2016 иень умарьковонь 25-це чистэ А.С. Пушкин лемсэ библиотекасо ютавтозель покшчи, кона алтазель А.Д. Куторкинэнь чачомстонзо 110 иень топодемантень.
Э
рзянь сёрмадыцянть ледстямо ды сонзэ шкинемантень питнень путомо сакшность ламо инжеть. Педагогикань наукань докторось, профессорось М.И. Ломшин ледстнесь, кода сёрмадсь наукань кандидатонь диссертанциянзо А.Д. Куторкинэнь «Покш ки лангсо умаринанзо» коряс, кода вастневсь сёрмадыцянть марто, кодат-мельть превть сайсь пельдензэ. Эрзянь ды мокшонь раськетнень Регонъютконь общественной организациянь исполкомонь прявтось А.С. Лузгингак кортась эрзянь литературас А.Д. Куторкинэнь путовкстонзо. Теде башка, сон казсь казнеть-книгат Чувашиясто инжетненень — школасо тонавтницятненень Рузавина Ульянанень ды Долгова Полинанень, конат изнясть ловныцянь регионъютконь пелькстамосо. Те пелькстамось алтазель А.Д. Куторкинэнь чачомстонзо 110 иень топодемантень. Рузавина Ульяна ёвтнизе рузонь кельсэ эсензэ арсевть валморонзо, конасонть пачтясь эрзянь сёрмадыцянть эрямокидензэ. Долгова Полина ёвтнесь эрзякс валморо. Тейтернетнень тонавтыцяст И.В. Долгова пачтясь, кода сынь Чувашиянь Алтышева велень школасо ютавтызь А.Д. Куторкиннэнь алтазь покшчинть.
Максозельть те покшистэнть лия казнетькак. МР-нь сёрмадыцятненень лездыця «Поддержка» общественной организациясь казинзе А.М.Доронинэнь эрзянь литературас путовксонзо кис ды Д.А. Тагановонь «Тундонь пиземе» валморонь пусмонзо кис.
Теде мейле А.Д. Куторкинэнь цёразо Михаил Андреевич Куторкин ёвтась покш сюкпря те покшчинть ютавтоманзо кис, ледстнесь сёрмадыцядонть, ёвтнесь, кодамо тарка сон сайсь эрямосонзо ды казинзе А.Д. Куторкинэнь медалензэ А.И. Полежаевень музеентень. Меельцепелев моросо кенярдовтынзе пурнавозтнень «Ламзурь» ансамблясь.
Саезь «Сятко» ковставксонь лопастонть
©Портал «Erzäks.ru»
Невтевкс налткенть эряви максомонзо,
зярдо саят тестэ максозь сёрмадовкснэнь.
Комментировать