Овсе аволь умок 1000 экземплярсо нолдазель эрзянь кельсэ васенце моронь пусмось. Теде икеле истят нолдавкст арасельть. Моронь пусмос совасть рузонь ды лия раськетнень кельстэ эрзякс ютавтозь морот. Те ине арсеманть лангсо аволь вейке ие важодсь «Литова» эрзянь аватнень вейсэндявксонть прявтось, сёрмадеесь Раиса Щанкина.Витницясь – Р. Н. Бусарова. Нолдыцясь – Константин Шапкарин.
М
оронь пусмос совасть рузонь кельстэ эрзянь кельс ютавтозь морот, конатнень лангсо важодсть: Маризь Кемаль, Николай Ишуткин, Павел Любаев, Раиса Щанкина, Римма Жегалина, Татьяна Мокшанова, Дригань Толай, Надежда Родионова, Вера Алексеева ды Александр Данильчев. Пусмос совасть ютавтозь Россиянь Федерациянь гимназо, «Изгиб гитары жёлтой», «Выйду ночью в поле с конём», «Ой, цветёт калина», «Листья жёлтые», «Пусть всегда будет солнце», «Угонщица», «Марьямоль», «Money, money» ды ламо лия весе масторонть келес содавикс морот. Весе важодицятне-ютавтыцятне арсить – моротне, конат совавтозь те пусмонтень, мусызь эсензэ морыцянзо ды кунсолыцянзо.
Моронь пусмось нолдазь «Культура России» федеральной целевой программанть лезксэнзэ вельде. Кинь ули мелезэ рамамс моронь пусмонть – сёрмадодо тей: mroolitova@yandex.ru.
Ледстясынек, «Эрзякс» порталось ёвтнесь Жегалинань Римма покшчинть эйстэ, косо ульнесь васенцеде ёвтнезь «Эрзянь морот: морамонь лувт, валт, ютавтовкст» ды «Моронь пусмо» нолдавкстнеде.
Невтевкс налткенть эряви максомонзо,
зярдо саят тестэ максозь сёрмадовкснэнь.
Комментировать