Сась «Сятко» артставксонок (журналонок), кавксоцесь те иестэнть. Сядо омбоце лопасонть «Эрзянь мель» пельксэнть ало максозь Зинёронь Сантяень «Од ломантнень раськень ёжост теевемась» сёрмадовксозо. Пек кувать учинек Мордовиясто од ломантнень мелест, арсемаст. Ловнодо, ялгат! Кинь улить кодат мелест, кадодо мельполадкст. Учотано!
«Эрзянь ды мокшонь од ломантнень раськень ёжост теевемась»
(«Формирование национального и гражданского самосознания у молодёжи»)
Яволявтома VI Эрзянь ды мокшонь раськетнень Инекужонтень
Шумбрачи, вечкевикс оят! Шумбратада, кельгома ялгат!
Весе эрзянь ды мокшонь од ломантнень пельде ёвтан тыненк поздоровт течинь чинть кувалма! Арсян тенк паро важодема, од сюлмавомат, икелев молема, седе ламо кортамс тиринь кельсэ ды вечкемс эсь раськенть. Кадык Инекужось топавтсынзе весе тынк меленк, арсеманк ды канды покш кеняркс!
Неень шкань Россиясо седе сеедьстэ стякшны раськень ёжонть коряс кевкстемась. «Ёжо» валось корты седе, кодамо таркасо ашти ломанесь те эрямосонть ды кодат сонзэ вешеманзо, арсеманзо, потмоёжозо, тевдееманзо. Раськень потмоёжось эрси, зярдо ломанесь канды эсь прянзо кодамо-бути раськентень. Ансяк те ульни аволь свал ды эрьва ломаненть раськень ёжозо аволь вейке. Неень шкасто кинень-бути раськень кевкстемась маряви смусттемекс, ансяк истямо арсемась Россиясо эриця ламо ломантнень туртов сон пек малавикс ды эрявикс, секс мекс минь эрятано вейсэнь ламораськень масторсо.
Россиясь явови лия мастортнэнь эйстэ раськетнень культурасо. Меельце эрицянь сёрмадстоманть коряс, кона ютась 2010 иестэ, Россиясо эрить 200 ламо раськеть. Мордовиясо жо эрить 119 раськеть. Чарькодеви, весе минь россиянтано. Ялатеке пек сеедьстэ раськень ёжонок полавтови седе теинекс. Течи монь ули покш мелем пачтямс эрзянь ды мокшонь од ломантнень раськень ёжост ланга.
Эрзятне ды мокшотне лововить Россиясо финнэнь-угрань сехте покш раськекс. Меельце сёрмадстоманть коряс эйстэнек Россиясо эрить малав сисемсядт ниленьгемень ниле тёжат (744.000) эрицят. Кавксо иес минь аламолгадынек сядо тёжас. Бути тевесь карми молеме истя седе товгак, сестэ минь овсе ёматано. Ды нейгак, видьстэ меремс, минь аштетяно ёмамо лангсо. Тень а эряви кекшемс. Теде эряви кортамс. Истя лиссь, эрзятне ды мокшотне сравтозь Россиянь ламо ёнкстнэва, секскак сынст марто эряви ветямс покш важодема раськень ёжонть кувалма. Арсян истямо важодеманть мельспаросо теевлизь бу од ломантне. Видьстэ меремс, ялгат, монень аволь паро сень коряс, мекс Инекужонь делегаттнэнь ды ваныцятнень ютксо пек аламо од ломанть. Ансяк колмо-ниле. Ды, ловт, весе. Эряви меремс, эрзянь ды мокшонь раськень-культурань вейсэндявкстнэ улить Россиянь ламо ёнкстнэсэ, косо вадрясто невтизь пряст Самарань од ломантне, Пензань, Обран ёнксонь, Чувашиянь, Московонь, Ине Петра ошонь ды ламо лия ошсто. Ансяк течи юксонок сынь мекс-бути арасть. Те пек талновты монь седеем ды лакавты верем. Арсян неень шкасто Инекужонь важодемантень эрявить совавтомс ламо виев од ломанть. Сынь улить.
