2016 иень панжиковонь 6-9 читнестэ Карелиянь Масторонь ютась Колмоце Суоми-угрань вики-семинар (англ. Finno-Ugric wikiseminar 2016). Сон ульнесь алтазь суоми-угрань раськетнень неень шкас пурназь мазычист-шкинемаст ванстомантень.
К
олмоце суоми-угрань вики-семинарось панжовсь Петроской ошсо панжиковонь 7-це чистэ. Пурнавсть викисёрмадыцят Россиясто, Суомистэ ды Эстэнь Масторсто. Ульнесть сёрмадыцят ды ветийть карелэнь, удмуртонь, эрзянь, башкирэнь, рузонь, ды эстэнь олячинь энциклопедиятнень. Весемекс ульнесть 13 викисёрмадейть, истя жо ульнесть 18 ломанть кие а сёрмады тей, — те карелэнь келень содыцят, студентт ды наукассо важодицят.
Суоми-угрань вики-семинар – те вики-пурнавкс, конань теизь Эстэнь Викимедиясь. Сонзэ теемазо эряви суоми-угрань кельсэ википедиятьнень улицятнень туртов. Васенцеде истямо вики-семинарось ульнесь ютавтозь 2014 иестэ умарьковонь 22-24 читнестэ Таллиннсэ ды Вакснасо, ды 2015 иень умарьковонь 1-4 читнестэ Мерямяэ буесэ. Ансяк вейсэнь тевть, арсемат кода покшолгавтомонзо ды тувталсто лисем максы седе покш касома вишка раськень кельсэ Википедиятьнень туртов.
Семинаронть панжинзеть Викимедиа РУ прявтось, Медейко Олодимэр, сон весень туртов ёвтась покш сюкпря самонть кис. Те васенце вастомась, конань анокстыльть «рузонь википедиянь» пельксэсь, Эстэнь Викимедиянть марто. Сонь нурькинестэ ёвтнизе кода карми ютамо колмо чинь важодемась: кавто чить «Селена» конференц-залсо, Онего Палас Отельсэ Петроской ошсо, ды меельце чись юты Кижи музейсэнть. Панжомасто Олодимэр тешкстась: Суоми-угрань кельтнесэ Википедиятьнень улить пек малавикс тувталт, ансяк покш Википедиятьнень сынь свал лият.
Илья Мошников кортась карелэнь кельсэ Википедиядонть, ды сонзэ кевкстематне кода лисемс инкубаторсто. «Нарвама шкась моли пек ламос, коли лисеви карелэнь Википедиясь?!», — кортась Илья.
Эстэнь Викимедиясто Каарел Вайдла паро мельсэ ёвтась ламо валт Свен-Эрик Сусаар (Sven-Erik Soosaar) эйстэ, кона ульнесь ушодыцякс суоми-угрань вики-семинартнень. Каарел весинень ёвтнесь Minority translate программадонть, кона лезды ютавтомо суоми-угрань кельс; WikiComment-эсь лезды викисёрмадыцятьнень мельполадкстомо сёрмадовкстнэнь. Истяжо Каарел кортась «Сышкань суоми-угрань вейсэнь вики-ветемядонть». Сон мерсь: «Те покш тев, конань апак тее минек википедиятнесэ а карми касомась. Эряви лездамс вейсэнь тевтнесэ, вейсэнь сёрмадомасо».
Омбоце инжесь Эстэнь Викимедиясто ульнесь Танела Перна сон ёвтнесь «Вики-пурнавкст кода вейсэндявкс».
Вейсэнь фотокув Колмоце Суоми-угрань вики-семинаронть
Эрзянь Википедиядонть, ды сонзэ 8 иень перть касомадонть ёвтнесь Андрей Петров, Ине-Петрань ошонь ды Ленинградонь ёнксто МАФУНов Ветикурос совицясь. Удмуртонь кельсэ Википедиядонть кортась Елена Рябина Иж ошсто.
Ульнесь инже Башкириясто, Ансар Нуретдинов (Айсар), кона сась Уфа ошсто ёвтнесь кода «Кода БашкиВики вансты ды келейстэ ёвтни раськень шкинеманть».
Skype вельде ульнесь кортамо Павел Каганер марто, кона максь каршо валт эрьва кодат кевстнемат вишка Википедиядонть. Семён Красоткин ёвтнесь «Ламо кельсэ сёрмадовкст Рузонь Викикулятнесэ». «Те пек паро лезэ суоми-угрань келень сравтомантень, бути кармить кулят тынк кельсэ! Максодо сынст», мерсь Семён.
Меельце чистэ веси ульнесть Кижи музейсэнть, те таркасонть Онегань эрькесэ ашти усиясь сехтэ сыре чувтонь церькова марто. Туемадо икеле весе прасть ве мельс ютавтомс 2016 иень сёксня нилеце суоми-угрань вики-семинаронть Удмуртиясо, а Мордовиясо 2017 иестэ.
«Wikikulät»
«Erzäks.ru»
Невтевкс налткенть эряви максомонзо,
зярдо саят тестэ максозь сёрмадовкснэнь.
Комментировать