Течи, ацамковонь 6-це чистэ Алексей Николаевич Лесных тешксты 50 иень юбилеензэ. Арсетяно тензэ кеме шумбрачи, кувака эрямо, валдо мельть-арсемат!
Зярыя иеде икеле интернетсэ гайгезевсть эрзянь од морот. Кой-конатне теезельть клип ладсо. Кувать эзинек сода, кие сон истямось, те морыця цёрась. Мейле ладизе лемензэ – Олёш. Ялатеке те мездеяк эзь корта. Аламо шкань ютазь теевинек содавиксэкс. Те – Алексей Лесных Самара ошонь эрицясь. Сон пек ламо мель яви эрзянь койтнень-кирдатнень, келенть, культуранть ванномантень-тонавтнемантень. Бути муи костояк минек раськеденть информация эли видео – сеске путсы интернетс. Весе содавольть эрзятнеде! Якси эрзянь кенярксчитнева, тейни фотот ды видеот, панжсь Числав Журавлёв поэтэнть сайт. Теде башка, вети эштё зярыя эрзянь сайтт. Сеске мерян, пек а шождаль саемс интервью те ломаненть кедьстэ. Ды кода а ёвтнемс сондензэ? Вана минек кортамонок.
– Алексей Николаевич, ёвтнек эсеть эйстэ.
– Чачинь мон Самарасо. Тетям – руз, авам – эрзя. Васенце валон, нама, ёвтынь рузонь кельсэ. Кудосо кортынек ансяк рузокс. Школань каникулатнень свал ютавтынь велесэ: Самара ёнксонь Кошкинской райононь эрзянь Од велесэ, Карамал веле эштё тензэ мерить. Покштянь ды бабань фамилияст эрзянь: Самаркин ды Ерисова. Эрзянь келентень вечкемась сась тень бабань пельде. Тевесь ульнесь истя – сон свал кортась мартон эрзякс, мон каршонзо – рузокс. Велень ялгатненьгак кармавтынь кортамс мартон ансяк эрзякс. Сынь эзть чарькоде, мезекс те эряви. Эрзятне кода-бути виздить, мекс сынь эрзят. Монсь эзинь чарькоде, мекс сынь истя шныть рузонсенть ды сялдыть эрзянсенть. Мон, вишка цёрыне, неинь, эрзятне рузтнэнь коряс тунь аволь седе берянть, паряк, мейсэ-бути седеяк вадрят. Эрзякс парсте кортамо эзинь тонадо. Чарькодемс весе чарькодян. Шождасто ловнан. Кортан беряньстэ ды аволь видестэ. Те, арсян, секс, мекс а кинь марто свал кортамс те кельсэнть. Весе перькан кортыть рузокс.
– Кода истя лиссь, тон кармить морамо эрзякс?
– Морсян од шкасто саезь. Ули гитарам. Мекс мон карминь морамо эрзякс? Ды кежень састь, покордавозь аштинь. Эрзянь келесь истямо мазый, гайгиця ды эйсэнзэ истя аламо морот. Кезэрень моротне эно муевить, марясы (сюкпря тень кисэ В.Ромашкиннэнь ды «Торамантень»), а вана од морот, неень шкань жанратнень коряс арасть! Прок тунь арасть од морыцят, од ёроков ломанть, арасть композиторт. Косот? Теде арсезь, мон карминь морамо. Васня гитара марто. Ули монь вейке мельстуиця тевем (а содан, паро сон или берянь), вечкан ловномо стихть, морсеме сынст гитарасо бренькаезь. А ледстяви, кодамо ульнесь васенце стихесь, конань морыя ды максыя кунсоломс эрзянь ялгатненень. Сыненст тусь мельс. Эстень ульнесь аволь стака вана истя морамс. Тевесь сыргась. Морсян «Олёш» лементь ало, истя тень мериль бабам.
– Мон ванса, тонь моротнень ютксо улить рузонь содавикс мороткак. Кие сынст ютавтынзе эрзякс?
