Таштомковонь 10 чистэ Вирь ало Тавласо ульнесь ламо Покш Чить: Йовлань Олонь чачома чизэ, «Торамось терди» кезэрэнь моронь ветеце фестивалесь.
Те
чистэ Вирь ало Тавласо эрзятне тешкстасть зярыя покшчить. Васняяк, Йовлань Олонь Чачома чинзэ. Лия покшчиськак сюлмавозь эрзянь раськень те цёранть лемензэ марто: «Торамось терди» кезэрэнь моронь ветеце фестивалесь, ков морамонь ёрокчист невтеме сакшность эрзят аволь ансяк Мордовиянь буетнестэ, сонзэ томбальдеяк — невтемга, Пензасто, Нижней ёнкссто. Ды аволь ансяк эрзятне невтизь те чистэнть морамонь ёрокчист. Вирь ало Тавласо те чистэнть гайгсть сетунь мороткак! Васоло масторсто инжетне морасть пазнэнь алтазь ды урьвакстомань зярыя кезэрень морот. Весе мельспаросо кунсолость инжетнень: малав весе кунсолыцятнестэ васенцеде марясть те келенть гайгеманзо.
Колмоце покшчись — те чувтосто керсицянь фестиваленть прядовоманзо тешкстамось. Вете чинь перть чувтосто керсицятне важодсть од теевкс лангсо, ды ней сынь мазылгалить В.И.Ромашкин лемсэ этно-кудонть вакссо. Керсицятнеяк сакшность эрьва косто: Нижней, Пенза ёнкссто, Московсто, Удмуртиясто! Сетунь инжетнень ютксояк ульнесть чувтосто керсицят. Ды кода а ёвтамс Вирь ало Тавлань керсицятнень, конат ванстыть эсь важодемасост икеле шкань эрзятнень пельде молиця ундокстнэнь!
А стувтома сеяк: кие сехте пек мелявтсь весе неть покшчитнень анокстамосо: Калаганонь Керяз, лиякс меремс, Пётр Владимирович Рябов — «Эрьмезь» вейсэндявксонь прявтось. Сон сонсь соды, зяро оймевий путсь покшчитнень анокстамстонть! Чарькодеви, ульнесть лездыцянзо, сыненсткак покш-покш сюкпря!
Инжетне паро мельсэ кунсолость моротнень, ванность чувтосто теевкстнэнь, ярсасть теске, паксясо пидезь, ямдо ды ледстнесть Йовлань Олонь, кона эрийтнень ютксто туемадонзо мейлеяк теи вейсэндямонь, раськень ванстомань ды раськетнень ютксо ялгаксчинь сюлмонь кирдемань тевенть!
Алина ПОДГОРНОВА
©Портал «Erzäks.ru»
Невтевкс налткенть эряви максомонзо,
зярдо саят тестэ максозь сёрмадовкснэнь.
Комментировать