Неть читнестэ Саранскоень «Луч» Культурань кудосо васенцеде ютась Мордовиясо эриця раськетнень Регионъютконь культурань фестиваль. Пурныцязо – «Литова» эрзянь авань вейсэндявксонь прявтось Раиса Борисовна Щанкина.
Фестиваленть ютавтомс лездасть МР-нь Национальной политикань министерствась, Пролетарской райононь администрациясь, «Луч» Культурань кудось. Фестивалентень тердевсть самодеятельной коллективть, ськамост морыцят. Вешематнень коряс, эрявсь морамс морот эрьва кодамо кельсэ. Истя, концертсэнть гайгсть эрзянь ды мокшонь, рузонь, татаронь, украинецэнь морот. Мезе парось – совамось питневтемель, тей сакшность ламо ваныцят, весе сетне, кить вечкить тиринь кельсэ морот.
Культурань кудонь фойесэнть шкадо икеле гайгезевсть моротне. Малав весе, кить тей састь васолдо – пурнавсть вейс ды морасть весенень содавикс моротнень. Морасть сынсь, апак кармавто, весе седейстэ. Тесэ жо панжовсь покш выставка, косо невтневсть эйкакшонь важодевкст, викшневкст-кодавкст, картинат, Вирь ало Тавлань чувтосто керсевкстнэ (сынст ускизь Р.В.Водясова ды П.В.Рябов). А.С.Пушкин лемсэ Национальной библиотекась анокстась эрзянь ды мокшонь книгань выставка.
Мейле весе тердевсть залс. Концертэнть ушодызе МР-нь Заслуженной артисткась Анна Атласова. Сон морызе «Россиясо» седей эждиця моронть.
Теде мейле вал макссть МР-нь Национальной политикань министрань васенце полавтыцянтень А.И.Карьгиннэнь.
– Россиянть сюпавчизэ – те ламо раськетне. Весе ризкстнэнь ды мелявкстнэнь лангс апак вано, сынст эрявить ванстомс. Эряви эрямс ялгаксчисэ. Вана истят вастовоматнесэ, концерттнэсэ минь вейсэ чарькодтяно – эряви ванстомс сень, мезенек ули, – кортась Александр Иванович.
МР-нь Национальной политикань министерстванть пельде сон казсь фестивалень вейке участникентень – Л.Н.Понятованень, «Равось – ояксчинь лей» этнокультурной экспедицияв молемань сертификат.
Истя жо лембе валт фестивалень пурныцятненень ды инжетненень ёвтасть Эрзянь ды мокшонь раськень регионъютконь общественной вейсэндявксонь Исполнительной комитетэнь Председателесь А.С.Лузгин, Равчирень Финнэнь-угрань раськень культурань центрань прявтось Р.И.Акашкина.
Кода уш ледстинек, те фестивалесь – регионъютконь. Саемга, шабра Пенза ёнкссто састь колмо коллективть: Пензасто «Ялгинеть», Бессоновской райононь Чемодановка велестэ «Манине» ды Пазялго велестэ «Чевгелина» ансамблятне. Весень лангсо мазыйдеяк мазый оршамопельть, ансамблятнесэ морсить цёраткак.
«Ч
евгелина» ансамблянь художественной руководителенть Людмила Николаевна ПОНЯТОВА марто кортнинек.
– Людмила Николаевна, инескеть, ёвтнеде ансамблядонк.
– Минек ансамблясь од, сонензэ тусь колмоце ие. Весемезэ морсить 11 ломань, малав весе пенсионерт. Баянистэнек ава – А.И.Малюкова. Морсетяно эрзянь кезэрень морот. Сеедьстэ сёрмалетяно сынст сыре ломантнень пельде. А кода эно? Моротнень эряви ванстомс. Течи-ванды сырькайтне туить эрямосто. Истя жо минськак ладсетяно. Течи самай моратано авторонь морот – «Чачома веле» ды «Чевгелина». Васня бажинек умонь моро морамс, ансяк аволь весе мартонок савсть, секскак вайгельтне а ладявить.
– Косо яла морсетядо?
– Васняяк, нама, эсенек велесэ ды районсо. Минек Пазялгосо Троицясто эрьва ие тешкстави «Эрзянь покшчи», конантень сакшныть инжеть эрьва ёндо. Те чистэнть свал казтяно концерт. Истя жо ардтнетяно Пензав, Заречный ошов. Концерттэ икеле ды истякак ютавтнетяно репетицият. Минек арась клубонок, веленть оймезэ – школась, сон кавто этажсо, покш ды мазый. Тосо макссть тенек нупаль, вастыть эйсэнек кецязь.