– Вера Алексеева ды Римма Жегалина – неть кавто аватне парсте содасызь эрзянь келенть, сонзэ гайгеманзо, лексеманзо. Энялдомам коряс сынь ютавтсть рузонь содавикс моротнень эрзянь кельс. Мейле моротнень морынь гитара марто эли минусовка вельде. Истя пурнавсть зярыя ютавтозь морот. (Саемга, Трофимень «Снегири», М.Кругонь «Приходите в мой дом», «Секрет» группань «Привет», Олег Митяевень репертуарсто ды лия содавикс моротне). Паряк, кияк моли вейке кельстэ лия кельс моронь ютавтоманть каршо? Мон арсян лиякс. Эрьва валось, кона ёвтазь эрзякс, кона моразь ды сёрмадозь – те эскелькс, те виде ки. Эрзянь сюпавчинь таштавкске, эштё вейке паро тев.
– Зярдо карминь совсеме Интернетс, ушодынь вешнеме мезеяк эрзянь. Дивазевинь, эрзятнеде тосо ульнесь пачтязь пек аламо. «Государственной эрзянь интернет» арасель. Ды мезть кортамс, нейгак Мордовия Республикась интернетсэ мезеяк а ёвтни эрзятнеде ды мокшотнеде. Мерят, неть кавто раськетне а эрить республикасо, сынь прок арастькак. Монень теевсь апаро. Мекс истя? Минек паро шабратнень, татартнэнь ды чуваштнэнь улить тиринь кельсэ ламо сайтэст, кода государственнойть, истя национальной движениянь активисттнэнь теевттькак. Минек те тевсэнть чаво пакся… Кода улемс республикань томбале эриця эрзятненень? Покш меленек ваномс тиринь кельсэ передачат, кунсоломс радио, ловномс газетат, – корты Алексей Николаевич.
Истя, А.Н.Лесных састыне кармась интернетстэ пурнамо весе сень, мезе муиль эрзянь: морот, ёвкст, ёвтнемат. Чуросто ютавтовиця эрзянь кенярксчитнестэ рамсесь моро марто дискть. Тейсь оцифровка казезь эли костояк вешезь аудио дисктненень, кассетатненень ды пластинкатненень. Валонзо коряс, эрьва кассетась марявсь тензэ муезь кладокс.
– Вейке покшчистэ теевинь содавиксэкс эрзянь паро ды алкуксонь патриоттнэнь марто: те ульнесть Числав Журавлёв поэтэсь ды Вера Алексеева. Икеле сынь Самарань радиосо ветясть эрзянь кельсэ передачат. Кедьсэст ванстовсть передачань записть ды морот. Истя састыне пурнынь фонотека. Карминь арсеме, кода максомс интернетсэ пурназь материалонть, эрзянь моротнень. Улевельть сынь ве таркасо ды эрьвась муевлинзе сынст, кунсоловоль, саевель эстензэ. Истя «Живой Журналсо» появась «Эрзянь морот» («Нудей») сайтэсь. Тосо мон явинь сынст башка рубрикава: моронь, стихень, ёвтнемань. «Нудейсэнть» аламошка пачтявсь эрьва морыцядонть, ансамблядонть, невтевсть фотост. Эрьва совицянтень сёрмадови сёрма, мельть-арсемат. Ёвтан видьстэ, неень шкане сайтэнть структуразо таштомсь. Появасть ламо морыцят ды ансамблят, весе сынь а путовить тов. Мезе парось, сайтэсь важоди, панжови. «Нудейденть» башка, монь ули Ю-тубсо «Самарань ёнкс» покш лопам. Тозо путнян эсень кедьсэ снимазь ды лиятнень видеот. Ансяк эрзянь ды ансяк косо ёвтневи мезеяк эрзятнеде. Эйсэст ваныть пек ламо ломанть, аволь ансяк минек масторонь.
– Косто сась мелесь панжомс Числав Журавлёвонь сайт?
– Числав Григорьевич – эрзянь ине поэт ды вадря ломань. Минь Вера Алексеевань марто арсинек-арсинек, кода невтемс поэтэнть творчестванзо интернетсэ? Истя, зярыя иеде икеле панжинек «Каргонь ки» Числав Журавлёвонь персональной сайтэнзэ. Веранень ёвтан башка сюкпря, сонтемензэ мезеяк аволь лисе. Сайтэнть теинек сень кисэ: ловномс ды саемс (скачивать) тосто сонзэ произведениянзо. Ней тосо мереви ваномс видео, кунсоломс морот. Сайтэнь прявт лопасо ёвтневи Самарань эрзятнень эрямодост, максовить анонст. Сайтэсь пештяви Числавонь од произведениясо. Течинь чине поэтэнть аволь весе книганзо аштить тосо. Тень лангсо важодтяно.
