Ялгат, путодо, инескеть, питне Людмила Ломшинань(Рябовань) валморотнень туртов. Сон номинант«Руця» эрзянь Лезэпаргонть 2016 иень «Эрзянь Ойме» эрзянь сёрмадома шкинемань Казнень максомантень сёрмадовкссо.
Л
юдмила Рябова чачсь 1982-це иень сундерьковонь 5-це чистэ Дубёнка ёнксонь Поводелесэ. Прядызе Н.П. Огарёв лемсэ МГУ-нь филологиянь факультетэнь финнэнь-угрань отделениянть (2005). Важоди «Сятко» журналонь редакциясо.
Кие тон?
Кие тон те моданть лангсо,
Конань умок нолдызь панксокс?
Раздизь,ускизь палонь-пал,
Тонетькак явсть-каргонь ал…
Каргонь ал ды бабань пеште,
Кемемадо пештизь мештеть:
Мезекскак тон а маштоват,
Кадык прят ломанекс ловат.
Кие тон эсеть масторсо,
Косо оймесь уды корсо,
Косо прявтокс ашти кежесь,
Сырнесь-весементень неже?
Кие тон менеленть ало,
Косо сталмовтомо валот,
Косо гайттеме вайгелеть,
Эчкелмасо онкстнить сэреть?
Кие тон,тонськак а содат.
Паряк,сырят,паряк,одат,-
Перькат мезеяк а редят,
Ансяк эсеть кис сэредят.
Кие тон,кодамо канонь?
Эрят,васов апак вано.
Кинь верезэ яки сангат?
Сюконязь-эскельдить лангат.
Сусковтозь-таргози келеть:
Кортат аволь зярдо мелеть.
Рудазс эцезь-а лексеват.
Кершазь-эскелькс а тееват.
Арсек,кить эйкакшот улить.
Азорт улест-аволь уреть!
Эрзят улест-аволь чельке!
Раштаст-масторс авольть кельге!
Инеть улест,питнест содаст!
Валдо кандост-а чопода!
Кие тон эсеть масторсо?
КОРТАК МАРТОН, АВАЙ…
Кортак мартон, авай, аволь Паздо,
Аволь вадрядо, аволь берянде.
Ёвтнек, кода эрямс седе састо,
Путт зярояк превть монь чаво прянтень.
Тонавтомак, авай, а кемеме,
Весть керязан, ды онкстазан сисемксть.
Тонавтомак, авай, чатьмонеме,
Чатьмонезь, превеекс шожда лисемс.
Тонавтомак, авай, содамс таркам
Ды а эцнемс тов, ков а эряви.
Тонавтомак ойменть лангс а таргамс,
Монськак содан, таго янксемс сави.
Сави янксемс ды сэредькстэнть лажамс, —
Ули-паронь таркас сельведть таштат.
Кода, эрязь, седеенть а яжамс?
Тонавтомак, авай, бути маштат…
Мезес бажамс? Бажак — эрямс!
Менельвенчекс коштонть керямс —
Неявозо кадозь янось.
Эряк течи, вандыс ванозь.
Аволь ченгезь эряк — палозь,
Лиянь оймес лембень валозь,
Лиянь туртов лембень кандозь,
Кадык сон а ули пандозь.
Кемть, тонь весемесь икеле,
Ансяк бажамс иля пеле.
ЭРЯК ПОТСОН
(Цёрань моро)
Ламо ульнесь, ульнесь ламо мезе,
Ансяк эзь кадово седеезэнь.
Тон — кадовить, кадовить-лиядыть,
Теке санган верень таркас срадыть.
Токшат эйсэнь, токшат оймеёжос,
Пачтят эйсэнь пшти сэредьксэнь тёкшос.
Ламо ульнесь, ды аламось кадовсь.
Тонтеметь, маряви, коштось прядовсь.
Тонтеметь, маряви, мон прядовинь,
Теке менельтомбалев кадовинь.
Чары Модась, шкась ливти монтемень.
Зяро ютась? Ие, кавто… кемень?
Ламо ульнесь, ульнесь ламо мезе.
Весемесь стувтневи, ды а весе.
Эряк потсон, майсемам-сэредьксэм,
Эряк, сехте виде ильведевксэм.
ЯВОМА
Тон азё, сыргак седе курок —
Явомась шождынекс улезэ.
Зярс сэредьксэсь эзь ара юрокс
Монь седеезэнь, тонь оймезэть.
Кутмордамс?.. Илямак кутморда,
Илить токавто эйзэнь кедеть
Ды чатьмонть, чатьмонть, иля корта —
Мелезэнь валот иляст леде.
Тон эно сыргак седе курок…
Та-мезеть прась… Пильгезэнь комить…
Прок тонолт, токасть эйзэнь сурот…
Тон эно азё… мекс чувтомить…
Тон састо-састо стят, прок уре,
Конань пелекуломас чавизь…
Аштек аламос, иля туе,
Одс, паряк, неемскак а сави.
Uralistica.com-сто саезь ©Портал «Erzäks.ru»
Невтевкс налткенть эряви максомонзо,
зярдо саят тестэ максозь сёрмадовкснэнь.
Комментировать