А содаткак, ков ды кие марто ветятадызь эрямонь китне! Кодаяк эзинь учне Пазонть пельде истямо казне: нурькине шкас, теке ёвкссо, теевемс иневедь чиресэ ды пештямс ойменть-седеенть весе парочитнесэ, конатнень теть кази кизэсь, чипаесь, иневедесь! Лиссь те вана кода: тейтерем сайсь мель молемс оймсеме… монь марто! Истя, иневедь чирев, Болгарияв!
А
нсяк сонзэ эрямосонть лиссть кенярксов лиякстомат – вечкевиксэзэ тердизе мирденень. Кецямонть пачк кавонест стувтызь оймсемав пурнамонть ды тешкстызь свадьбань ютавтома чинть малав теке шкантень. Кодат уш тесэ болгарият, кодат оймсемат! – Свадьбадо мейле одтнэ сыргасть эсест путешествияв, а вана монень ськамон туртов эрявсь ливтямс иневедь чирев. Мезть сёпомс, ризнэвтсь теяк: стяко ёмить ярмактне, конат икелепелев пандозельть тейтерень кис. Ды тесэ апак учо лиссь тень ялга. Ды оштё кодамо ялга!
Сонзэ содасызь ламо эрзятне. Те Раида Евстафьевна Степанова. Сон эри Московсо, «Эрзянь вайгель» вейсэндявксонь прявтонть полавтыцязо, моры «Эрзянь вайгель» ансамблясонть. Поладан тенень: Раида Евстафьевнанень 82-це ие! Васняяк мерян: Раида Евстафьеевна а сёпи сонсензэ иетнень. Ансяк сон мезескак а путы неть иетнень, мари прянзо вийде ды мазычиде пештязь од авакс. Моненьгак, лия ялганзо туртовгак (сонзэ ялгатнень ютксо пек ламо од ломанть ды целанек малав весе ялганзо сондензэ пек седе одт) а весть мерекшнесь: «Мерть тень Раида, эдь монь ды тонь ютксо ансяк зярыя таргот…».
Ды вана истямо кенярксов, эрямонь вийде пешксе ломань марто минь пурнынек васоло килангов. Ёвтаса, весть Раида манявсь, мерсь вал юткова: келя, мезеяк берянь а ули, бути кулан иневедь чиресэ.
Мон неть арсематнень сеск панинь седейстэнзэ:
— Те кода истя! Пурнатано оймсеме – тон арсят куломадо?! Нейке панить неть арсематнень превстэть! Минь оштё мартот иневедь чиресэ морасынек эрзянь моротнень! Саитька мартот эрзянь оршамопельтнень!
Раидань ёжозо сеске паролгадсь, сон натой дивазевсь:
— Мерят, карматано тосо эрзянь моронь морамо? Косо?
Мон зярс пек эзинь сода, кода весе лиси. Ансяк вана те арсемась – ютавтомс Болгариясо ояксчинь чокшне, сась тень тейтерень свадьбанть анокстамсто. Свадьбань ветицясь – тейтерень ялгазо, вейсэ тонавтнесть Саранскойсэ институтсо – Дима Ромашкин икелепелев мерсь: келя, пароль невтемс свадьбасо эрзянь койть, киштемань-морамонь лувт, эдь Московонь инжетне аламо мезе содыть минек раськеденть. Ды оштё седеяк паро ули, бути пелькстамотнесэ изницятнень туртов казнекс ули Мордовиясо теезь продукциясь. Мезть кортамс, цёрась – алкуксонь патриот!
Истя вана анокстынь свадьбав покш чемодан, пештинь тозонь весе эрзянь оршамопелень – монь сындест зярыя, раминек Саранскоень ликёро-водочной заводонь кемень суликат ашо вина ды бальзам, истя жо Саранской молочной заводонь кемень банкат сгущёнка. Рузаевкань кедьчелькев авась О.Т.Буйнова (сонзэ марто теинек книга) макссь мартон эрзянь ды мокшонь оршамопельсэ вишка някат – сыньгак эрявсть казнекс явшемс.
Свадьбасонть «эрзянь тематикась» пек тусь весе инжетнень мельс. Те кемекстымим мельсэнть поладомс тевенть Болгариясояк.