Ней, ялгат, аравттано истямо покш кевкстема: ули ли минек од ломантнень раськень ёжост? Чарькодеви, ули. Ансяк аволь истямо, кодамо эряволь бу. Тевесь, васняяк, вана мейсэ. Весе эрзянь ды мокшонь од ломантне школаст прядомадо мейле туить тонавтнеме ошов, седе ламотне Саранов. А ошсо келесь вастневи пек чуросто. Секскак од ломантненень сави кортамс седе ламо рузокс. А тиринь келесь аравтови омбоце таркас. Тень марто, видьстэ меремс, бороцямс пек стака. Секскак, зярдо од ломанесь сы велев шкань ютазь, сонзэ ёжозо полавтови рузонь ёжос ды кортамо сон уш карми аволь истя, кода икеле. Мон эсень лангстояк тень вадрясто неия, зярдо ёжом аламодо полавтовкшновсь. Моненьгак ульнесь пек стака. Ансяк лия ломантнень марто кортамось вельмевтизе монь раськень ёжом. Истя кода тиринь келесь ошсо а вастневи эли вастневи пек сеедьстэ, раськень ёжоськак сестэ лавшоми. Нейгак ламо од ломантнень полавтовсть раськень ёжост. Сехте пек тейтертнень. Сынь кортавольть ансяк рузокс, а тетянь-авань келесь тенст овсе а эряви. Арсян весень ялгаст ютксто истят улить. Ды аволь вейкеяк. Секскак Саран ошсояк эряви ютавтомс эрьва кодат покш тевть эрзянь ды мокшонь раськень ёжонть кепетемга.
Ней, содатано, эрьванть улить компьютерэст, ноутбукост, планшетэст. Весе од ломантне Интернетсэть. Эритькак тосо. Интернетэнь пачк раськень ёжонь кепетемантень покштояк покш вий путсть Петров Андрей (Петрянь Андю), Учеваткин Александр (Учеватонь Сантяй), Маторкина Таня ды лиятне. Сынь вейсэ ютавтызь «ВКонтакте» социальной сетенть эрзянь кельс. Ней сон важоди виевстэ, ды ламотнень путозь эрзянь келень интерфейсэсь. Те, монь койсэ, пек покш изнявкс. «Контактось» ютавтови истя жо мокшонь кельскак. Ансяк сон карми латиницасо. Кеман, курок те мелесь топавтови, ды ламотне кармить аштеме мокшонь кельсэяк. Те тевенть топавты Кирдяшкина Екатерина – «Вайгель» од ломанень радиостанциянь важодицясь.
Эряви меремс, «Вайгельсэ» важодить пек паро од тейтерть, конат эрьва чистэ нолдыть эфирс эрьва кодат кулят, кортамот ды морот. Ве валсо, теить весементь раськест туртов. Ансяк аволь весе сынст марясызь, секс мекс радионть нурькине вельтямозо (покрытиязо) ды радиось важоди аволь FM-частотасо. Лисян истямо энялдома марто Печатень ды информациянь Министерствань икелев, Раськень политикань Министерствань икелев: лездадо ютавтомс радионть FM-частотас ды кувалгавтомс сонзэ важодеманть 3 чассто саезь васня 12-с, а мейле 24 чассос. Теемс кунсоломанть Интернетсэ. Ламо промкссо, семинарсо, вастомасо ёвтазель те мелесь. Ансяк неень шкас тевесь апак тее. Коминь, удмуртонь ды маринь радиотне гайгить умок. Кадык «Вайгелеськак» невтьсы эсензэ вайгелензэ. Ломантне теить мельстуиця эфирт. А сынст кияк а марясынзе. Мон арсян радионь пачк сеске кепетеви раськень ёжост весе эрзятнень ды мокшотнень. Карматано учомо министерстватнень пельде каршо вал.
