2016 иень сундерьковонь 2-це чистэ А.С. Пушкин лемсэ библиотекасо ульнесь Нуянь Видязонь (Е.В.Четверговонь) аволь умок лисезь книганзо невтема, ломань юткс ливтема.
К
ниганть лемезэ «Поладкстомо». Эйсэнзэ котосядто ламо лопат. Лангсост – Нуянь Видязонь эрямонзо перть пурнавозь сёрмадовксонзо. Чарькодеви, аволь весе.
Книгась явозь зярыя кувтас. Васенцесь – «Проза»; омбоцесь– «Статьят, тешкст шкинемадо, рецензият»; колмоцесь – «Публицистика, статьи, выступления», нилецесь – «Публикации из газеты «Эрзянь Мастор»; ветецесь – «Национальные герои эрзя народа». Вана истя нурькинестэ ёвтавить сёрмадыцянть стомамонзо-бажамонзо, важодемазо, аволь шождасто сыця мельссамонзо ды, мезть сёпомс, эрямозо.
Книганть пелят панжомояк. А се тандавты, кодамо сон эчке. Тандавты эсеть асодамочись, кона максы мендямс тонь куш кона ёнов.
… Нуянь Видязонь од книганзо лангс варштамо сакшность аволь пек ламо ломанть. Меельце шкастонть редян: ков седе аламо ломанть, тов седе лезэвстэ ды парсте юты покшчись. Арасть ве ёндонь сыцят, конат аштить ды кунсолыть ансяк ламочинь невтеманть кис ды колыть мель чаво вановтсост. Течи – весе эсенек. Кода кудосо, нурькинестэ меремс. Эно, инже вейке ульнесь: Марианн Бернхардт, Венгриянь тейтерь, кона сась тонавтнеме минек университетс. Сон тонавтни эрзянь келенть ды кортыяк эрзякс. Рузкс, мерсь, беряньстэ. Стака тензэ карми тесэ васень шкастонть…
Малав весе сетнестэ, кить сакшность, ёвтасть седейшкавань лембе валт. В.С. Брыжинский мерсь, кода те аволь вадря ды аволь паро – Нуянь Видяз те шкас арась Писателень союзсо. Ды а кода мартонзо пелькстамс тень коряс. Маризь Кемаль ёвтнесь, кода сынь теевсть содавиксэкс Нуянь Видяз марто, зярдо се васенцеде сась «Сятко» журналс. Сёрмадыцянть марто важодемадо кортась Людмила Рябова, кона ульнесь сонзэ зярыя книгань редакторокс. Сон мерсь, Нуянь Видяз пек машты кунсоломо ды ильведьксэнзэ лангсо важодеме ды тонавтнеме, седе вадрякс сёрмадовксонзо тееме.
Сонськак Нуянь Видяз ламо мезе ёвтнесь: авадонзо-тетядонзо, конатнень пельде сон саизе наукасо важодемань ды сёрмадомань сяткинетнень; эрзянь келень ванстомантень ды кисэнзэ тюремантень самодонзо; книгадонзо, конатнеде аволь аламо. Зярдо саизе кедьс меельценть, «Поладкстомонть», мерсь, келя Советэнь шкасто сонзэ кис саезь гонораронть лангс машина рамаволь, бути кирдемс мельсэ лия книганзо, – аволь вейкеяк. Ды, секень вант, ветицязояк улевель. Эстензэ весе тиражстонть лиядоволь, паряк, кеменьшка книгат, весе лиятне туевельть ловныцятненень. Ней ловныцятне киска мартояк а муевить. Косотадо, эрзянь кельсэ ловныцят? Те книганть питнезэ ветесядошка целковойть. Книгасонть, таго весть мерян, котосядто ламо лопат. Аволь умок вейке содавиксэм нолдась валморонь пусмо, конасонть сядо колоньгемень вете лопат, питнезэ – ветесядт целковойть. Сёрмадовкстнэ смустень коряс малацек а путовить. Ялатеке ломантне рамить, трокс-кувалт сынст. Мезеяк а чарькодян мон те эрямосонть.
Нуянь Видяз – чарькоди. Ды паряк миньгак мезескак тонадтано пельдензэ. Бути карми меленек.
Портал «Erzäks.ru»
Невтевкс налткенть эряви максомонзо,
зярдо саят тестэ максозь сёрмадовкснэнь.
Комментировать