Течи Саран ошонь архивсэ ожоковонь 22 чистэ, тешксты 90 иень чачома покшчинзэ эрзянь содавикс учёноесь, профессорось, лингвистэсь
Ц
Дмитрий Васильевич наукасо кувака эрямонзо перть таштась аволь ансяк домкадояк домка содамочить — ламо тонавтницят ды ялгаткак. Самай сынь сакшность кельсодыентень поздоровонь ёвтамо.
Ванодо сонзэ превей кортамонть, кона сёрмадозь 2013 иень эрзянь келень чистэ.Кода ютась вастомась ванодо тесэ.
Паро мельсэ «Erzäks.ru» редакциясь ёвты чачома Покшчинть марто лембе валт: уледе кеме шумбрачинь марто, уледе эрявиксэкс, уледе одтнэнень кеме ды виев тонавтыцякс! Сюкпря покшто-покш тевенк кис минек эрзянь келентень!
©Портал «Erzäks.ru».
Невтевкс налткенть эряви максомонзо,
зярдо саят тестэ максозь сёрмадовкснэнь.
Д.В. Цыганкин профессоронтень 90 иеть!
РАСЬКЕНЬ ШТАТОЛ
Течи, октябрянь 22-це чистэ 90 иень юбилеензэ тешксты эрзянь содавикс учёноесь, профессорось Дмитрий Васильевич Цыганкин. Д.В.Цыганкин – Ине Отечественной войнань участник, финно-угровед, лингвист, МАССР-нь школань заслуженной учитель, филологиянь наукань доктор, профессор, Огарёвонь премиянь лауреат, Россиянь ды МАССР-нь наукань заслуженной деятель, наукасо ды техникасо МР-нь Государственной премиянь лауреат, МР-нь Прявтонь премиянь лауреат.
Течинь номерсэ макстано Т.С.Барговань Д.В.Цыганкинэнь марто интервьюнзо.
Ош куншкасо эртевинек Дмитрий Васильевичень марто, кортавтынек вастомань шканть, ды теде мейле мон сыргинь сонензэ. Ламо од кевкстеман кенерсть. Васенцесь, нама, книгадонзо. Васняяк «Жизнь в науке профессора Д.В.Цыганкина» библиографиянь указательденть – истямо сюпав ды домка пурнавкс монень зярс эзь савкшно вастнемс.
«Эрзянь правда»:– Дмитрий Васильевич, те указателенть пек покш сы шказо. Зяро ломанть кармить амольдямо те книгастонть содамочить! Мон дивинь: тынк ловныть Нью-Йорксо, Вашингтонсо, Колумбиясо, Кембриджсэ, Будапештсэ, Хельсинкисэ, Мичигансо, Северной Каролинасо… А ёвтневить весе таркатне. Статьянк эрзянь, рузонь, натой немецень кельсэяк…
М
инек чиновниктне свал кортыть, келя, Мордовиядонть ней содыть масторлангонть келес спортсо изнявкстнэнь кувалма. Сынь тень а чарькодить: аволь ансяк спортсментнэ – минек учёнойтнеяк теить Мордовиянть содавиксэкс масторлангонть келес. Келень содыцятне домкасто, паро мельсэ, ванкшныть эсест келенть ды сюлмить сонзэ лия кельтнень марто. Зярдо нуцькам Георгий ушодсь пурнамо те указателенть, сон снартнесь содамо, косо, кодамо масторсо улить монь книгатне. Лиссь – пек ламо масторсо ловныть сынст ды тонавтнить корязост. Ламот сайнить книгатнестэ цитатат. Ученоенть питнезэ онкстави сеньсэ, кода ловныть сонзэ книганзо, мезе эйстэст саить.
«Эрзянь правда»:– Тонть статьятнесэ седе сеедьстэ ванкшновить Сура чирень эрзятнень кортавксост.
С
ура чирень велетнестэ мон ушодыя наукас эсень кинть, тосто, шугуровань диалектстэнть. Зярдо карминь тонавтнеме-ванкшномо тосонь келенть, муинь пек ламо валт мокшонь кельстэ. Шугурова, Перьмизь, Морд. Давыдова, Сурвеле, натой Дубенка ёнксонь Поваделенть ды Кендянть видьс – неть таркатне XVI пингенть самс ульнесть мокшонь ухожаекс. Эрзятне кармасть валгомо Арзамас ёндо – мокшотне кадызь неть таркатнень, кой-конатне кадовсть ды келесь човоргадсь.
«Эрзянь правда»:– Дмитрий Васильевич, кие превс путынзеть кочкамс те теманть, те тарканть тонавтнемань темакс?
