Эрзянь ды мокшонь раськень культурань музейсэ панжовсь «Вирьавань паламо» выставка. Тесэ невтневить чувтосто керсицянть А.А.Наумовонь важодеманзо. Эрямонзо перть те – омбоце покш выставказо. Сонзэ теевксэнзэ свал невтневить республикань, весероссиянь ды раськеютконь выставкатнесэ.
Н
аумовонь Александр Алексеевич чачсь 1957 иестэ Покш Игнатбуень Ташто Чамзино велесэ. 8 класстнэнь прядомадо мейле сась Саранскоев. Тесэ поладызе тонавтнеманзо чокшнень школасо. Чить важодсь кабельной заводсо кшнинь керсицякс. 1981-1987 иетнестэ Покш Игнатовань Пионерэнь кудосо ветясь эйкакштнень туртов чувтосто керсемань кружок. Сонсь теке жо шкане тейнесь чувтосто важодевкст. Те тевсэнть сонензэ лездасть искусствоведэсь, СССР-нь Художникень союзонь членэсь Н.И.Шибаков, РСФСР-нь культурань заслуженной роботникесь Н.И. Мастин, Россиянь Народной мастерэсь П.В.Рябов.
Александр Наумовонь ламо важодеманзо теезь пекшестэ ды килей лангсо касовкссто. Лиякс меремс, те – сувель ды кап. Сеедьстэ истямо чувтонть а нолдыть производствас. Ансяк кедьчелькев ломантне маштыть сынст вельмевтеме ды тееме эйстэст скульптурань ды искусствань алкуксонь произведеният. Саемга, вейс тапавозь тарадтнэнь лангс ванозь, неят эйстэст ёвксонь геройть. Стака важодемс те материалонть марто.
«Вирьавань паламо» выставкасонть невтезь 100 важодемат. Весе сынь явозь темань коряс. Покш пелькс алтави православиянь темантень: «Распятие», «Икона», «Серафим Саровский». Нама, авторось эзизе юта вакска раськень теманть: «У истоков», «Моление на камне», «Эрзянка», «Богиня огня». Невтевить велень эрицятне: «Пряха», «Пастух», «Пчеловоды», «Охотник». Мастерэнтень парсте невтеви, кодамо ёжосо ашти сонзэ героесь.
Выставкав сакшность инжеть Покш Игнатбуестэ ды тосо чачозь ломантне, конат ней эрить Саранскойсэ. Кой-конат мельспаросо тешкстасть: мастерэнь произведениятнень эйстэ содызь эсь шабраст ды малавиксэст. Тесэ натой ули чувтосто эсензэ автопортретэзэ!
Лембе валонь ёвтамо сакшность МР-нь Правительствань Председателень полавтыцясь Е.И.Дергунов, МР-нь Культурань ды туризмань министрань полавтыцясь Н.Л.Храмов, Покш Игнатбуень райононь прявтось Т.Н.Полозова ды лият. Весе сынь арсесть те сэтьме ломанентень, кона састыне топавты вечкевикс тевензэ, кеме шумбрачи ды творчествасо од изнявкст.
Татьяна МАТОРКИНА
Фототне: Э.Ретунскоень
«Эрзянь Правда»
©Портал «Erzäks.ru»
Невтевкс налткенть эряви максомонзо,
зярдо саят тестэ максозь сёрмадовкснэнь.
Комментировать