Саранскоев морамо сынек омбоцеде. Весть уш сакшнынек «Ламзурь» ансамблянь 20 иень тешкстамо. Морынек натой тынк Национальной театрасо, вастымизь пек лембестэ. Сюкпря Р.Б.Щанкинанень, сон тагояк тердимизь. Кода свал, аватнень марто пурнынек ярмакт, васоло кинть лангс апак вано, минь паро мельсэ сыргинек. Мезесь талновты, истят покш фестивальтнесэ а максыть ламо морамс, вейке-кавто морот. Чарькодеви, пурнавить ламо морыцят, эряви шка, ансяк минекак покш меленек невтемс прянок, каземс паро морот.
– Людмила Николаевна, косо тынь важодтядо?
– Мон важодян школасо начальной классонь тонавтыцякс, покш класстнэсэ ветян черчениянь урокт.
– Ветяви-арась Пазялгосо эрзянь келесь?
– Эрзянь келесь ветяви факультативень лувсо 5-8 класстнэсэ. Школасонть 1986 иестэ саезь ули «Эрзянка» эйкакшонь ансамбля. Кить прядсызь школаст, сынст таркас сыть морсеме лия эйкакшт. Пазялгосо эрзянь келентень, культурантень явови башка мель. Минь эрьва ие чадыковсто келейстэ тешкстатано Эрзянь келень чинть, козонь свал тердтяно инжеть Мордовиястояк. Троицясто ютавттано «Эрзянь покшчи», кортыть, сон малавикс «Раськень озксонть» ёнов.
«Н
армонь морыця» коллективесь сась Самара ёнксонь Сызрань ошсто. Ансамблянтень курок топодить 5 иеть. Сонзэ пурныцясь – Н.Г.АТАМАНОВА. сынст репертуарсо 35 эрзянь ды мокшонь морот. Коллективсэнть 11 морыця. Эйсэст сеедьстэ тердтнить школав, библиотекав, истя жо Ульяновскоев, Самарав, Татарстанов. Эрьва косо сынь свал ёвтнить эрзятнеде-мокшотнеде, каванить раськень ярсамопельде. Кавто иеде икеле спонсортнэнь лезксэст вельде Надежда Гавриловна ставтсь эрзянь костюмт. Эскизтнэнь ды весе сень, мезе эряви стамс – арсинзе сонсь. Лиссть пек мазый оршамопельть. «Художественный» ДК-со ансамблянтень макссть нупаль, косо сынь вастневить. Н.Г.Атаманова тозонь тейсь национально-культурной центрань кондямо, пурнась материалт, конат пачтить минек раськеденть.
– Ансамблянть марто минь васенцеде Саранскойсэ. Кадык шумбрачись аволь од ломанень, ялатеке эряволь бу седе сеедьстэ вастневемс. Минь эрятано васоло, руз ютксо, тиринь келентькак чуросто марсетяно. Течи мельспаросо кунсолынек, кодат морот тесэ морыть, ванынек, кинь кодат оршамост. Вастымизь лембестэ, весемесь мелезэнек тусь, сюкпря тенк, – кортась Надежда Гавриловна.
Те концертсэнть «Крыныця» украинецэнь моронь народной хорось казсь украинецэнь кельсэ морот; Мединститутонь студенткась Наиля Текарёва морась татаронь кельсэ; «Пизёлнэ» ансамблясь сакшнось Покш Игнатбуестэ. Кецявтсь, концертсэнть невтизь пряст од ломантнеяк. Те: 23№ гимназиянь 8-це классонь тонавтницясь Анна Новикова, Саранскоень музыкальной училищань студентэсь Артём Мамаев (сон морызе «Домик окнами в сад» моронть эрзякс, ды, эряви меремс, истя парсте лиссь!), Дмитрий Фадейкин, Оксана Балакшина, Людмила Савкина.
Ламотне морасть эрзянь кельс ютавтозь рузонь моротнень. Те фестивальсэнть пачтязель, лиссь «Моронь пусмо», козо самай совасть эрьва кодамо кельстэ ютавтозь моротне. Тесэ натой Россиянь гимнаськак эрзякс ули! Ютавтызе Маризь Кемаль. Ламо сюкпрянь валт ёвтазельть пусмонь пурныцянтень Р.Б.Щанкинанень.
Весе участниктне казевсть дипломсо ды казнесэ. Ёвтазель мель – ютавтомс фестиваленть эрьва иестэ, «Луч» Культурань кудось улезэ свалшкань ютавтома таркакс.
Эрзянь Правда-сто саезь ©Портал «Erzäks.ru»
Т.Маторкина
Фотокувтне Э.Ретунскоень
Невтевкс налткенть эряви максомонзо,
зярдо саят тестэ максозь сёрмадовкснэнь.
Комментировать