М
он тонавтнинь Московсо аспирантурасо. Тонавтыцян, Клара Евгеньевна Мальтинская ды Василий Иванович Лыткин, парсте содасть Бубрихень трудтнэстэ Ардатовань ды Козловка ёнксонь кортавкстнэнь тонавтнемадост, а вана Сура чирень эрзятнень келест ульнесь апак тонавтне. Ламо тосо эринь.
«Эрзянь правда»:– Тон эрьва эрзянть марто кортамсто сеске содасак, косто сон?
C
одаса ломаненть сеске, косто сон. Мон эдь ютынь Мордовиянь весе велетнень, ульнинь Самарань, Пензань велетнесэ. А вана Оренбургонь ёнов эзинь пачколе, тува Н.А. Агафонова профессорось студенттнэнь марто яксесь. Истямо практикась пек паро. Васняяк, те – келенть тонавтнема. Мейле истямо практикась тонавтыль маштомо вейсэ эрямо. Минь вейке соргавкссто ярсылинек, весе вейсэ – палаткава эрилинек, пелькстамот эрсильть студенттнэнь ютксо. Колхозтнэ лездыльть тенек сывельсэ-ловсосо. Мон ушодыя те тевенть – моньсэнь прядовськак.
«Эрзянь правда»:– Меленк минек тиринь кельтнень коряс? Пек ризксэв?
П
ек мелявтан минек кельтнень кувалма: кода ванстомс сынст? Эрьва келесь ванстови ансяк велесэ, велень школатнесэ. А сынст ней пекстнить – тонавтницят арасть. Косо улить – тосто эйкакштнень усксить рузонь велев. Мон арсян, прявттнэнь туртов тунь а эрявить а эрзянь, а мокшонь кельтне. Сынсь лиссть-кассть эрзянь-мокшонь велетнестэ, образованиянь министратне весе ульнесть мокшот, ансяк конаськак мезеяк эзь тее келень ванстоманть лезэс. Весе ваныть Московонть кургс – мезе тосто мерить.
«Эрзянь правда»:– Мекс арасть а эрзятнень, а мокшотнень ютксто паро сермадейть ды поэтт, художникть, композиторт, артистт?
В
ана мекс: сынст арасть ассоциацияст. Зярдо эрзянь эйкакшонть ушодыть тонавтомо рузокс – сонзэ а вельмить ассоциацият, сравненият. Касы – а карми содамо тиринь келенть, келесь жо – ломаненть интеллектэзэ. Минек од ломантне ней весе усредненнойть!
Мекс японецтнэ добовасть истят покш изнявкст наукасо? – Сынь весе тонавтнить эсест келест. А минь? Сехте ламотнень тиринь келень содамочитне ветеце классо тонавтницянть туросо. Вана кунсолат прявттнэнь ды апаркстомат – кода беряньстэ кортыть! Овсе кортамо а маштыть! Монь койсэ, истяттнэнь прявтокс путнемскак а эряви!
Арсеме а маштыця раськенть седе шожда манчемс. Кить а содасызь тиринь келенть – сетне арсемеяк паро ладсо а маштыть. Вана весе истя толковави.
Эрзятнень-мокшотнень кувака эрямонь кист, ламо мезень пачк раськенек ютась. Ламо раськеть нардавсть модамасторонть лангсто – минектне ванстовсть. Мекс? Лисни, ульнесть, превейть ды парт прявтост, конат ванстызь эсь раськест. Ней минек раськесэнть уш истят прявтт арасть, кияк эйстэст а мелявты велетнень, келенть, раськенть ванстомадо. Ды мекс бу а путомс ледстнемань кеврунгот неть кезэрень ине эрзятненень?! Васняяк Пургазнэнь! Сон ульнесь эрзятнень алкуксонь виев ды превей прявтокс, ванстызе раськензэ. Венгриясо, Будапештэнть куншкасо, стявтозь 12 кеврунгот сеть ломантненень, конат пачтизь раськенть те таркантень. Минь вана стувтнетяно, мельс а путтано раськень ванстыцянок.
Г
осударствась ламо ярмакт яви культуранть кепедемс – киштематне, фестивальтне секе тев ютавтневить. Ансяк сынь а ванстыть келенть. Эйкакштне оршнить эрзянь-мокшонь кезэрень оршамотнес – мезе те максы превентень? Те ней овсе а эряви, кадык ломантне оршнить неень шкань оршамотнесэ – минек жо, кода а ушодат эсенек передачатнень ваномо – некеть кезэрень оршамотнесэ бабинеть морыть-киштить, штердить. Те весе ютазь шка. Седе паро улевель, бути телевизорсто, радиосто марявольть эрзякс ды мокшокс парсте кортыцят. А сынь ней овсе арасть! Мон лован «Эрзянь мастор» газетанть прогрессивнойкс – сондензэ башка ней вейкеяк изданиясо, радиосо, телевидениясо а кортыть келенть ванстомань проблематнеде. Ленин ламо макссь весе нациятнень туртов келенть ды литературанть кемекстамосо, национальной школатнень туртов. Ней весе вельтявсь тумонь лазсо, эсенек келесь допрок стувтови, куш, лангс ваномс, мезе-бути тееви. Лиснить натой тонавтома книгат. Мусть пек уш вечкевикс валт: оптимизация образования, келя, келесь кадык а улияк – кадови самосознаниясь. Ансяк те весе стяконь кортамот. Келенть содамс эряви – сестэ ули самосознанияськак.
