь эрзятнень, конат ульнесть маштозь ютазь пингенть 37-38 иетнестэ.
П
етра ошонь ды Ленинградонь ёнксонь эрзянь ломанень «Эле» вейсэндявксонь совицятне пурнавсть ледстнема покш чистэнть Рябовонь Владимирэнь Павловичень Галина Владимировна тейтерензэ марто. Ульнесь кирвастезь Раськень Штатол вейс пурназь фотокувтнэнь вакссо, путозь цецят, эрзянь кельсэ лецтязь ульнесть ламо эрзятне, конат ульнесть маштозь не иетнестэ.
Владимир Рябов ульнесь ледезь 1938 иень панжиковонь 3 чистэ Саранонь тюрьмасо. Галина Владимировнане ульнесь вейке ие, зярдо тетянзо пекстызь, ды ансяк тамаша сонзэ ванстынзеть:
– Монь авам ёртымим вальма трокс эсензэ Соня сазоронтень, мартонзо ды васолбабам марто эринь вете иеть. Авакс Соня патяне меринь, – ледсти Галина Владимировна.
Рябовонь Владимир Павлович – те учёной-агроном, рузонь сёрмадеень ды валморозеень, СССР-нь Конституциянь эрзянь кельс ютавтыця. Сонзэ кедьалдо листь «Ёвкс калонь кундыцядо ды калнэде» (1937 ие), «Кинень Рузь лангсо эрямось паро»… ды седе ламо. Сон ульнесь ялаксокс Рябовонь Анатолий Павловичень профессоронть, конань марто вейсэ ульнесть маштозь.
Лецтязь ульнесь Васильевень Тимофей Васильевичкак, Рябовтнень сазорост Елизаветань мирде. Сон ульнесь васенце кие тейсь-чапсь МАССР-нть, ульнесь Мордовской кужонть судонть прявтокс, васенце омбомасторонь юрист Инебританиянь Масторсо. Ульнесь ледезь.
Кедькортавкска сюлмавинек Тимофеень Васильевичень Ламзурь (Кузнецова Элеонора Тимофеевна) тейтерензэ марто, кона эри Московонь ало.
Ансяк Мордовиясо 1937-1938 иетнестэ ульнесть маштозь 179 ломанть советэнь партиянь ды ёрокчинь важодемасто конат ульнесть эрзянь эли мокшонь раськестэ.
Эрзянь Валдо Ине лемест кадовить пингеде-пингес минек эрямос, ды эрзянь историяс. Маряви, Мараля эли Ушман валтнеде сынь эзть арсе, ансяк эрясть ды тейсть эсист тевест: сёрмадсть эрзянь кельсэ, ютавтсть минек тиринь кельс россиянь ды омбомасторонь сёрмадовкст, анокстасть од эрзянь келень тонавтыцят, пурнасть эрзянь валт велетнева… Эрясть ве валсо! Саизь ды леднизь!
Паз, чангодть! Паз, чангодть! Паз, чангодть!
©Портал «Erzäks.ru».
Невтевкс налткенть эряви максомонзо,
зярдо саят тестэ максозь сёрмадовкснэнь.
Комментировать