Башка эряви тешкстамс Раськеютконь финнэнь-угрань од ломанень вейсэндявксонть, МАФУНонть. Кавто иень перть, 2011 иестэ саезь 2013 иес, МАФУНонь куншкась (штаб-квартирась) ульнесь Мордовиясо. Прявтокс кочказель юридической факультетэнь Н. П. Огарёв лемсэ университэнь тонавтыцясь В. Н. Немечкин. Сон лездась О. Богданованень (Сусореванень) ютавтомс «Библиотекасо этношколась» проектэнть, косо эйкакштнэнь теизь содавиксэкс МАФУНонь важодеманзо марто. Ней Ольга скайп вельде вети эрзянь келень курсат Тольятти ошсо, вельмевти раськень ёжонть Самара ёнксонь эрзятнень ды мокшотнень.
Меельце шкасто ошонь школатнесэ важодить ламо эрзянь ды мокшонь од тонавтыцят. Урокост ютавтыть парсте, мельспаросо. Эйкакштненьгак сельмест палыть кельтнень тонавтомсто. Весемесь моли тонавтыцянть пельде: кода сон макссы келенть, кодамо важодема карми ветямо, кодат аволь классонь покшчить карми ютавтомо ды седе тов. Нама, эрсить стака читькак. Видьстэ меремс, аволь весенень чарькодеви, мезекс тонавтомс тиринь кельтнень, мезекс сынь эрявить ды косо невтемс эсь содамочитнень. Ансяк тетятнень-аватнень марто кортамодонть мейле сынст мелест полавтовить. Тетятне-аватне аволь весть ульнить инжекс уроктнесэ ды эсест сельмсэ несызь, кодамо покш мельсэ эйкакштне бажить тонавтомс тиринь кельнень. Чарькодеви, педе пес келенть а тонавтсак. Ялатеке эйкакштнэ седе маласто теевить содавиксэкс эрзятнень-мокшотнень историяст ды культураст марто. Сестэ сынст потсояк ушодови марявомо раськень ёжо. Од тонавтыцятне сюконить Мордовия Республикань прявтонтень сень кисэ, мекс сыненст пандыть башка ярмакт од специалистэнть кисэ. Ялатеке, монь койсэ, эштё эряви пандомс аволь ансяк одтнэнень, а весе лия тонавтыцятнененьгак тиринь кельтнень тонавтоманть кисэ. Истямо эскельксэсь кепедьсынзе весень раськень ёжост. Эдь лия финнэнь-угрань республикатнесэ истят пандомкат улить. Улевель паро тевекс, бути Саран ошсо панжовольть Национальной школа, косо бу эрзянь ды мокшонь кельтне тонавтневельть седе домкасто. Эрзянь-мокшонь ундокс марто тетятне-аватне мельспаросо максовлизь тозонь эсест эйкакшост. Удмуртиясо важоди истямо национальной школа. Сон кандтни Кузебай Герд сёрмадыцянть лемензэ.
Башка вал эряви ёвтамс спортонть лангаяк. Тенень покш мель яви Павел Мигунов – «Тюштя» вейсэндявксонь прявтокс. Павел Валерьевич невти «Тюштянь налксематнень» пачк эрзянь-мокшонь культуранть, келенть, койтнень-кирдатнень. Сонзэ пелькстамотне пурныть сехте ламо эйкакшт ды од ломанть. «Тюштянь налксематне» ушодовить штатолонь кирвазтемасто, Инешкипазнэнь пшкадемасто, а весе питнетне максовить чувтонь парьстэ. «Тюштянь налксематне» сехте пек кепетить раськень ёжонок!
Вечкевикс оят, кельгома ялгат! Чарькодеви, весе минек од ломантне важодить, теить покш тевть, путыть вийть, пиить-палыть раськест кисэ. Мон ёвтавлинь эштё аволь вейкеяк невтевкс минек од ломантнеде. Ансяк эрьвась эйстэнек важоди та-кода ськамонзо, аволь сеедьстэ корты лиятнень марто, а кирди сюлмот, аволь свал ёвтасынзе эсензэ мелензэ, арсеманзо ды седе тов.
