Эрзят, тедиде Эстэнь Масторсо, Тарту мазый ошсо, косо улить ламо тёкшшколат, ламодо ламо тёкшшколасо тонавтницят, МАФУН (Молодёжная ассоциация финно-угорских народов) од ломанень вейсэндявксось карми ютавтомо Инекужо.
Те раськеютконь промксось карми ютамо 2015 иень медьковонь 29-це чистэ саезь умарьковонь 1-це чис. Эрзятнень пельде ардыть кавто цёрат. Те – Вячеслав Гагарин, эрзянь таланов од цёра, кона ламо иеть важоди «Эрьмезь» эрзянь керсицянь вейсэндявкссонть, эри Вирь Тавла велесэ, ды Петрянь Андю, кулянь сёрмадей, Эрзянь Википедиянть ветий-модератор, Петра ошонь ды Ленинградонь ёнонь эрзянь ломанень вейсэндявксонть прявтось, эри Ине-Петрань ошсо. Кавто кортамотнесэ минь невтьсынек кодамо мельсэ, арсемасо эрить од эрзянь ломантне ды мезекс ардыть промксов лия суоми-угрань раськень од ломантнень марто.
Васенцекс, каршо валонть кирди Вячеслав Гагарин.
«?Ёвтнек эстедеть?»: Чачинь Мордовия республикань Кочкурбуесэ Вирь Тавла велесэ,теске касынь тетявтомо, прядыя школам.
«?Коли кармить чувтосто керсеме?»: Ушодынь керсеме кото иестэ. Васенце тонавтыцякс ульнесь сырнень ломань, алкуксонь эрзя, Мастин Николай Иванович. Керсемась велявты монь «эйкакш пингес!».
«?«Эрьмезь» вейсэндявкстонть кавто валсо?»: Мон «Эрьмезь» вейсэндявксонть кода 13 иеть. Весемекс тесэ 35 ломанть, одтнэде ансяк 8. Иенть пачк ютавтневить вете покшт минек тевень невтемат: «Кой» чувтосто теевксэнь пирявксонь фестиваль, «Торамась терди» кезэрень эрзянь моронь фестиваль, Эрзянь келень чи, «Кулдор-калдор» суоми-угрань пейдемань фестиваль. Пек лездатан «Тюштянь налксемат» пелькстамотнень ютавтомо.
«?Зняро чувтосто керсевксэть-теевксэть?»: Зняро ульнесть теезь ней а лецтявитькак. Эсень лем ало невтевксэм арасель, ансяк вейсэнь невтемасо, саезь 1997 иестэ.
«?Мезень коряс ардат МАФУНов?»: Мон ардан МАФУНов секскак — мон ЭРЗЯЯН. Невтемензэ пурнавозь ломантненень минек раськеденть, минек эрзянь чувтонь керсема койденть. Саян мартон невтемс аламошка апокшке мазыйть керсевкст. Ды маряви ускан вастомастонть кодаткак арсемат, ды од виев тевть.
«?Мекст минек эрзянь керсема койденть а пек содыть?»: Мон арсян, аздыть сесте, коли эрзятнеде, эрямодост пек а кортыть, а невтнить телевизорга. Видстэ меремс, саемс керсицятнень, неень шкасто арась статусост «раськень тевень теиця» (рузокс «народный мастер»). Минек Мордовиясо, тонавтнеманть прядоманть мельга арасть важодема таркат ков од ломанесь молевель важодеме. Тиринь велестэ весе тукшныть ошов, пек ламотне Московов, косо куроксто стувтсызь те мазый чинть ды коенть, седе тов стувтсызь эсест ундоксост, раське лемест, келест.
«?Мезе эряви теемс, тонь койсэ?»: Васенцекскак эряви кадомс велесэ эрямо од ломантненень, сынь кадовить ансяк сестэ, кода кармить паро эрямо лувт, — сынест эряви теемс важодема таркат. Сестэ, арсян велесь сыргози, кармить касомо, виевгавтомо минек Мордовиясь, седе кемексты минек раськесь, велеськак сестэ кадови Эрзянь велекс.
Омбоцекс, каршо валонть кирди Петрянь Андю.
«?Ёвтнек эстедеть?»: Чачинь Од Пиче велесэ, Клявлянь буесэ, — те Мордовиянь васоло томбале, пелеве-чилисема ёнов — Самарань ёнкссо. Вишка шкам ютась велесэ, эрзянь ютксо, тонавтнинь мейле ошсо — школасо ды тёкшшколасо рузонь вакссо. Тиринь келем косояк эзинь тонавтне. Ансяк ловномась, ды сёрмадомась макссь тень содамочинть.
«?Коли ушодовсь Эрзянь Википедиянть теемась?»: Умок, арсян 8 иеть кода ютасть. Мон ды пек содавиксэкс кельсодый Джак Рютер иешка «нарвинек сонзэ», ды мейле 2008 иень панжиковонь 26-це чистэ Википедиясь ульнесь панжозь.