М
он пек ламо важодян. Ансяк лиясто арсезевкшнан: мезекс? Кинень весе те эряви? Минек государстванть арась тенень мелезэ-бажамозо. Ведь ученоенть пельде арась а сывель, а пона, а ой. А вана омбо мастортнэнь научной ды интеллектуальной бажамост пек покшт – бажить содамс, мезе лангсо важодить минек келень содыйтне, кодат превть-арсемат ёвтыть.
– Пелькстамотне а лепамкшныть: кить минь: мордват эли эрзят ды мокшот? Мезе мерят теде?
Т
ень васняяк эрьвантень эряви чарькодемс: арась мордовской литература, ули эрзянь ды мокшонь литература. Эрзясь эрзякс сёрмады – эрзясь васняяк ловносыяк. Мокшось мокшокс сёрмады – мокшось васняяк ловносы. Сестэ а мезть сёрмалемскак, кортамскак мордовской литературадо. Мон умок уш тень каршо тюрян, ансяк минек литературоведтнэ яла сёрмадыть мордовской литературадо.
«Эрзянь правда»:– Дмитрий Васильевич, кортамсто тон ледстик нуцькат, Георгиень. Ёвтнек, инеськеть, кудораськедеть, малавикстнэде?
М
онь улить цёрам ды тейтерем, Сергей Дмитриевич эри теске, Саранскойсэ, сон важоди заводсо технической проблематнень коряс. Тейтерем, Ирина Дмитриевна, эри Московсо. Васенце мирдезэ чавовсь Афганистансо, ней сон лиянь экшсэ. Тосо кавто нуцькан – Дмитрий Калиновский ды Павел Полшков. Георгий нуцькам – пек малавикс тень ломань. Сон – историк, наукань кандидат. Путызе оймензэ монь коряс книгантень, ней эсензэ ярмак лангс бажи нолдамс омбоце изданиянть. Ним, Людмила Евгеньевна, важодсь тонавтыцякс.
Тетям – Василий Потапыч – пингензэ перть колхозсоль. Колхозонь организатор. Авам – Марфа Варфоломеевна. Семиясонок эйкакштнеде ульнесть кемень, аволь весе ванстовсть. Ульнесь – марчоськак эзь сатно весенень, пешксэнь цюцевтненьгак кочкилинек вейкень пес.
«Эрзянь правда»:– Тонь кувака эрямонь пингеть, ламо мезе неить, ламонь пачк ютыть? Мезе мерят минек шкатнеде?
М
он эринь овсе лия пингестэ, ней шкась овсе лия. Бюрократонь капитализманть пингстэ весе мельтне-арсематне ансяк ярмакто, сюпалгадомадо. Лисни, семияськак тень лангсо сюлмазь. Бюрократизмась васняяк калавты семиянть – аволь капитализмась. Капитализмась ялатеке арсеманзо сюлми народонть марто, минек эрямосонть ней те тунь арась. Ломанденть кияк а арси. Ней семиясь, обществась явовсть кавтов: веенстнэ рамсить мерседест, лиятне а содыть, кода печтямс-эрямс ковонть.
Пек кеман од ломантнень лангс. Вана сакшны тень Георгий нуцькам. Превей ломань, ялганзояк истят. Сынь арсить сы шкадонть, чарькодить: эряви лиякс эрямс.
«Эрзянь правда»:– Мезе парось неень шкасонть? Мезенть ёмавтынек?
Л
едстнян, икеле студенттнэнь эрьва сёксня панильть колхозов якстерькаень урядамо. Техника арсель. Ней а пансить эйсэст – ули техника.
Минек Союзось паро ульнесь – парт арсемат, парт тевть ульнесть! А ней виртне-лейтне башка ломанень кедьга явнозь. Инеркав кинть пекстызь! Сурвеленть перька виртне теевсть частнойкс! Курок ковгак а лисяткак. Ней весе кортыть национальной идеядо. А монь койсэ, васняяк а эрявить империянь ванкшновкст весе раськетнень лангс, конат улить Россиясо. Кадык эрьва раськесь эри-касы апак лепштя.
Тамара БАРГОВА
«Эрзянь правда» кулялопась
Комментировать