2014 иень таштамковонь 20-це чистэ Дубенкань енкссо ютавтовсь покш кенярксчи. Инжеть вастась Сайнеле велесь. Тесэ ютавтовсь «Ош Пандо – тиринь енксонь евтнема» проектэнть марто содавтомась, сонзэ лувсо истя жо ютавтовсь «Чипаз Озкс» фольклоронь фестивалесь. Кезэрень евтнематнень коряс, умонь-умонь шкатнестэ эрзятне эрякшность лия таркатнева. Марясть сынь, Сура леенть чиресэ улить сюпав модат. Неть вирьтнесэ эрить ламо ракшат, лейтнесэ уйнить покш калт. Секскак эрзятне сайсть мель самс тей эрямо. Ломантне се шкане ульнесть пек покшт ды сэрейть. Стявтсть сынь тезэнь покш Ош. Эсь пряст ды семияст яттнэнь каявомадо ванстомга, городищанть кармасть стявтомо пандо пряс. Моданть тов кандтнесть леенть чиресэ эсест шапкасост. Секскак од эрямотарканть покш ломантне лемдизь Ош пандокс, ваксканзо чудиця леенть — Парамзакс. Марясть, эрить маласост истят жо вадря ломанть, теевсть мартост ялгакс. Ды течимень чис эрить эсь ютковаст кеме ялгаксисэ.
Алкукскак истя. Кезэрень койтне ванстовить ды топавтовить неень шкастояк. Кенярксчинтень пуромкшность ламо инжеть весе Дубенкань велетнестэ ды Саранск ошстояк. Видькстасть, анокстамотне те вастовомантень ветявсть малав ковонь перть. Инжетнень кенярдовтомга тесэ анокстазель мельстуиця выставка, конасонть невтезель эрзятнень кудоюткост: тезэ стявтозель каштомо, невтезельть прялкат, човарт, кептерть, эрзянь мазый викшневкст. Стольтне пештезельть эрзянь коень ярсамопельсэ. Уш Ош Пандонтень ютамсто марявсть тантей прякатнень-каймактнень чинест, инжетнень каванясть пангосо, умарьсэ.
Мазый моротнень гайгемадост, эрзянь стихотворениятнень ловномадост, хороводонь ветямодонть мейле Ош Пандонтень пуромозетнень каванизь тантей ямсо оды кашасо. Теске, ушосо пидезь каванямотне, ульнесть пек тантейть, мик келетькак нильсак.
Кемтяно, Ош Пандось аволь меельцеде пуромкшнынзе неть мазый таркатнес весе неть эрзянь ломантнень. Те фестиваленть эряви поладомс сесде тов, тердемс инжеть шабра районтнэстэ. Седе ламо евтнемс те лия енов а молиця таркадонть школасо тонавтницятненень, невтнемс сонзэ туристнэнень. Ансяк истямо проектэнь вельде минь сюпалгавтсынек ды виензасынек тиринь раськенек. Кемтяно, иень ютазь таго пуромтано Ош Пандонть ваксс ды гайгстасынек эрзянь мазый моротнень.
Комментировать