А вана лия финнэнь-угрань од ломантне важодить вейсэ уш комсь иеде ламо ды тевест молить пек парсте. Невтемга, Удмуртиясо важоди «Шунды» вейсэндявксось, Комисэ – «МИ», Марий Элсэ – «Вий ар», Карелиясо – «Nuori Karjala». Од ломантне топавтыть ламо проектт ды неть проекттнэнь пачк кепетить раськень ёжонть. Секскак мон лисян истямо энялдома марто Исполкомсо аштицятненень. Ялгат, монь койсэ, эряви минек Республикасо ды сонзэ томбалеяк теемс эрзянь-мокшонь од ломанень вейсэндявкс, кочкамс лем. Паряк те карми Исполкомонь сёлмо эли башка вейсэндявкс. Варштасынек. Секс мекс зярдо од ломантне прядыть эрьва кодамо вузсо эли колледжсэ тонавтнемаст, лисни истямо тев. Специальностенть коряс важодема тарка кияк а муи, секскак сави вешнемс лия важодема тарка эли туемс лия покш ошов – Московов эли Питерэв. Бути тень а лоткавтомс, сестэ раськень ёжоськак тунь ёми. Секскак эряви кирдемс эрзянь-мокшонь од ломантнень эсенек республикасо, лездамс тенст важодема таркань вешнемасо, совавтомс од ломанень весэндявксос. Кеман, бути мелесь топавтови – раськень ёжось кепетеви.
Ды меельцекс ули мелем ёвтамс минек од ломантнень энялдомаст. Минь весементь несынек ды минек эйстэ мезеяк а кекшат.
- Инекужонть эйстэ минь учотано весе сыцятнень пельде раськень ёжонь кепетема. Ней аволь ламотне кортыть эсь тиринь кельсэ, виздить, мезде-бути пелить. Аламот кортыть Мордовия Республикань Правительствасо аштиця эрзятне ды мокшотне, сынст лездыцяст. А кортыть республикань лия буетнесэ райононь ды велень прявттнэ. Эдь ансяк сынст пельде эряви саемс саевкст миненек – од ломантненень. Секскак Мордовия Республикань Прявтонтень ды Правительствантень минь листяно истямо энялдома-вешема марто: нолдадо эсенк яволявтомасо, кармавтомасо, поздоровонь ёвтамосо ды эрьва косо шумбракстнемань ды сюконямонь валт рузонь кельденть башка эрзякс ды мокшокс. Те максы седеяк покш ялгаксчинь ойме минек республикань эриця раськетнень;
- Кода Татарстансо, истя Мордовиясояк эряви ветямс «келень» тев, «келень» политика ды весе теемс рузонь ды тиринь кельнесэ: табличкат-лемть, тевконёвт (документт), кинот. мультфильмат, радио, телеканал, чокшнеть, промкст, дискотекат, урьвакстомат ды ламо лия мезе. Ансяк прявт путовксось – кортамс тиринь кельсэ. Весе лия финнэнь-угрань республикань эрицятне кортыть вадрясто ды аштить каштанчисэ. Миненекак эряви молемс сынст ёнов;
- Курок Мордовиясо карми ютамо покш пильгеоска, покш футбол. Секскак стявтовиця 2018-це иентень футболонь стадиононть эряви лемдямс «Саран ош арена» эли ютавтомс пелькстамо (конкурс), конань вельде минь бу кочкавлинек лем стадиононтень. Минь арсетяно, те тевесь седеяк пек кепедьсы эрзятнень ды мокшотнень потмоёжост, кармавтсы вечкеме спортонть ды максы покш каштанчи.Вечкевикс оят! Кельгома ялгат! Тагояк весень покшчи марто! Вечкеде эсь келенк ды раськенк! Свал моледе икелев! Бути минь ловтано эсь прянок Россиясо финнэнь-угрань васенце раськекс, сестэ тенек свал эрьва мейсэ эряви улемс васенцекс! Сюкпря!
2014 иень ожоковонь 23-25 читне
А. А. Данильчев (ЗИНЁРОНЬ САНТЯЙ),
Саран ошонь 26-це лицеень эрзянь келень тонавтыця
Комментировать