Мельвановикс ялгат! «Эрзянь Мастор» газетанть редакциязо энялды лездамс 2017 иень васенце пельксэнь сермадстомантень.
Т
ень топавтомга эряви важодемс тонавтныцятнень, тонавтницятнень тетяст-аваст, велень ды ошонь эрицятнень юткссо. Индексэзэ 52787, пель иень питнезэ 400 целк. 08 трёшникть. Лисни 1 ковс – кавксть.
«Эрзянь Масторонь» кондямо лия газета арась, сонзэ кемекстызе Эрзянь келень Идема Фондось. Сон ёвтни эрзянь раськенть ёжодонзо, пачти сонзэ мелензэ-интересэнзэ, ашти Конституциянь праванзо кис, мель путы, вейкетьстэ касовольть-кепедевельть буетне-районтнэ.
Пек покшолгадсть питнетне почтань, типографиянь, «Ростелекомонь» тевест кис. Берякадсть финансонь кувалма тевензэ редакциянть. Газетась ламонь кувалма нолдави сермадстомань ярмактнень лангс.
«Э
М»-нь уцясказо ашти ансяк тынденк, лезксэнть тынк пельде. Тынстеменк сон лепии. Кемтяно, одс ды лиякс варштадо минек мелявксонок лангс. Чарькодинк меленть: зярс лекси, зярс эри «Эрзянь Масторось», эрить эрзятне, эрить кода раське, этнос, народ. Прядови сон, газетась, прядови эрзянь раськенть эрямопингезэ. Эряви ванстомс сонзэ, эсь сельмеде пек, ванстомс прок эсь эйкакшонок. Те аволь мазы валт, те – видечи. Ансяк «ЭМ»-сь, ламодояк ламо газетатнестэ, сравтневи Россиянть келес. А ули сон, а улить… Секскак энялдтано лездамс сермадстомс те газетанть. Сёрмадстови Мордовия Республикань почтань весе отделениятнесэ, теде башка «Эрзянь Масторонь» редакциясо.
М
ордовиянь томбале эрицятне сёрмадстыть «Эрзянь Мастор» редакциянть вельде. Тень кисэ кучовить ярмакт почта вельде Кузоваткина Ольга Васильевнань лемс (сермадома видестэ эрямо тарканк): Саран ош, Коммунизмань куро, 33/3 кудо, 527 № нупаль, тел. (8342) 24-28-65, 8-927-979-46-04, e-mail: erzia@moris.ru. Газетась карми кучневеме почта вельде, конвертсэ.
Теезь сермадстомадонть «ЭМ»-с энялдтано пачтямс редакцияс ацамковонь 10-це чис.
Эрзянь келень идема Фондонь Ветямкуронь прявтось МУСАЛЕВ Г.Д.
«Эрзянь Мастор»-нь прявт редакторось КУЗОВАТКИНА О.В.
ветямкуронь ломантне ЭРЗЯЙКИН И.Ф., ЧЕТВЕРГОВ Е.В.
«Erzäks.ru»
Невтевкс налткенть эряви максомонзо,
зярдо саят тестэ максозь сёрмадовкснэнь.
Комментировать