Сарансо Эрзянь ды Мокшонь раськень драмань театрасо ютась Мордовия Республикань раськетнень ды культуратнень вейсэндявкстнэнь коряс од ломанень Промксось. Пуромкшность Мордовиясо эрьва кодамо эриця раськетне.
В
асняяк ваннозель 2016 иес важодемань лувось. Сонзэ эйс совасть пелькстамот, этнокиштемат, раськень чокшнеть ды ламо лия мезе.
Промкссонть кочказель прявт. Те – Астайкина Инна эрзянь тейтересь, кона чачсь-кассь Покш Килей ёнксонь Симкина велесэ. Инна прядызе Н.П. Огарёвонь лемсэ университетэнь филологиянь факультетэнть, «Журналистика» куронть. Ней сон тонавтни магистратурасо ды важоди Рав лангонь финнэнь-угрань культурань куросо. Теде башка Промкссонть кочказельть прявтонть лездыцянзояк: Тремаскина Олеся (Н. П. Огарёвонь лемсэ университетэнь омбомасторонь кельтнень факультетэнь студенткась), Юнусов Хусейн (3-це № Республикань клинической пичкавтомань кудонь хирургось) ды Худаяров Шакир (Н. П. Огарёвонь лемсэ университетэнь механикань ды энергетикань Институтонь студентэсь).
Эряви меремс, Мордовия Республикань раськетнень ды культуратнень вейсэндявкстнэнь коряс од ломанень Промксось теезель Рав лангонь финнэнь-угрань культурань куросонть. Течи сон топавты раськетнень ютксо вейсэндямонь важодема. Истят Промкстнэ максыть седеяк вадрясто невтемс од ломантнень эрьва кодамо тевсэ ды кастомс сынст содамочист.
Теде башка Промксонтень сакшность Мордовия Республикань од ломантнень тевест коряс Государственной комитетэнь прявтонь полавтыцясь И. В. Пятаев, Мордовия Республикань раськень политикань коряс Министерствасо важодицясь, регионтнэнь ды раськетнень ютксо сюлмавоматнень коряс куронь прявтось А. М. Кочеваткин ды Рав лангонь финнэнь-угрань культурань куронь прявтось Р. И. Акашкина. Сынь ёвтасть од ломантненень поздоровт ды арсесть тенст топавтомс икелест аштиця весе путовкстнэнь.
Астайкина Инна, Данильчев Александр
саезь Сантяй-кулят
©Портал «Erzäks.ru»
Невтевкс налткенть эряви максомонзо,
зярдо саят тестэ максозь сёрмадовкснэнь.
Комментировать