Велесэ сыре ломантнень марто кортамсто марят эрьва-кодат валмеревкст, превс путыця валт-арсемат, конатнесэ покштояк покш смусть. Умок арасть монь покштям-бабам, а вана сынст превей арсемаст, конатнень, улема, сынь маризь эсест покштяст-бабаст пельде, шкань ютазь лецтявить.
Св
ал мельсэм, кода Васол бабам ильтясь эйсэнь важодеме университетсэ тонавтнемадо мейле. Чаньстимим истямо валсо: «Тейтерем, ломань ютксо валот кепедезэ». Эрзятне содызь валонть питнейчинзэ, секскак кортасть: «Валось ёвтамадо икеле порема», «Кежей вал – сельмс сал», «Ве валось ёмавтанзат, ве валось идетанзат». Сыре ломантне од ломантнень истя превс путсть, од тейтерентень мерильть: «Тейтерем, эрян – марямак, кулан – лажамак: иля моле сенень, кинь мельга чийнят, мольть сенень, кие мельгат правты», «Паро скал велестэ а нолдыть, паро тейтерь омбо велев а максыть». Мирдень обуцядо кортыльть истя: «Уле: «мирде», уле: «мирдине», уле: «ох, мирде». А вана истямо валсо кортасть од ломантненень, зярдо сынь сюлмасть эсест эрямост вейс: «Кинь марто чись стясь, сень марто чополгадозо». Зярдо авась мирдевтеме эриль, сенде згилязь мерильть: «Мирдезэ тунда эй лангс чавовсь». Ломанень уцяскадо истя арсесть: «Кинень зяро пазось талант (уцяска) каи, лиянь пингензэ перть карво а сусксы». Лецтнян, кода авам эле бабам мурнесть, зярдо минь, эйкакштнэ, а пек парсте топавтылинек тевенек: «Вай, кедтне-пильгтне оймить, седеесь «тарцк» а тее». Ломанень обуцят вейкетть а эрсить. Эрьванть эсензэ асатыксэнзэ, «эрьванть эсензэ ормазо». Истя нузяксонть лангс ванозь мерильть: «Чить-веть ютавтне», «Нузяксонть свал пекезэ сэреди»; чауладонть – «Чаванька», «Вере песэ роднянзо арасть», «Чаво мешоксо вачкодезь»; аксун ломанде — «Эх, алюха». Бути кияк пижни-машнети, се «Содт пувси». Кона ломаненть кедьстэ стака мезеяк вешемс, сенде мерильть: «А сускозь, а ускозь», «Лисьма лангсто ведьтеме ильтятанзат». Кие налкставтанзат, сенде истят валт ёвтават: «Теке лёмзий педясь», «Назой карво», «Седей кельмевкс». Лия ломанентень кодаяк а савтови, сень ланга истя кортыльть: «Мартонзо а псистэ, а кельместэ». Сеедьстэ истямо ломанесь кежеть савтылинзе, сестэ машнетезеват: «Эрьванть икеле а сюконяват». Бути васодить кавто вейкетть, сестэ истя лангаст кортыть: «Чайтян чайтянонзо Иневедь томбальде мусы», «Ялга ялганзо мусы». Мельс сы истямо арсемаяк «Алашась содави вашокс, ломанесь эйкакшокс». Сюпавчинть ды мекевланк, аразьчинть невтить истят валрисьметне: «Уле: верьга пуве, алга юводи», «Улезесь – мере невтемак, аразесь мере – кекшемак», «Кшивтеме – пекесь чевтеме», «Эрямось кармавтанзат – татаравантеньгак «Патякай» мерят». Кинь ловсть сюпавокс, сетнеде мерильть: «Весеме таркаст уле», «Парось тенст орта алгаяк сови». Эрзятне весементь бажасть таштамс-анокстамс, седеяк теле лангс, содасть: «Теле – вачо пеке кувака». Икеле пингень ломантне стяко шкаст эзть ютавтне, маштсть шкаст ванстомо. Бути чись стяко ютась, тевтеме, янксесть: «Киска чим поризе». Лецтнян, та-кода ве сырькаень кедьсэ кувать аштевинь, туемстэ меринь: «Вай, шкат саие», тень каршо сон стамбарнэ пшкадсь: «Мезеяк, пазонть шказо ламо». А вана те арсемась канды философской смусть: «Вандынь чись кадык сонсь эсь прянзо мелявтсы». Эрзянь аватне бажить кирдемс ваньксчисэ кудоюртонть, секскак теке тев шлить-нардыть, муськить, тень кувалт те валрисьмесь: «Муськомась-шлямось – патят-сазорт». Покштям яла кода симевель чапамодонть, омбоце чистэ кувси, эсь прянзо чумонды: «Эх, уле паз урма, уле лаз урма». А умок Маризь Кемаль, содавикс эрзянь сёрмадыцянть марто вастовомсто кортазевинек эрзянь валмеревкстнэде. Сёрмадыцясь ёвтась зярыя питнейдеяк питней ды домка смусть марто валмеревкст. Вана сынь: «Ярсамс эрявить пейть, эрямс – превть», «Сырненть сиясо а вельтить», «Максы кедь сизи, саезь кедь а сизи», «Эсеть эйдесь чишка-ковшка, ломаненсесь мастор повшка», «Кода важодят, истя ожодят», «Ленгегст ваясть, кевть кепететсть», «Инекужось серьгеди – пой лопатне верьгедить», «Кежев, ды важов», «Авань седей – кискань седей, тетянь седей – верьгизэнь седей». Неень шкасто весе неть валмеревкстнэнь, пштистэ ёвтазь валтнэнь, арсематнень марясыть чуросто ды бути ансяк велень сыре ломань пельде. Чарькодеви сеяк, эрьва велесэ, эрьва таркасо, косо эрить эрзят ды мокшот, муевить ансяк те таркасо вастневиця валмеревкст. Не питней арсематнень вельде невтеви раськень социально-исторической ды эрямонь лувось, сынь невтить раськень обуця, превть, панжить раськенть оймензэ, зэмензэ. Виде карми сынст пурнамс ды ванстомс лиятнень туртов.
Светлана Пивкина,
филологиянь наукань кандидат
©Портал «Erzäks.ru»
Невтевкс налткенть эряви максомонзо,
зярдо саят тестэ максозь сёрмадовкснэнь.
Комментировать