Уш Московсо минь Раида марто ушодынек анокстамо вояксчинь вастомантень, моротнень морсеме. Минек вейсэнь репертуарсонть ульнесть кеменьшка морот. Раида сынст парсте содасынзе, мон вана сцена лангс морсеме а лиснян, куш ламо моротнень содасыньгак. Раида ульнесь тень паро превспутыцякс, тонавтсь, кода таргамс, кода косо мелявтозь-ризнэзь эли эрязасто морамс те эли тона моронть. Минь морсинек аэропортсо самолётонть учомстояк, Болгариянь моданть лангс чалгамстояк. Икелепелев мерян – иневедь чиресэяк эзинек лотксе морсемеде. ды курок минек перька кармасть пурнавомо ломанть – кунсоломо, кода моратано. Французт, финнт, болгарт, Московонь рузт, полякт, украинецт, белорусст… Мейле кой-конатне эйстэст сакшность концертэзэнекак.
Секе чистэнть, кода сынек отелев, кортынек тосонь администраторонть Лючия марто, арсевтинек, кона шкасто ютавтомс ояксчинь чокшненть. Икелепелев теинек яволявтома, конань отелень важодицятне явшизь весе нупальтнева. Лемдинек сонзэ истя – Вастовомань чокшне. Минь икелепелев арсевтинек: те чокшнесэнть ёвтнетяно минек республикадонть – Мордовиядо, прявтоштонть – Саранскойде, косо карми ютавтовомо 2018-це иестэнть футболонь коряс чемпионатонь налксематне, эрзянь ды мокшонь минек раськетнеде, койтнеде-обуцятнеде, содавикс скульптордонть Степан Эрьзядо, кинень тедеде топодить 140 иеть, невтевлинек эсенек оршамотнень, моравлинек эсенек моронок. Отелень администрациянть туртов а мезель ульнесь ёвтамс тень каршо – тосо зярдояк истят тевть арасельть. Лючия эзь сода, кода, мезе кортамс. Минь саинек весе тевенть эсенек лангс. Ды вана тешкстазь шкантень — те ульнесь чокшнень ярсамодо мейле, ломантне кармасть пурнавомо холлсонть минек кунсоломо-ваномо. Весень пек дивавтызь минек оршамотне – ламот бажасть мартонок снимамо. Ды седеяк мельспаросо кунсолость эйсэнек. А содан уш, весе эли аволь весечарькодсть, ансяк весень чачост валдольть, весе вансть лангозонок ды кунсолость минек паро мельсэ. Те ульнесь кадык аволь покш, ансяк алкуксонь ояксчинь чокшне-вастовома. Кода иневедь чиресэяк, минек ней кунсолость ламо нациянь ломанть. Минь, кода арсинекак икелепелев, ёвтнинек республикадонть, чемпионаттонть, кодамо мазый минек Саранскоесь, кода сон аноксты чемпионатонтень, ёвтнинек раськеденек, кезэрень оршамопельтнеде, покшчинь ютавтомань, ярсамонь койтнеде, Вирь ало Тавладо, Ташто Теризморгадо, «Эрзянь озксто»… Кода тосо учить туристтнэнь ды анокт сынст седейшкава вастамс. Морынек моронок, тердинек лия масторонь ды Россиянь ломантнень инжекс минек Мордовияв. Монь ульнесть мартон эсень книган Мордовиядо, Саранскойде, Вирь ало Тавлань брагадо… – явшинь сынст эйкакштненень, кадык кармить ледстнеме те вастовоманть ды а стувтыть – ули истямо раське, ули истямо республика – Мордовия!
Чокшнеденть мейле минек ваксс пурнавсть ломанть, бажасть ёвтнеме эсест раськедест, эсест койтнеде… Весень мельс тусь истямо вана апак учонь тевесь-вастовомась. Эйкакштне, конат ульнесть те чокшнестэнть, мейле эрьва вастовомастонть чиильть эйзэнек ды кутморильть мартонок. Минь весень марто теевинек теке малавиккс роднят. Ды, арсемган, те истя ульнеськак!
Тамара Баргова
©Портал «Erzäks.ru»
Невтевкс налткенть эряви максомонзо,
зярдо саят тестэ сёрмадовкснэнь.
Последние комментарии