Эрзянь Келень Идема Фондонть кулялопась «Эрзянь Мастор» ютавтынзе весе материалонзо Creative Commons лицензиянть ало.
2
017 иень медьковонь 31 чистэ 502-це № кулялопанть нилеце лопасонть появась истямо сёрмадовкс:
Все материалы газеты «Эрзянь Мастор» доступны по лицензии: Creative Commons Attribution 4.0 International.
Теке сёрмадовкскесь ашти кулялопанть прявт интернет вальмасонть, косо максовить эрзянь ды рузонь кельсэ сёрмадовкстнэ.
Те теевксэсь кармась улеме «Эрзянь кельсэ Викимедиянь витнийть-ветийть» (UG EZY) куронть («Викимедийцы, пишущие на эрзянском языке» (UG EZY), Wikimedians of Erzya language User Group) марто вейсэ важодеманть эйстэ. Кода тешкстызе «Эрзянь Мастор» кулялопанть редакторось Кузоваткинань Ольга:
Миненек пшкадсь «Эрзянь кельсэ Викимедиянь витнийть-ветийть» куронть ветицясь Петрянь Андю вешема марто, ютавтомост кулялопанть, кода конёвоньсенть, истя электронной лувсонтькак олячинь лицензияс. Минь васенцеде тень марто тень марто вачкодевинек, домкасто тень коряс арсинек, ды ве мельс прынек. Кода мон арсян, истя теезь минь макстано весенень олячистэ сравтовомс информациянть эрзянь раськеденть, кельденть, культурадонть. Те тееви видстэ, редакцияв а пек вешезь. Копирайтось ансяк пексты информациянть сравтовомо.
Ледстясынек, электронной лувсо информациянть пурнамось-анокстомась, ды сонзэ сравтомась – те Викимедиянь вейке тев, ды «Эрзянь кельсэ Викимедиянь витнийть-ветийть» пурнавксось-курось (UG EZY) бажи келейгавтомо сонзэ эрзянь кельсэ. Аволь вейке ие вадрясто касыть Эрзянь Википедиясь, Викикулят ды Викиутом проекттнэ.
Кода кемексты Петрянь Андю UG EZY-нь ветиесь:
Келесь эри сестэ, зняро сон ули ломанень эрьва эрямо ёнксонзо, интернетсэяк. Тень коряс кодаткак пелькстамоткак а эрявить. Кельтне, конатат «кенерить озамо те чугункань ардомантень» кармить эрямо сы пингесэнть. Неень шкасто интернетсэ аволь пек ламо вальмат эрзянь кельсэ. Келень эрямос совавтомась, эйкакшонь ды од ломанень туртов эрзянь келень тонавтомась карми седе шождасто зярдо карми ламо олячисэ информациядонть. Панжадо информациясь – те прявт лув Викимедиянь проктнесэ, ды сынь важодить весе олячинь лицензия ало. Ней вана, «Erzyaks.ru» порталонть башка олячинь лицензиясь ули «Эрзянь Мастор» кулялопань вальмасояк. Эрзянь Кулянь пачтямонь керькстнэнь (рузкс, СМИ) ютксо сон вейкине. Сюкпря редакциянтень те эрявикс ды лезэв эскельксэнть кис.
Невтема:
«Эрзянь Мастор» (рузокс — «Страна эрзян», англакс — «Erzia Land», ПИ № 77-16130, 2003 иень умарьковонь 11 чи) — те эсьмельксэв вейксэнь эрзя раськень кулялопа, кона лисни Сарансо. Теицязо ульнесь Рябов Анатолиень лемсэ Эрзянь келень идема ярмакпаргось 1994 иень таштамковсто. Лисни ковонть кавксть эрзянь ды рузонь кельсэ.
«Эрзянь кельсэ Викимедиянь витнийть-ветийть» Пурнавксось (UG EZY) (руз. Юзер-группа «Викимедийцы редакторы эрзянского языка», англ. Wikimedians of Erzya language User Group) — омбоце россиясо Викимедиянь кемекстазь куро (васенцесь — «Башкортостанонь Викимедиянь витнийть-ветийть» (UG BA), Wikimedians of Bashkortostan User Group). Те ломанень пурнавкс, конань ули пек покш мель Викимедиянь проекттэнь ветямо эрзянь кельсэ, ды лия эрьва-кодамо тевть марто, конат сюлмавозь эрзянь раськень, келенть ды пурнавксонть марто. Ульнесь кемекстазь 2017 иень даволковонь 16 чистэ.
ПЕТРЯНЬ АНДЮ
Портал «Erzäks.ru»
Невтевкс налткенть эряви максомонзо,
зярдо саят тестэ сёрмадовкснэнь.
Комментировать