– Кодат мелеть-бажамот седе тов?
– Арсематнеде, мельтнеде ламо. Неень шкане ули мелем панжомс «Эрзянь морот» од покш сайт. Тосо кармить видеот, моронь валтнэ, нотат. Течинь чине интернетэсь эрзятненень – вишка олгине, идемань меельце тарка, косо можна куш аламошкадо ванстомс келенть, вельмевтемс, кепедемс, а стувтомс, кортамс тиринь кельсэ. Рузкс ёвтаса, а эряви менстямс те возможностенть, а ёмавтомс шканть! Зярс минь эрятано, зярс вакссонок улить келень содыцят, эрзякс кортыцят, интернетсэ эряви седе ламо кортамс ды сёрмадомс эрзякс. Эрявить ламо видеот празниктнестэ, покшчитнестэ, видеот, косо ёвтневи эрзятнеде, невтевить сынь. Интернетэнтень эряви кортазевемс эрзякс. Кода уш ёвтынь, неень шкане эрзянь раськесь лавшосто невтеви интернетсэ. Монь ули покш мелем вейсэндямс весе эрзятнень интернетэнь вейке таркасо, вейке куросо, косо кортавлинек апак сёвно, апак пелькста. Вейсэ кортавлинек эрзянь стакачитнеде, кода сынст витемс. Миненек, эрзятненень, эряви улемс вейсэ, вейсэндявомс куш интернетсэ, – вана истя псистэ, весе седейстэ ёвтынзе мелензэ Самарань цёрась.
Ули Алексей Николаевичень эрямосо истямо тев, конадонть сон бажи а ёвтнемс. «Те монь важодемам», – мери ансяк ды весе. А сестэ сон важодсь милициясо. Весть сынст ошсо яволявтозель нурька шкас муемс преступникенть, кона чавсь ломанть ды салась покш ярмакт. Теде башка, кедьсэнзэ ульнесь автомат, конастонть аноколь ледемс кинзэ лангс лисицятнень. Сёксень чопода ды пиземев вестэ А.Н.Лесных старшей сержантось содызе преступникенть ды мездеяк апак пеле пшкадсь тензэ лезкс мельга. Тона мезеяк истямо эзь учне, паро ладсо эзь чарькодеяк. Те эрявськак. Сонзэ курокке кундызь, нельгизь автоматонть ды сюлмсизь кедензэ. Кодамо покш зыян улевель, бути мезеяк а истя лисевель, теде кияк эзь арсе. Шкань ютазь А.Н.Лесных казезель «За личное мужество» орденсэ.
Т.Маторкина
Эрзянь Правда-сто саезь ©Портал «Erzäks.ru»
Невтевкс налткенть эряви максомонзо,
зярдо саят тестэ максозь сёрмадовкснэнь.
Олёш — Аволь чаво паксяс валги мором (кунсолодо ды ванодо моравксонзо)
Римма Жегалина сёрмады:
Вечкевикс ялгат — эрзянь моронь вечкицят! Течи, ацамковонь 6 чистэ, тешксты 50 иензэ топодеманть ОЛЁШ (Алексей Лесных) Самара ошонь эрзянь цёрась. Те сон ушодызе интернетсэ эрзянь моротнень, сынст марто невтематнень пурнамост, панжсь «ЭРЗЯНЬ МОРОТ. НУДЕЙ» , «По реке Кармалке» ЖЖ (живой журналт). ERSIA TUBE SAMARA невтемань (видеонь) парго. Сонзэ путовкстнэсэ сайнить ды ваныть весе эрзятне. Минь ОЛЁШОНЬ содасынек кода мазый вайгель марто моронь морыцянть ды эрзянь поэттнэнь валморост лангс музыкань теицянть. ЧАЧОМА ЧИ МАРТО ТОНЬ, ЭРЗЯНЬ МОРОНЬ КЕПЕДИЦЯ ДЫ ТЕИЦЯ!!! ШУМБРАЧИ ДЫ УЦЯСКА ТЕТЬ!!! ЧАЧОСТ ОЙМЕСЭТЬ ЛАМО МАЗЫЙ ЭРЗЯНЬ МОРОТ!!!
Комментировать