«?Сенейсэ весе прядовсь?»: Арась! Сестэ ансяк весе ушодовсь. Те чис электронной эрьва ломанень эсь мелень коряс эрзян энциклопедиясонть 2 тёжат 2 сядодо ламо сёрмадовкст. Эрьва чистэ появить одт. Ды сынст сёрмадыцякс тонгак молят, эряви совамс эсь леметь ало https://myv.wikipedia.org, варштамс ули се валось сёрмадозь — арась. Кодак ули, — поладык эсь мелень коряс, иля стувто невтевкст путомо, косо теде истя сёрмадозь. Кодак ули эсь фотокувот, пештик-ёвкстык. Весе тевесь!
«?Пезэ, покшолмазо карми эрзянь Википедиянть?»: Сон ансяк карми касомо. Од валт, седе тов пештямонзо седе кувакасто, — те васенце тевесь. Ды весемезэ ули пертьпельгаяк эряви сёрмадомонзо эрзянь кельсэ, саезь веленть лемензэ эйстэ, прядозь ломантнеде конат чачсть, кайсть, эрясть те велесэнть. Омбоцекс, седе тов эрьва чи зняро улить кулят, конат сюлмавозь кода эрзятнень марто, истя шабрацек раськетнень ютксо, лия мастортнэва.
«?Сэстэ лиси эрзянь келенть эрямозо седе келей, кода арсят?»: Мон арсян, эрзянь келенть эрямозо тарказо пек келей ды эрьва-косо, аволь ансяк кортамосо, моросо ды литературасо, кода неень шкасто коли-коли марян истят кортамот. Эрзянь келенек пек вадрясто тевс нолдави эрьва-кодат «ломанень алтымасо», лиякс «социальной пурнавкстнэсэ» – интернетсэ, саемс Контактсо.ру. Сонзэ ютавтозь интрерчамазо, улить пурнавкст «Статуст эрзянь кельсэ», косо одломатьне молить ве пилькс лиятнень марто – теить фотокувт, мазылгавтсыть сынст эрзянь кельсэ, теить графика. Видстэ меремс, «Эрзякс» улемс те «Вадря»!
«?Кода чарькодян тон кортат од интернэтсэ «Эрзякс» проектэнь коряс ? Кавто валсо ёвтнек»: «Эрзякс» (Erzyaks.ru) интернет порталось теезь эрзянь келенть мазыйстэ сравтомонзо ды ванстоманзо», — истя мель минь путынек. Смустезэ нурькине, ансяк пек чарькодеви весенень: вал эрзякс, моро эрзякс, тевть эрзякс, сёрмадома эрзякс, артома эрзякс. Ды седе тов. Минек келенек ды раськенек истямо мазы ды алкуксонь, сон лиякс кодаяк а маряви, а невтеви, ансяк кода ЭРЗЯКС. Петербургонь эрзятне тейсть мазыйть кедьсэ сёрмадомат конань эйсэ сёрмадозь «Sörmadt Эрзякс», курок ушодови тонавтнеме шкась, школатне, тешкшколатне пешкедить чольдердиця эрзянь кельсэ ломанде, минь терттяно весень – сёрмадомс эрзякс! Ушододо васняяк истямо арсемадонть: «Кода мон ютавтыя кизэнть».
«?Кода арсят ламо келень содамось мезе максы?»: Монь коряс, максы ламонь содамо, вий, покш кить весенень, ламо масторонь содамот… Эряви чарькодемс вейкенть, ломанесь, кона содасы кинь буень-лемень юрсто лись — те пекс сюпав ломанесь! Минь ванстатано эрзя раськенек, минь кепедтяно эрзянь келенть смустензэ, ды седе тов мертяно, минь Россиянь покштояк покш кудонть чапозь чочко. Ды кудонть аштемась ды парочизэ карми ансяк сестэ, коли весе ламодо ламо Россиянь раськетне кармить эрямо, кандомо одтнэнень эсист коест, келест, мелест.
«?МАФУНов ардомась теть мезе?»: Монь пек ламо малавикс ялгам суоми-угрань раськетнестэ: эрзят, марить, карелт, мокшот, суомить, удмурт. Эрьвась эсензэ ладсо а молиця киньгак ланкс Ломань! Те пек паро. Пек вечкан ломанть конататнень пельде ули мезе саемс, тонавтнемс, конань ули эсензэ мелезэ кортамонть коряс. Арсян од ломантне, конат пурнавить Тартусо МАФУНов ёвтнесызь кода сынь эрить-улить эсист мастортнэва, кодат тевть теить. Мезеяк саян од сынст тевтнестэ, седе ламо ёвтнян эрзянь тевтнедеяк.
Кевкстнеманть ютавтызе «Эрзякс» порталонть редакциясь
Комментировать